મેઘમહેર / જગતનો તાત ખુશખુશાલ...ઉત્તર ગુજરાતમાં મેઘાની સેકન્ડ ઇનિંગ શરૂ, વહેલી સવારથી જ જામ્યો મેહુલિયો

• ગુજરાતમાં વરસાદનો બીજો રાઉન્ડ 
• ઉત્તર ગુજરાતમાં વરસાદી માહોલ
• ખેડૂતોમાં હરખની લાગણી

ગુજરાતમાં વરસાદનો સેકન્ડ રાઉન્ડ શરૂ થયો છે. ઉત્તર ગુજરાત, સૌરાષ્ટ્ર સહિત વરસાદી માહોલ જામ્યો છે. છેલ્લા ઘણા દિવસોથી રાજ્યની જનતા ભારે ગરમી અને બફારાથી ત્રસ્ત હતી ત્યારે હવે વરસાદનો બીજો રાઉન્ડ શરૂ થતા થોડી રાહતની લાગણી મળી છે.  ઉત્તર ગુજરાતમાં તો આજે વહેલી સવારથી જ મેઘરાજાની પધરામણી થઇ ગઇ છે. ત્યારે આવો જોઇએ ઉત્તર ગુજરાતમાં કેવો છે વરસાદી માહોલ 

સાબરકાંઠામાં મેઘમહેર

સાબરકાંઠામાં આજે સવારથી વરસાદની પધરામણી થઇ ગઇ છે. ખેડબ્રહ્મા, વડાલી, રવિપુરા સહિતના ગ્રામ્ય વિસ્તારોમાં મેઘો ધોધમાર વરસ્યો. વડાલીમાં એક જ કલાકમાં એક ઇંચ વરસાદ વરસતા ખેડૂતો ખુશખુશાલ જણાયા. ખેડબ્રહ્માના રાધીવાડા, મેત્રાલ, માતાજીકંપામાં વરસાદી માહોલ જોવા મળી રહ્યો છે. આ તરફ હિંમતનગરના ગાંભોઇ, રૂપાલ, ગાંધીપુરા અને વાવડીમાં પણ વરસાદ થતા ખેડૂતોમાં હરખની લાગણી ફરી વળી છે. મહત્વનું છે કે પહેલા રાઉન્ડમાં અત્યાર સુધીમાં 25 ઇંચ જેટલો વરસાદ વરસ્યો છે પરંતુ હજી પણ જિલ્લાના જળશાયો ખાલી જ જોવા મળી રહ્યા છે. 

મહેસાણામાં વરસાદી માહોલ

મહેસાણામાં વહેલી સવારથી જ વરસાદી માહોલ જામ્યો છે. વાદળછાયા વાતાવરણ વચ્ચે વરસાદ તૂટી પડતા નીચાણ વાળા વિસ્તારો પાણી પાણી થયા હતા.  ઊંઝામાં વહેલી સવારે ધોધમાર વરસાદથી ઠેર ઠેર પાણી ભરાતા વાહનચાલકો પરેશાન થયા હતા. રોડ રસ્તા  પાણી પાણી થતા રાહદારીઓ પરેશાન થયા હતા. આ ઉપરાંત વડનગર, ખેરાલુ અને મહેસાણામાં પણ વરસાદ જોવા મળ્યો.
  
અરવલ્લીમાં વરસાદ

અરવલ્લીમાં પણ વરસાદનો બીજો રાઉન્ડ શરૂ થયો છે. ભિલોડા, માંકરોડા, ખલવાડ, લીલછા સહિતના વિસ્તારમાં વરસાદ થતા અનેક વિસ્તારો પાણી પાણી થયા. પવન સાથે વરસાદ તૂટી પડતા વાતાવરણમાં ઠંડકની લહેર ફરી વળી હતી. 

ડીસામાં 1 કલાકમાં 1 ઇંચ

તો આ તરફ બનાસકાંઠાના ડીસામાં એક કલાકમાં 1 ઇંચ વરસાદ ખાબક્યો, જિલ્લાના અનેક વિસ્તારમાં ગાજવીજ સાથે વરસાદ થતા રહીશોએ બફરામાંથી રાહત મેળવી હતી. સારો એવો વરસાદ થતા ખેડૂતો પણ ખુશખુશાલ જણાયા. વાવેતર બાદ વરસાદી માહોલ જામતા ખેડૂતોએ  સારા ઉત્પાદનની આશા સેવી. 

આજથી 10 ઑગષ્ટ સુધી ભારે વરસાદની આગાહી

હવામાન વિભાગે સમગ્ર રાજ્યમાં આગામી ત્રણ દિવસથી ભારેથી અતિભારે વરસાદની આગાહી કરી છે. આજથી 10 ઓગસ્ટ સુધી રાજ્યમાં અનેક જગ્યાએ વરસાદની ધમાકેદાર વરસાદની આગાહી કરવામાં આવી છે. દક્ષિણ ગુજરાત અને સૌરાષ્ટ્રમાં અત્યંત ભારે વરસાદની આગાહી કરવામાં આવી છે, જ્યારે સુરત,  વલસાડ અને નવસારીમાં અતિભારે વરસાદની આગાહી કરવામાં આવી છે. સાથે તાપી, દમણ અને દાદરાનગર હવેલીમાં અતિભારે વરસાદની આગાહી કરવામાં આવી છે. હવામાન વિભાગની આગાહી મુજબ ગુજરાતમાં વરસાદનું જોર ફરી વધી શકે છે. 9 જિલ્લામાં ભારે વરસાદ ખાબકી શકે છે. જેમાં ખાસ કરીને દ.ગુજરાત અને સૌરાષ્ટ્રમાં ભારે વરસાદની આગાહી છે. મધ્ય અને ઉત્તર ગુજરાત વરસાદી ઝાપટાં જોવા મળી શકે છે.

છેલ્લા 24 કલાકમાં 89 તાલુકાઓમાં વરસાદ 

હવામાન વિભાગની આગાહીને પગલે રાજ્યમાં છેલ્લા 24 કલાકમાં 89 તાલુકામાં વરસાદ થયો છે. જેમાં સૌથી વધુ અમરેલીના લાઠીમાં 2.5 ઈંચ વરસાદ થયો છે. સાથે બાબરામાં 2.5 ઈંચ અને વાંકાનેરમાં સવા 2 ઈંચ વરસાદ થયો છે. ઉપરાંત જસદાણ અને ગારિયાધારમાં 2-2 ઈંચ વરસાદ થયો છે, જ્યાકે વ્યારા અને પાલિતાણામાં પોણા 2 ઈંચ વરસાદ થયો છે. સાથે ચોટિલા, વાલોદ, ખાંભા, મેંદરડા અને વલ્લભીપુરમાં 1.5 ઈંચ વરસાદ તથા ખાંભા, મેંદરડા અને વલ્લભીપુરમાં 1.5 ઈંચ વરસાદ થયો છે. ઉપરાંત દ્વારકામાં સવા ઈંચ અને લોધિકા તથા લિંબડીમાં 1-1 ઈંચ વરસાદ થયો છે.