ધડબડાટી / આજે સૌરાષ્ટ્ર અને ઉત્તરગુજરાતમાં અવિતરત વરસાદ, હવામાન વિભાગની નવી આગાહી, 13 જિલ્લામાં 24 કલાકમાં પડશે ભારે વરસાદ

• ગુજરાતમાં વરસાદી માહોલ ફરી જામ્યો
• રાજ્યના અનેક જિલ્લામાં ધોધમાર વરસાદ
• 10 ઓગસ્ટ સુધી હવામાન વિભાગની ભારે આગાહી

રાજ્યમાં 15 દિવસના વિરામ બાદ ઘણા વિસ્તારોમાં વરસાદે ધમાકેદાર એન્ટ્રી કરી છે. વાવણી બાદ ઘણા જિલ્લાઓના ખેડૂતોને વરસાદની ખેંચ આણમાં કણાની જેમ ખૂંચતી હતી. પણ વરસાદી સિસ્ટમ સક્રિય થતાં અને વાતરવરણમાં પલટો આવતા ખેડૂતોમાં હરખની હેલી જોવા મળી છે. બનાસકાંઠા, સુરત, સુરેન્દ્રનગર, મહેસાણા, અરવલ્લી, ગીર સોમનાથ, રાજકોટ, પંચમહાલ, સાબરકાંઠા તેમજ અમદાવાદના કેટલાક વિસ્તારમાં સારો વરસાદ વરસ્યો છે.

રાજ્યના 13 જિલ્લાઓમાં અતિભારે વરસાદની આગાહી
એમાંય આજની આગાહી કરતા હવામાન વિભાગે જણાવ્યું કે, આજે રાજ્યના 13 જિલ્લાઓમાં અતિભારે વરસાદ વરસશે. આજે અમદાવાદમાં સારો એવો ભારે વરસાદ વરસી શકે છે. જેમાં  બનાસકાંઠા, પાટણ, મહેસાણા, ગાંધીનગર, ખેડા, પંચમહાલ, દાહોદ, છોટા ઉદેપુર અને નર્મદામાં ભારે વરસાદ પડશે.બીજી બાજુ તારીખ 6 ઓગસ્ટના રોજ 3 જિલ્લાઓમાં અતિભારે વરસાદની આગાહી કરાઇ છે. જ્યારે 7 ઓગસ્ટના રોજ રાજ્યના 5 જિલ્લાઓમાં ભારે વરસાદની આગાહી કરાઇ છે. જ્યારે 8 ઓગસ્ટના રોજ 9 જિલ્લાઓમાં ભારે વરસાદની હવામાન વિભાગે આગાહી કરી છે.

હવામાન નિષ્ણાંત અંબાલાલ પટેલની આગાહી
અંબાલાલ પટેલે આગાહી કરતા જણાવ્યું કે, 'મધ્ય ગુજરાતમાં ભારે વરસાદ થવાની સંભાવના છે. તારીખ 6 ઓગસ્ટ સુધી મધ્ય ગુજરાતમાં ભારેથી અતિભારે વરસાદ થવાની સંભાવના છે. રાજ્યના અમુક વિસ્તારમાં 6 ઈંચથી વધુ વરસાદ પડશે જ્યારે તાપી અને નર્મદા નદીના જળસ્તરમાં પણ વધારો થશે.' વધુમાં કહ્યું કે, 'આગામી તારીખ 10 ઓગસ્ટ સુધી દક્ષિણ ગુજરાતમાં પણ અતિભારે વરસાદની શક્યતા રહેલી છે. જ્યારે દક્ષિણ સૌરાષ્ટ્રના ભાગોમાં ભારેથી અતિભારે વરસાદની સંભાવના રહેલી છે.'

સુરતમાં વીજળી પડતા 5 લોકો બેભાન
સુરતના કામરેજમાં એક દુઃખદ ઘટના બની. કોળી ભરથાણમાં વીજળી પડતા 5 લોકો બેભાન થઇ ગયા હોવાનું સામે આવ્યુ છે. જેમાં એક યુવતી, એક બાળક અને 3 યુવકનો સમાવેશ થાય છે. તેઓ વરસાદથી બચવા માટે ઝાડ નીચે બેઠા હતા તે દરમિયાન વીજળી પડતા પાંચેયની હાલત ગંભીર બની હતી. હાલ તેઓને સારવાર અર્થે હોસ્પિટલ ખસેડાયા છે.    b