મેહૂલિયો / અમદાવાદમાં મેઘરાજાની ધમાકેદાર બેટિંગ, રિવરફ્રન્ટ પર યંગસ્ટર્સે વરસાદની મજા માણી

અમદાવાદમાં ગઈકાલથી જ ધીમીધારે વરસાદ વરસી રહ્યો છે. ત્યારે હજુ પણ ક્યારેક ઝરમર તો ક્યારેક ઝાપટા વરસી રહ્યા છે. અમદાવાદ શહેરના થલતેજ, સેટેલાઈટ, વસ્ત્રાપુર, સોલા, ચાંદલોડિયા અને ઘાટલોડિયામાં વરસાદ વરસ્યો છે. પાલડી, વાસણા, CG રોડ નજીકના વિસ્તારમાં વરસાદ પડ્યો. તો બીજી તરફ ગોતા, ઓગણજ, શીલજ, સરખેજ ,જુહાપુરા, જીવરાજ, નવરંગપુરા, નારણપુરા, અખબારનગર, દાણીલીમડા, ખોખરા હાટકેશ્વર, મણીનગર, નારોલ, ઈસનપુર, ઘોડાસર, નરોડા, નિકોલ અને બાપુનગર સહિતના વિસ્તારોમાં વરસાદ જોવા મળી રહ્યો છે. તો શહેરમાં કેટલાક સ્થળોએ વૃક્ષો પણ ધરાશાયી થઈ ગયા હતા.

રિવરફ્રન્ટ પર અમદાવાદ યંગસ્ટર્સે માણી વરસાદની મજા

રાજ્યભરમાં વરસાદી માહોલ જામ્યો છે ત્યારે શહેરમાં પણ ગત મોડીરાતથી વરસાદ શરૂ થતાની સાથે જ અમદાવાદીઓ વરસાદની મજા માણવા રિવરફ્રન્ટ પર નીકળી પડ્યા હતા. યુવક યુવતીઓએ અહીં સાઈકલિંગ કરીને વરસાદની મજામાણી હતી.

સન ક્રેસ્ટલ સોસાયટીમાં દીવાલ ધરશાયી

ત્યારે વરસાદી માહોલની વચ્ચે દીવાલ ધરાશાયી થવાની ઘટના બની હતી. સન ક્રેસ્ટલ સોસાયટીમાં દીવાલ ધરાશાયી થઈ હતી. ફ્લેટના ચોથા માળની દીવાલ ધરાશાયી થઈ. દિવાલ પડતા નીચે પાર્ક કરેલી એક કારને નુકશાન થયુ હતુ. જુના ફ્લેટ હોવાથી વરસાદના લીધે દીવાલ પડી હતી. જો કે, ફાયરબ્રિગેડની ટીમ ઘટનાસ્થળે પહોંચી હતી.

અનેક વિસ્તારોમાં પાણી ભરાયા

ધીમી ધારે વરસાદ પડતા ગોતા બ્રિજ, ચાંદલોડિયા બ્રિજ નીચે ઘૂંટણસમા પાણી ભરાઇ જતા લોકોને હાલાકી પડી રહી છે. બોપલ અને શીલજ વચ્ચે આવેલા અન્ડર પાસમાં પાણી ફરી વળ્યા હતા. અંડરપાસમાં 3 ફૂટ સુધી પાણી ભરાઈ જતાં માર્ગ બંધ થઈ ગયો હતો

સામાન્ય વરસાદમાં તંત્રની ખુલી પોલ 

અમદાવાદમાં સામાન્ય વરસાદમાં પણ તંત્રની પોલ ખુલી ગઇ છે. શહેરમાં ઠેર-ઠેર પાણી ભરાવાને લઇ લોકોને મુશ્કેલી પડી રહી છે. બોડકદેવ NFD સર્કલ પાસે રોડ પર ખાડા પડ્યા છે. જેના કારણે વાહનચાલકોને હાલાકી વેઠવી પડી રહી છે. માત્ર થોડા વરસાદમાં જ રસ્તાઓ પર ખાડા જોવા મળી રહ્યા છે. ત્યારે નવી સિવિલમાં પણ પાણી ભરાઇ ગયા છે. જેના કારણે દર્દીઓના પરિવારજનોને હાલાકી થઇ રહી છે.

સ્કૂલ બસ ખાડામાં ફસાઇ

અમદાવાદમાં સ્કૂલ બસ ખાડામાં ફસાઇ ગઇ હતી. સામાન્ય વરસાદમાં પણ રસ્તાઓ પર ખાડા પડી ગયા છે. જેના કારણે ઝેબર સ્કૂલની બસ ખાડામાં ફસાઇ ગઇ છે. જો કે બસમાં કોઇ વિદ્યાર્થીઓ ન હોવાથી મોટી દૂર્ઘટના ટળી ગઇ છે.