ભાવનગરમાં ગઇકાલ મોડી રાત્રીથી વીજળીના કડાકા સાથે ધોધમાર વરસાદનું આગમન થયું હતું. વરસાદના પગલે શહેરના કેટલાક વિસ્તારોમાં વિજળી ગુલ થઇ ગઇ હતી. ભાવનગર જિલ્લાના અનેક વિસ્તારમાં મેઘરાજા મહેરબાન થયા હતા. જ્યારે વરસાદના પગલે ખેડૂતોમાં હર્ષની લાગણી પ્રસરી છે.
મહુવા પંથકમાં વરસાદ, ખેડૂતો હરખાયા
ભાવનગર શહેર સહિત જિલ્લાના મહુવા પંથકમાં પણ ભારે વરસાદ વરસ્યો હતો. બીજા દિવસે પણ વરસાદી માહોલ જોવા મળ્યો છે. મહુવાના બગદાણા, ખૂટવડા, કરમદીયામાં વરસાદ થયો હતો. આ વરસાદથી ખેડૂતોને સારો પાક થવાની આશા બંધાઇ છે.
ગારિયાધાર-પરવડી વિસ્તારમાં વહેલી સવારથી ધોધમાર વરસાદ વરસ્યો હતો. જેના કારણે રસ્તા પર પાણી ભરાઇ ગયા છે. ચેકડેમમાં નવા નીરની આવક થઇ છે. જેના કારણે ચેકડેમના પાણી ગામમાં ઘૂસી ગયા છે.
સુરેન્દ્રનગરના અનેક વિસ્તારોમાં વરસાદ
સુરેન્દ્રનગરના ચોટીલા સહીત આસપાસના ગામોમાં વરસાદ થયો છે. લાંબા વિરામ બાદ વરસાદ વરસતા ખેડુતોમાં આનંદ થયો છે. વરસાદના આગમનથી ખેડૂતોના પાકને જીવંતદાન મળ્યું છે.