ચોમાસું / રાજ્યમાં સાર્વત્રિક મેઘમહેર, સિઝનનો 90 ટકા વરસાદ નોંધાયો

સાબરકાંઠા:

સાબરકાંઠામાં ધોધમાર વરસાદ પડતા તલોદના મુવાડા અને અદાપુર ગામ સંપર્ક વિહોણુ બન્યુ છે. ઉપરવાસમાં ભારે વરસાદને પગલે લૂઈ નદી બે કાંઠે વહેતી થતા 5થી વધુ ગામને જોડતો અને તલોદ જતો માર્ગ બંધ કરી દેવામાં આવ્યો છે. સ્થાનિકોને અવર જવરમાં ભારે મુશ્કેલીનો સામનો કરવાનો વારો આવ્યો છે. તો ઉપરવાસમાં ભારે વરસાદના કારણે  સુરપુરનુ તળાવ ઓવરફ્લો થયું છે. જેઠાજીના મુવાડાથી સુરપુર જવાનો રસ્તો પાણીમાં ગકરાવ થતા રસ્તો બંધ કરવામાં આવ્યો છે. ત્યારે રસ્તો બંધ કરવામાં આવતા તલોદ તાલુકાનુ સુરપુર ગામ સંપર્ક વિહોણુ બન્યું છે.

અરવલ્લી:

જ્યારે ભારે વરસાદને કારણે અરવલ્લી જિલ્લાના તમામ ડેમં પાણીની આવકમાં વધારો થઈ રહ્યો છે. ભારે વરસાદને કારણે ડેમોમાં પાણીની આવક વધી રહી છે. વાત્રક ડેમમાં 6 હજાર 420 ક્યુસેક પાણીની આવક થઈ છે. તો બાજી બાજુ વાત્રક નદી બે કાંઠે થતા અનેક કોઝવે પાણીમાં ગરકાવ થયા છે. માજુમમાં 900 અને મેશ્વોમાં 200 ક્યૂસેક પાણીની આવક થઈ રહી છે. લાંક ડેમમાં 800 ક્યુસેક પાણીની આવક થઈ છે. તો અરવલ્લીમાં ધોધમાર વરસાદને લઈને બાયડ પાસે આવેલું કેશરપુરા તળાવ ઓવરફલો થયું છે. તળાવ ઓવરફલો થતા વાત્રક નદીમાં પાણીની આવકમાં વધારો થયો છે. પાણીની આવકમાં વધારો થતા પાણી વાત્રક નદીમાં છોડવામાં આવ્યું છે. જેને લઈને નદીના પાણીમાં આવક વધતા બાયડના ગાબટ અને રૂપનગરને જોડતા કોઝવે પર પાણી ફરી વળ્યું છે. જેને લઈને પાંચ ગામોના વાહનવ્યવહાર ખોરવાયો છે.

પાટણ:

પાટણમાં લાબા વિરામ બાદ ફરી એકવાર મેધરાજા મનમુકીને વરસી રહ્યા છે. ત્યારે અત્યાર સુધી પાટણમાં 37 એમએમ, સિદ્ધપુરમાં ૩૭ એમએમ, ચાણસ્મામાં ૩૪ એમએમ, હારીજ ૩૮ એમએમ, સમી ૨૩ એમએમ, સંખેશ્વર ૧૨ એમએમ, રાધનપુર ૬૦ એમએમ, સાંતલપુર ૩૨ એમએમ, અત્યાર સુધી નોંધાવા પામ્યો છે. 

સુરત:

સુરત શહેરમાં મોડી રાત્રે વરસાદ શરૂ થઇ ગયો છે. મોડીરાત્રે ધોધમાર વરસાદ બાદ વહેલી સવારથી ઝરમર વરસાદ શરૂ થઇ ગયો છે. સુરતના નાનપુરા, અઠવા લાઈન, ચોક બજાર વિસ્તારમાં વરસાદ પડ્યો છે. ઉપરાંત અડાજણ, રાંદેર, વરાછા, લિંબાયત, પર્વતપાટિયા વિસ્તારમાં વરસાદ પડ્યો છે. ઉધના, ઘોડાદરા, પૂણા વિસ્તારમાં વરસાદ શરૂ થઇ ગયો છે. તો સિવિલ હોસ્પિટલ, રિંગરોડ, સલાબતપુરા વિસ્તારમાં પણ વરસાદ ચાલું છે.

મહીસાગર:

મહિસાગરમાં મેઘરાજા મનમુકીને વરસી રહ્યાં છે. ત્યારે ભારે વરસાદને કારણે નદીઓમાં નવા નીર આવ્યાં છે. લાવેરી નદી બે કાઠે વહી રહી છે. ત્યારે ભારે વરસાદને કારણે વીરપુર નગરના લાવેરી બ્રિજને અડીને નદીનું પાણી જઈ રહ્યું છે. મહેમુદપુરા વિસ્તારમાં આવેલ દરિયાઈ દુલ્હા દરગાહ પાણીમાં ડૂબી છે. તો મહીસાગરના કડાણા ડેમમાં પાણીની ધરખમ આવક થઈ રહી છે. ઉપરવાસમાંથી ડેમમાં પાણીની સતત આવક થતા કડાણાના ડેમના 8 દરવાજા ખોલી 1 લાખ 50 હજાર ક્યુસેક પાણી છોડવામાં આવી રહ્યું છે. ડેમના 7 ગેટ 10 ફૂટ સુધી ખોલવામાં આવ્યાં છે. ઉપમહી નદી પર આવેલ બે પુલ હજુ પણ પાણીમાં ગરકાવ છે. તો મહીસાગરમાં વીરપુર તાલુકાના ભાટપુર ગામમાં તળાવ ફાટ્યું છે. ભાટપુરમાં મોતીપુરા પરાના ઉપરવાસમાં આવેલું તળાવ ફાટ્યું છે. જેના કારણે ગામના ખેતરો અને નીચાણવાળા વિસ્તારના ખેતરોમાં પાણી ફરી વળ્યા છે. ખેતરોમાં પાણી ફરી વળતા ઉભા પાકને મોટા પ્રમાણમાં નુકસાન પહોંચ્યું છે. ત્યારે ટીડીઓ, મામલતદાર સહિતના મોટા અધિકારીઓ ઘટના સ્થળે પહોંચ્યા છે.

વડોદરા:

વડોદરામાં મેઘરાજા મનમુકીને વરસી રહ્યાં છે. છેલ્લા 24 કલાકમાં 2.5 ઈંચ વરસાદ નોધાયો છે. વરસાદને પગલે આજવા ડેમની જળસપાટીમાં સતત વધારો થયો છે. આજવા ડેમની સપાટી 212.40 ફૂટે પહોચીં છે. વિશ્વામિત્રી નદીની સપાટીમાં પણ વધારો થતા 14.75 ફૂટ પહોંચી છે. વડોદરા પાલિકા તંત્રએ લોકોને જાણકારી આપી છે. જો વિશ્વામિત્રી નદીની સપાટી 24 ફુટ થાય તો નીચાણવાળા વિસ્તાર ખાલી કરવામાં આવશે. વડોદરાની દેવ નદીમાં કાર તણાઇ જવાની ઘટના સામે આવી હતી. ત્યારે ઘટનાના બીજા દિવસે પણ NDRFની ટીમ દ્વારા કારચાલકની શોધખોળ કરવામાં આવી રહી છે. વાઘોડિયા પાસેથી મંગળવારે કારચાલક નદીમાં ડૂબ્યો હતો. ત્યારે હાલ દેવ નદીની જળસપાટીમાં ઘટાડો થતા NDRFના જવાનો દ્વારા 2 કિલોમીટર સુધી શોધખોળ કરવામાં આવી રહી છે.

કચ્છ:

કચ્છમાં વિરામ બાદ ફરી એકવાર મેઘરાજા મનમુકીને વરસી રહ્યાં છે. અબડાસા તાલુકામાં ધોધમાર વરસાદ પડ્યો છે. ખત્રાણા, મોટી વિરાણી, દેવીસર, રવાપરમાં ધોધમાર વરસાદ પડતા નદીઓમાં નવા નીર આવ્યાં છે. તો ભારે વરસાદને કારણે પાણી રસ્તાઓ પર ફરી વળ્યાં છે.

રાજકોટ:

રાજકોટમાં લાબા વિરામા બાદ ફરી એકવાક વરસાદનું આગમન થયું છે. આજે વહેલી સવારથી શહેરના યાજ્ઞિક રોડ, મવડી, કાલાવડ રોડ સહીતના વિસ્તારમો મેઘરાજા મનમુકીને વરસી રહ્યાં છે.

પંચમહાલ:

પંચમહાલના પાનમ ડેમની જળસપાટીમાં વધારો થયો છે. ઉપરવાસમાં વરસાદી પાણીની આવક થતા પાનમ ડેમની જળસપાટી વધી છે. જેના કારણે હાલ પાનમડેમના 4 દરવાજા 5 ફૂટ સુધી ખોલી દેવાયા છે. પાનમ ડેમમાં 2 લાખ 2 હજાર 442 ક્યુસેક પાણીની આવક થઇ છે. હાલ પાનમ ડેમની જળસપાટી 127.25 મીટરે પહોંચી ગઇ છે. ત્યારે રુલ લેવલ પસાર કરતા ડેમમાંથી પાણી છોડવામાં આવી રહ્યું છે.

અત્યાર સુધીમાં સિઝનનો 90.02 ટકા વરસાદ નોંધાયો:

ગુજરાતમાં અત્યાર સુધીમાં સિઝનનો 90.02 ટકા વરસાદ નોંધાયો છે. રાજ્યમાં સરેરાશ વરસાદ 29.20 ઇંચ પડ્યો છે. જ્યારે દક્ષિણ ગુજરાત, કચ્છમાં 100% થી વધુ વરસાદ વરસ્યો છે. તો ડાંગ જિલ્લામાં સૌથી વધું 91.41 ઈંચ વરસાદ ખાબક્યો છે. રાજ્યના 51 તાલુકામાં 39.37 ઈંચ વરસાદ નોંધાયો છે. ત્યારે સારો વરસાદ પડતા ખેડૂતોને હવે સિંચાઇના પાણીની મુશ્કેલી નહીં નડે તેવી આશા છે.

હવામાન વિભાગની આગાહી:

ગુજરાતમાં હજુ પણ ભારેથી અતિભારે વરસાદ થઈ શકે છે. હવામાન વિભાગનું માનીએ તો 29 ઓગસ્ટ બાદ રાજ્યમાં ભારે વરસાદ આવી શકે છે. ગુજરાતમાં વધુ એક સિસ્ટમ સક્રીય થશે. લો પ્રેશર સિસ્ટમ સક્રીય થવાથી ગુજરાતના દક્ષિણ-મધ્ય ગુજરાતમાં અને સૌરાષ્ટ્રમાં ભારે વરસાદ થઈ શકે છે.