વાયુ વાવાઝોડાનું સંકટ ટળી ગયા બાદ રાજ્યના અનેક જિલ્લામાં આગામી બે દિવસ સુધી મધ્યથી ભારે વરસાદની હવામાન વિભાગે આગાહી કરી હતી. જેને લઇને આજરોજ સવારથી રાજ્યના અનેક જિલ્લામાં વરસાદી માહોલ જોવા મળી રહ્યો છે.
જેમાં સૌરાષ્ટ્રથી લઇને ગુજરાતના કેટલાક જિલ્લામાં સવારથી વરસાદ વરસી રહ્યો છે. વરસાદ પડતાં લોકોએ ગરમીથી રાહત મેળવી છે તો બીજી તરફ ખેડૂતોમાં વાવણી લાયક વરસાદ વરસતાં ખુશીની લહેર જોવા મળી છે.
રાજકોટમાં વહેલી સવારથી શહેરમાં ધીમીધારે વરસાદ
રાજકોટમાં વહેલી સવારથી વરસાદનું આગમન થયુ છે. વાતાવરણમાં અચાનક પલટો આવતાં ઘીમી ઘારે વરસાદની શરૂઆત થઈ છે. જેને લઈને રોજકોટ વાસીઓને ગરમીથી રાહત મળી છે. જ્યારે બીજી તરફ વરસાદની શરૂઆત થતાં ખેડૂતોમાં ખુશીની લહેર જોવા મળી રહી છે.
બનાસકાંઠા જિલ્લામાં વરસાદી માહોલ, વાતાવરણમાં પલટો આવતાં ઠંડક પ્રસરી
બીજી તરફ બનાસકાંઠા જિલ્લામાં વરસાદી માહોલ સર્જાયો છે. પાલનપુર, ડીસા, ધાનેરામાં વરસાદ પડી રહ્યો છે. જેમાં દાંતીવાડામાં પણ ધીમીધારે વરસાદ વરસી રહ્યો છે. જેને લઇ હાલ બનાસકાંઠામાં લોકોને ગરમીમાંથી રાહત મળી છે.
ગીર સોમનાથ પંથકમાં મધ્યરાત્રીથી જ વરસાદ શરૂ
તો આ તરફ ગીર સોમનાથમાં મધ્યરાત્રીથી જ વરસાદનું આગમન થયુ છે. વેરાવળ, તાલાલા,સુત્રાપાડા,કોડીનાર,ઊના,ગીરી સહિતના તમામ વિસ્તારોમાં વરસાદ ખાબકયો છે. આ તમામ વિસ્તારમાં વરસાદનું આગમન થતાં ખેડૂતોમાં ખુશીનો માહોલ જોવા મળી રહ્યો છે. જ્યારે હવામાન વિભાગે હજુ પણ બે દીવસમાં ભારે વરસાદ થાય તેવી આગાહી કરી છે, જેન લઈને ધરતીપુત્રોમાં આનદની લાગણી છવાઈ છે.
અમરેલી શહેર-જિલ્લાના વિસ્તારોમાં વરસાદ
અમરેલી જિલ્લામાં પણ વરસાદી માહોલ છવાયો છે. વહેલી સવારથી જ ધીમીધારે વરસાદ શરૂ થઇ ગયો છે. અમરેલી શહેર અને જિલ્લાના અનેક વિસ્તારોમાં વરસાદ પડતા વાતાવરણમાં ઠંડક પ્રસરી છે. વરસાદી વાતાવરણને લઇને જિલ્લામાં જગતના તાતમાં ખુશીની લહેર જોવા મળી છે.
સુરેન્દ્રનગર પંથકના વાતાવરણમાં પલટો, ઝરમર વરસાદ શરૂ
સુરેન્દ્રનગર પંથકમાં અચાનક વાતાવરણમાં પલટો આવતા આસ-પાસના તમામ વિસ્તારોમાં વરસાદનુ આગમન થયુ છે. વઢવાણ સહિતના વિસ્તારોમાં ઝરમર વરસાદની શરૂઆત થઈ છે. હવામાન વિભાગે આગામી બે દિવસ સુધી ભારેથી અતીભારે વરસાદની આગાહી કરી છે.