તારાજી / બનાસકાંઠાના અંતરિયાળ ગામડાઓની વિકટ પરિસ્થિતિ? માકડા ગામ બેટમાં ફેરવાયું

સરહદી જિલ્લા એવા બનાસકાંઠાના હાલ ફરી એકવાર ગત વર્ષ જેવા જોવા મળી રહ્યા છે. જિલ્લામાં પડેલા ધોધમાર વરસાદને કારણે અનેક ગામડાઓમાં પાણી પાણી થઈ ગયું છે. એટલું પાણી કે રોડ રસ્તા પર કેડ સુધી પાણી આવી ગયા છે. ગામના માર્ગો પરથી જાણે ગંગા-જમુના વહી રહી છે. ગામનો એવો કોઈ ખુણો કે રસ્તો નથી કે જ્યાં પાણીના હોય.

વાવ તાલુકાનું માકડા ગામનામાંથી જાણે નદી વહી રહી હોય તેવા દ્રશ્યો જોવા મળી રહ્યા છે. પાણીના પ્રવાહને કારણે લોકોના જનજીવનને અસર પહોંચી છે. લોકોને પોતાના રોજિંદા કામ કરવા માટે પાણીના પ્રવાહમાં થઈને પસાર થવું પડી રહ્યું છે. ઉપરથી લેવામાં આવેલા આ દ્રશ્યો જોતા તો એવું લાગે કે જાણે ગામ બેટમાં ફેરવાઈ ગયું હોય. વીટીવીની ટીમ સૌથી પહેલા આ ગામમાં પહોંચી હતી અને સ્થિતિનો તાગ મેળવવાનો પ્રયાસ કર્યો હતો.

માડકા ગામમાં લોકોના ઘરોમાં પણ પાણી ફરી વળ્યા છે. જેના કારણે લોકોને ખુબ જ મુશ્કેલીનો સામનો કરવો પડી રહ્યો છે. છેલ્લા 2 દિવસથી પાણી ભરાયેલું હોવાને કારણે લોકોને ઉંચાઈવાળી જગ્યાએ આસરો લેવાનો વારો આવ્યો છે. હાલ અનેક લોકો સુરક્ષિત સ્થળે આસરો લઈ રહ્યા છે. પરંતુ તંત્ર કે સરકાર તરફથી કોઈ જ અધિકારી કે સહાય અહીં પહોંચી નથી. જેના પગલે તંત્ર પર લોકોનો રોષ પણ જોવા મળી રહ્યો છે.