જામનગરઃ જોડિયા અને ધ્રોલમાં વાતાવરણમાં પલ્ટાયેલું જોવા મળ્યુ હતું. ભારે પવન સાથે સમગ્ર પંથકમાં ભારે વરસાદ થયો હતો. સમગ્ર વિસ્તારમાં અડધાથી એક ઇંચ વરસાદ થયો હતો. જામનગર ગ્રામ્યમાં પણ કેટલાક ગામોમાં વરસાદ વરસ્યો.
દ્વારકાના જામ રાવલ ગામે અસહ્ય તડકા બાદ વરસાદી ઝાપટાં
દ્વારકાના જામ રાવલ ગામે પવન સાથે વરસાદ ઝાંપટા પડ્યા હતાં. અસહ્ય તડકા બાદ વાતવરણમાં પલ્ટાયુ હતું. ભારે પવન સાથે સમગ્ર વિસ્તારમાં વરસાદી ઝાપટાં પણ પડ્યા હતાં.
વાપી સહિતના આસપાસના વિસ્તારમાં ભારે વરસાદ
વલસાડ જિલ્લામાં આજે સતત ત્રીજા દિવસે વાતાવરણમાં પલટો જોવા મળ્યો હતો. સાંજે વાપી અને આસપાસના વિસ્તારમાં ઝડપી પવન સાથે ધોધમાર વરસાદ તૂટી પડ્યો હતો. ઝડપી પવનને કારણે રસ્તાઓ પર ધૂળની ડમરીઓ ઉડી હતી. જેને કારણે વાપી પંથકમાં મીની વાવાઝોડા જેવો માહોલ સર્જાયો હતો. વાપી સહિત જિલ્લાના ઉમરગામ પારડી અને કપરાડા તાલુકામાં પણ તોફાની વરસાદ વરસ્યો હતો.
આમ વાવાઝોડા જેવા માહોલમાં છેલ્લા ત્રણ દિવસથી જિલ્લામાં ભારે વરસાદને કારણે જિલ્લાના મુખ્ય પાક ડાંગરને અસર થઈ રહી છે. ઝડપી પવનને કારણે તૈયાર થવાની અણી પર આવીને ઉભેલો ડાંગરનો પાક આડો પડી જાય છે. જેને કારણે પાકને નુકસાન થાય છે. આજે પણ ઝડપી પવન સાથે તોફાની વરસાદને કારણે કેટલીક જગ્યાએ તોતિંગ ઝાડ પણ પડી જવાના બનાવો બન્યા હતા. વાપીમાં તોફાની વરસાદ અને તોફાની વાતાવરણને કારણે કેટલાક વિસ્તારોમાં વીજ પ્રવાહ પણ ખોરવાયો હતો. જોકે વરસાદને કારણે વાતાવરણમાં ઠંડક પ્રસરતા લોકોએ ગરમી અને બફારાથી રાહત અનુભવી હતી.
અમદાવાદ: વરસાદની હવામાન વિભાગ દ્વારા આગાહી
અમદાવાદમાં વરસાદની આગાહી હવામાન વિભાગ દ્વારા કરવામાં આવી છે. આગામી 4-5 દિવસમાં સૌરાષ્ટ્રના કેટલાક વિસ્તારમાં વરસાદ પડી શકે છે. દક્ષિણ-પશ્ચિમ અરબ સાગરમાં લો-પ્રેશર બની રહ્યુ છે. લો પ્રેશરને કારણે ચક્રવાત બને તેવી શક્યતા સર્જાઇ છે. ચક્રવાત ઓમાન તરફ જવાની સંભાવના છે.