ચોમાસું / મુબંઈમાં ગાજવીજ સાથે ધોધમાર વરસાદ, જાણો ગુજરાતમાં ક્યારે થશે આગમન

મુંબઇના અનેક વિસ્તારમાં વરસાદ પડતા લોકોમાં પણ ખુશીનો માહોલ જોવા મળી રહ્યો છે. એક તરફ કાળઝાળ ગરમીથી લોકો ત્રાહિમામ પોકારી ગયા છે, ત્યારે હવે મુંબઈમા વરસાદ પડતા લોકોને ગરમીથી આંશિક રાહત ચોક્કસ મળી છે. 

ઉલ્લેખનીય છે કે, કેરળમાં પણ ચોમાસાનું આગામન થઈ ચૂક્યું છે. ત્યારે હવે ગુજરાતમાં પણ જલ્દી ચોમાસુ બેસે તેવા એંધાણ છે. હવામાન વિભાગનું માનીએ તો ગુજરાતમાં 13 જૂને ચોમાસુ બેસી શકે છે. અરબી સમુદ્રમાં સર્જાયેલું હવાનું હળવું દબાણ (લૉ પ્રેશર સિસ્ટમ) ચક્રવાતમાં પરિવર્તિત થવાની શક્યતાને પગલે હવામાન વિભાગે આગામી 12 અને 13 જૂન કચ્છ, સૌરાષ્ટ્ર અને દક્ષિણ ગુજરાતના દરિયાઇ કાંઠા વિસ્તારમાં વરસાદની આગાહી કરી છે.

એટલું જ નહીં, આ દરમિયાન સુરત સહિત સમગ્ર દક્ષિણ ગુજરાતમાં 35થી 40 કિ.મીની ઝડપે પવન ફૂંકાઈ શકે છે. આ હળવા દબાણને પગલે આગામી બે દિવસમાં ઉત્તર-પશ્ચિમી રાજ્યો તરફ આગળ વધીને ચક્રવાતમાં પરિવર્તિત થશે.

તમને જણાવી દઇએ કે, સૌરાષ્ટ્ર-કચ્છમાં 11 જૂનથી વાતાવરણમાં પલટો થશે. 12 અને 13 જૂને સૌરાષ્ટ્ર-કચ્છમાં ભારે વરસાદની આગાહી હવામાન વિભાગ દ્વારા કરવામાં આવી છે. હાલમાં મધ્ય પૂર્વ અરબી સમુદ્ધમાં લો પ્રેશર આકાર પામી રહ્યું છે. ધીરે ધીરે લો પ્રેશર ઉત્તર-પૂર્વ દિશામાં મહારાષ્ટ્ર તરફ આગળ વધશે. જેના કારણે સૌરાષ્ટ્રના કેટલાક વિસ્તારમાં આગામી સપ્તાહે વરસાદની આગાહી કરવામાં આવી છે. જે બાદમાં 12મી અને 13મી જૂનના રોજ સૌરાષ્ટ્ર-કચ્છના કેટલાક વિસ્તારોમાં ભારે વરસાદ પડી શકે છે. આ સાથે જ માછીમારોને પૂર્વમધ્ય અરબ સાગર તરફ ન જવાની સૂચના આપવામાં આવી છે.