વાતાવરણ / પાકને નુકસાન, નદીમાં નવા નીર: ખેડૂતોને કમોસમી માવઠાથી રાહત ક્યારે? જાણો હિટવેવને લઇ હવામાનની આગાહી

• ગુજરાતના કેટલાક વિસ્તારોના વાતાવરણમાં પલટો 
• હવામાન વિભાગની આગાહી વચ્ચે અંબાજીમાં વરસાદ
• રાજકોટ, જામનગર અને બનાસકાંઠાના ગ્રામ્ય વિસ્તારોમાં વરસાદ
• કમોસમી વરસાદ પડતા ખેડૂતોની ચિંતામાં વધારો

ઉત્તર-પૂર્વ રાજસ્થાન અને તેની આજુબાજુના વિસ્તારોમાં તેમજ દક્ષિણ-પશ્ચિમ રાજસ્થાન અને તેની આજુબાજુના વિસ્તારમાં ફેલાયેલા સાઇક્લોનિક સર્ક્યુલેશનથી ખેડૂતોની મુશ્કેલીમાં વધારો થયો છે. ગુજરાતભરમાં મોસમ જાણે મજાક કરી રહ્યું હોય તેમ માર્ચ મહિનામાં પણ અષાઢ મહિનાની જેમ ભારે પવન સાથે કમોસમી વરસાદ  ખાબકી રહ્યો છે. આજે પણ રાજ્યના કેટલાક વિસ્તારોમાં વાતાવરણમાં પલટો આવ્યો છે. રાજકોટ, જામનગર, ભાવનગર, બનાસકાંઠાના કેટલાક વિસ્તારોમાં ભર ઉનાળે કમોસમી વરસાદ ખાબકતા ખેડૂતોની ચિંતામાં વધારો થયો છે.

ગોંડલના કોલીથડ ગામમાં વરસાદ
રાજકોટના ગોંડલના કોલીથડ ગામમાં વરસાદી માહોલ જોવા મળી રહ્યો છે. આજે પણ કોલીથડ ગામમાં કમોસમી વરસાદ ખાબક્યો છે. સતત પડી રહેલા વરસાદના કારણે ખેડૂતોને ભારે નુકસાની વેઠવાનો વારો આવ્યો છે.  કમોસમી વરસાદે પાકને બરબાદ કર્યો છે. અત્યાર સુધી તૈયાર કરેલો રવિ પાક કમોસમી વરસાદમાં સડી ગયો છે, ધોવાઈ ગયો છે. 

અંબાજી અને દાંતા પંથકમાં વરસાદ
બનાસકાંઠા જિલ્લામાં પણ હવામાન વિભાગની આગાહી વચ્ચે વરસાદી માહોલ છવાયો છે. બનાસકાંઠા જિલ્લાના અંબાજી અને દાંતા પંથકમાં ભર ઉનાળે ચોમાસા જેવું મોસમ બન્યું છે. દાંતા તાલુકામાં વરસાદી માહોલ છવાતાં ખેડૂતો ચિંતિત થયા છે. કમોસમી વરસાદને લઈ ખેડૂતોના ઉભા પાકને નુકસાન થવાની ભીતિ સર્જાઈ રહી છે. યાત્રાધામ અંબાજી ખાતે કમોસમી વરસાદની શરૂઆત થઈ છે. કમોસમી વરસાદ પડતા ખેડૂતોની ચિંતામાં વધારો થયો છે. 

ખાંભા ગીરના ગ્રામ્ય વિસ્તારમાં ફરી કમોસમી વરસાદ
અમરેલીના ખાંભા ગીરના ગ્રામ્ય વિસ્તારમાં ફરી કમોસમી વરસાદ શરૂ થયો છે. વાંગધ્રા, નિંગાળા, ચકરાવા, ધુધવાનાં ગામમાં વરસાદી માહોલ છવાયો છે. ગીરના ગામડાઓમાં ગઈકાલથી સતત વરસાદ વરસી રહ્યો છે. સતત વરસાદના કારણે તૈયાર પાકને નુકસાન થયું છે.  
 

ભાવનગરમાં ઈંટોના ભઠ્ઠામાં મોટા પ્રમાણમાં નુકસાન
ભાવનગર જિલ્લામાં વાવાજોડું અને વરસાદ પડવાનાં લીધે ઈંટોના વ્યવસાયને પણ વ્યાપક પ્રમાણમાં નુકસાન થયું છે. ઈટો પાડવાની સિઝન શરૂ થયા બાદ ભાવનગર જિલ્લા સીદસર, વાળુકળ, ચિત્રા, નવાગામમાં જુદા-જુદા સ્થળોએ કાચી ઈટો તૈયાર કરાઈ છે. જેને ભઠ્ઠીમાં મૂકીને પાકી બનાવતા પહેલાં કમોસમી વરસાદ કાચી ઈંટો પર પડ્ય હતો. જેથી અનેક ઉત્પાદકોને નુકસાની સહન કરવા સાથે મહેનત ઉપર પાણી ફ્રી વળ્યું છે. આમ તો ઈંટ ઉત્પાદકો ઘણા સમયથી મંદીનો સામનો કરી રહ્યા હતા ત્યાં જેમ તેમ કરી ઉત્પાદન શરુ થયું અને કમોસમી વરસાદ આવી પડતાં સીદસર સહિતનાં આજુબાજુ ગામનાં ઈંટ ભઠ્ઠા માલિકોની પડતા પર પાટુ જેવી હાલત થઈ છે. 

જામનગરના ગ્રામ્ય પંથકમાં વરસાદ શરૂ
જામનગરના ગ્રામ્ય પંથકના વાતાવરણમાં અચાનક પલટો આવ્યો છે. હવામાન વિભાગની આગાહી વચ્ચે જામનગરમાં કમોસમી વરસાદ શરૂ થયો છે. શેઠ વડાળા ગામમાં સતત ધોધમાર વરસાદ વરસી રહ્યો છે. ઉનાળાની શરૂઆતમાં કમોસમી વરસાદ થતા ખેડૂતોની ચિંતા વધી છે. ઘઉં, જીરુ, અજમો, એરંડાના પાકને નુકસાન થયું છે. 

ઉપલેટાના ગ્રામ્ય વિસ્તારમાં કમોસમી વરસાદ
ઉપલેટાના ગ્રામ્ય વિસ્તારમાં પણ ગાજવીજ સાથે કમોસમી વરસાદ શરૂ થયો છે. ઉપલેટાના ગઢાળા ચરેલીયા, રાજપરા, ખારચીયા સહિતના ગામમાં ગાજવીજ સાથે કમોસમી વરસાદ વરસી રહ્યો છે. ગઢાળા ગામમાં ભારે વરસાદને લઈ રોડ ઉપર પાણી ભરાયા છે. ઉનાળામાં અસાઢી માહોલ જોવા મળી રહ્યો છે. ગઢાળા ગામમાં ભારે પવન સાથે વરસાદ શરૂ થતા ખેડૂતોની ચિંતામાં વધારો થયો છે. ઘઉં, ચણા, વરિયાળી, કેરી, ધાણા સહિતના પાકને મોટા પ્રમાણમાં નુકસાન થયું છે. ઉપલેટાના ગ્રામ્ય પંથકમાં ફરી કમોસમી વરસાદ શરૂ થતા ખેડૂતોની હાલત દયનિય બની છે.

જેતપુરમાં ગાજવીજ સાથે ભારે વરસાદ 
જેતપુરમાં બપોર બાદ વાતાવરણમાં પલટો આવ્યો છે. જેતપુરમાં ગાજવીજ સાથે ભારે વરસાદ વરસી રહ્યો છે. જેતપુરમાં પવન સાથે ફરી ભારે વરસાદ શરૂ થતાં ખેડૂતોની મુશ્કેલીઓમાં વધારો થયો છે. 

હજુ 2 દિવસ રહેશે વરસાદી માહોલ
અત્રે ઉલ્લેખનીય છે કે, રાજ્યમાં હજુ આગામી 2 દિવસ વરસાદની આગાહી છે. આજે રાજકોટ, જામનગર, ભાવનગર, અમરેલી, કચ્છ, સુરેન્દ્રનગર, બનાસકાંઠા, સાબરકાંઠા, અરવલ્લી, દાહોદ, મહીસાગર, છોટાઉદેપુર અને નર્મદામાં પણ વરસાદની આગાહી છે. રાજસ્થાન તરફ સર્ક્યુલશનને થતા વરસાદની આગાહી કરાઈ છે. આવતીકાલે સૌરાષ્ટ્ર અને કચ્છમાં કેટલાક વિસ્તારમાં વરસાદી માહોલ રહેશે. અમદાવાદ અને ગાંધીનગરમાં પણ વરસાદ નોંધાઈ શકે છે. 4 દિવસ બાદ રાજ્યના તાપમાનમાં વધારો થાય તેવી શક્યતાઓ છે. હવામાન વિભાગના જણાવ્યા અનુસાર, ગુજરાતમાં શુક્રવાર સવારથી ગરમીનો અહેસાસ થવા લાગશે. આ મહિનના અંત સુધીમાં ગરમીની તીવ્રતામાં વૃદ્ધિ થતી રહેશે.