વરસાદ / સુરતમાં મેઘો મહેરબાન: અનેક વિસ્તારમાં પાણી ભરાયા, કીમ નદી બે કાંઠે, બે બાઇક તણાઇ

પરવત ગામ વિસ્તારમાં ભરાયા કેડ સમા પાણી
સુરતના પરવત ગામ પાસે માર્ગ પર ભારે પાણી ભરાઈ ગયા હતા. તો નાના બાળકો પાણીમાં મસ્તી કરતા નજરે પડ્યા હતા. અવિરત વરસી રહેલા વરસાદના કારણે વાહનવ્યવહારને પણ અસર થઈ રહી છે. તો ખેડૂતોમાં ખુશીની લહેર વ્યાપી છે.

વિયર કમ કોઝ વે ઓવરફ્લો થયો
સુરતનો કોઝ વે ઓવરફ્લો થઇ ગયો છે. રાંદેર-સિંગણપોરને જોડતો વિયર કમ કોઝવે ઓવરફ્લો થયો છે. કોઝવેની સપાટી 6.50 મીટર સુધી પહોંચી ગઇ છે. તો તાપી નદીમાં જળસ્તરમાં પણ વધારો નોંધાયો છે.

માંડવીનો કાંકરાપાર ડેમ છલકાયો
સુરતના માંડવી તાલુકાનો કાંકરાપાર ડેમ છલકાઇ ગયો છે. ચાલુ સિઝનમાં પહેલી વખત કાંકરાપાર ડેમ ઓવરફ્લો થયો છે. ઉપરવાસમાં સતત વરસાદથી ડેમમાં નવા નીરની આવક થઇ છે. કાંકરાપાર ડેમની કુલ મહત્તમ સપાટી 160 ફૂટ છે. જ્યારે હાલ કાંકરાપાર ડેમની સપાટી 160.60 ફૂટ પર પહોંચી ગઇ છે.

માંડવી-કીમને જોડતા માર્ગ પર પાણી ભરાયું
સુરતમાં અવિરત વરસાદથી ઠેર ઠેર પાણી ભરાયું છે. માંગરોળના નવાપુરામાં સ્ટેટ હાઇવે પર પાણી ફરી વળ્યું છે. તો માંડવી-કીમને જોડતા માર્ગ પર પણ પાણી ભરાયું છે. મુખ્ય માર્ગ પર પાણી ફરી વળતા માર્ગ તળાવમાં ફેરવાયા છે. ત્યારે વાહન ચાલકોને ભારે મુશ્કેલીનો સામનો કરવો પડી રહ્યો છે.

કીમ નદી બે કાંઠે
સુરતમાં ભારે વરસાદના કારણે કીમ નદી બે કાંઠે વહી રહી છે. ઉપરવાસમાં ભારે વરસાદના પગલે નદીમાં પાણીની સતત આવક થઇ છે. ત્યારે નદીમાં પાણીની આવક થતા નદી કાંઠાના 10 જેટલા ગામોને એલર્ટ કરી દેવાયા છે.  વેલાછા, લીંબાડા, હથોડા, ઓગણીસા અને બોરીદ્રા સહિતના 10 ગામોમાં એલર્ટ જાહેર કરી દેવાયું છે. અને લોકોને સાવચેત રહેવા અપીલ કરી છે.

લાસકાનામાં બે મોટરસાયકલ તણાઈ
સુરતના લાસકાનામાં બે બાઇક તણાઇ ગઇ છે. લાસકાના-ખોલવડ રોડ પર નિર્માણાધિન પુલ પર આ ઘટના બની છે. પુલ પર તાપી નદીના પાણી ફરી વળતા લોકો જીવના જોખમે અવરજવર કરી રહ્યા છે. ત્યારે આ દરમિયાન બે બાઇકો તણાઇ ગઇ હતી.

પરવત પાટિયા વિસ્તારમાં પાણી ભરાયા
સુરતના પરવત પાટિયા વિસ્તારમાં પાણી ભરાઇ ગયા છે. ભારે વરસાદના કારણે નીચાણવાળા વિસ્તારમાં પાણી ભરાયા છે. ભારે વરસાદથી પરવત પાટિયા વિસ્તારમાં આવેલી સરસ્વતી હિંદી સ્કૂલના કેમ્પસમાં પાણી ભરાઇ ગયા છે.

ગ્રામ્ય વિસ્તારમાં ધીમીધારે વરસાદ
સુરતના ગ્રામ્ય વિસ્તારમાં ધીમીધારે વરસાદ પડી રહ્યો છે. સતત ત્રણ દિવસથી ધીમીધારે વરસાદ પડી રહ્યો છે. સુરતના ઓલપાડ, માંગરોળ, કીમ, કોસંબા વિસ્તારમાં વરસાદ શરૂ થઇ ગયો છે.