દક્ષિણ ગુજરાત અને મહારાષ્ટ્રમાં થઈ રહેલા ભારે વરસાદના કારણે તાપી જિલ્લાના ઉકાઈ ડેમની જળસપાટીમાં વધારો થઈ રહ્યો છે. મહારાષ્ટ્રના પ્રકાશા ડેમમાંથી દોઢ લાખ ક્યુસેક પાણી છોડવામાં આવી રહ્યું છે. તો હથનુર ડેમમાંથી પણ 70 હજાર ક્યુસેક પાણી છોડવામાં આવી રહ્યું છે. જેથી ઉકાઈ ડેમની જળસપાટીમાં 11 ફૂટનો વધારો થયો છે. ઉકાઈ ડેમની જળસપાટીમાં વધારો થતાં દક્ષિણ ગુજરાતના ખેડૂતોમાં પણ ખુશીનો માહોલ છવાઈ ગયો છે. ડેમની જળસપાટી વધીને 276 ફૂટે પહોંચી છે. ઉકાઈ ડેમની ભયજનક સપાટી 333 ફૂટ છે. હજુ પણ મહારાષ્ટ્ર અને ઉકાઈ ડેમના કેચમેન્ટ એરિયામાં ભારે વરસાદ થાય તો ડેમની જળસપાટીમાં વધારો થઈ શકે છે. અને જો જળસપાટીમાં વધારો થશે તો ડેમના દરવાજા પણ ખોલવામાં આવી શકે છે.