દક્ષિણ ગુજરાતમાં બીજા દિવસે પણ મેઘરાજાની પધરામણી ખેડૂતોની વાવાણીની તૈયારીઓ...

સુરતઃ આ વર્ષે ગર્મીનો પારો ઉંચે ચઢયા બાદ લોકો વરસાદની આતૂરતાથી રાહ જોઈ રહ્યા છે. દક્ષિણ ગુજરાતમાં મેઘરાજાની પધરામણી થતાં લોકોએ મનમુકીને વરસાદની મજા માણી હતી. જ્યારે તાપી વલસાડ નવસારીના અનેક વિસ્તારોમાં મેઘરાજાની એન્ટ્રી થતાં ખેડૂતોમાં ખુશીની લહેર જોવા મળી હતી.

ત્યારે વલસાડમાં લોકોની આતૂરતાના અંત સાથે મેઘરાજાએ ધમાકેદાર એન્ટ્રી કરી છે. ભારે પવન સાથે વરસાદનું આગમન થયું છે. ત્યારે વાતાવરણ પણ ખુબ અહલાદ્દક લાગી રહ્યું હતું. ગરમી બાદ વરસેલા વરસાદથી લોકોને ઉકરાટ અને ગરમીમાં રાહત મળી હતી.

બીજી તરફ તાપી જિલ્લામાં સતત બીજા દિવસે મેઘાની પધરામણી થતાં ખેડૂતોમાં આનંદ છવાયો હતો. વાવણી લાયક વરસાદ પડતા ખેડૂતોએ વાવણીની તૈયારીઓ શરૂ કરી હતી. તો નવસારીના અનેક વિસ્તારોમાં વરસાદ વરસ્યો હતો. ગરમી બાદ વરસેલા વરસાદથી લોકોને ગરમીમાં રાહત મળી હતી.

નવસારીમાં ભારે પવન સાથે વરસાદ 
નવસારી જીલ્લામાં વહેલી સવારથી વાતાવરણમાં પલટો જોવા મળ્યો હતો. ભારે પવન સાથે ધોધમાર વરસાદ વરસ્યો હતો. નવસારીના અનેક વિસ્તરોમાં પવન સાથે વરસાદ આવતા ગરમીથી લોકોને રાહત મળી હતી. વાવણી લાયક વરસાદ થતા ધરતીપુત્રોમાં આનંદ છવાયો છે. મોડી રાત્રીથી નવસારીમાં 5 મીલીમીટર અને જલાલપોર 6 મીલીમીટર વરસાદ નોધાયો છે.

ડાંગ જિલ્લાના સાપુતારામાં ધોધમાર વરસાદ 
ડાંગ જિલ્લાના સાપુતારામાં છેલ્લા એક કલાકથી ધોધમાર વરસાદ વરસી રહ્યો છે. વાતાવરણમાં ઠંડક પ્રસરી હતી જ્યારે ધરતીપુત્રોમાં ખુશીનો માહોલ છવાયો હતો. ઈદની રજા માણવા આવેલા પ્રવાસીનો આનંદ બેવડાયો હતો.

ખેડૂતોએ વાવણીની તૈયારીઓ શરૂ કરી
મહત્વનું છે કે તાપી અને નવસારી જિલ્લામાં વરસાદ વરસ્યો હતો. ત્યારે સતત બીજા દિવસે મેઘાની પધરામણી થતાં ખેડૂતોમાં ખુશીનો માહોલ છવાયો હતો. અને વાવણી લાયક વરસાદ પડતા ખેડૂતોએ વાવણીની તૈયારીઓ શરૂ કરી દીધી છે.