મેઘાની મહેર / ગુજરાતમાં સૌરાષ્ટ્ર સહિત 96 તાલુકામાં મેઘરાજની મહેર, જાણો કયાં પંથકમાં કેટલા ઈંચ વરસાદ નોંધાયો

• ગુજરાતમાં સાર્વત્રિક મેઘ મહેરની શરૂઆત
• સવારે મધ્ય ગુજરાત, દક્ષિણ ગુજરાતમાં વરસાદ
• સૌરાષ્ટ્રના રાજકોટ, અમરેલી, જામનગરમાં ભારે વરસાદ

ગુજરાતમાં ચોમાસુ બેસી ગયું હોય તેવી રીતે સવારે મધ્ય ગુજરાત, દક્ષિણ ગુજરાત અને બપોર પછી સૌરાષ્ટ્રના પંથકમાં વરસાદ વરસ્યો હતો. સૌરાષ્ટ્રમાં અમરેલીના બાબરા શહેર-ગ્રામ્યમાં ધોધમાર વરસાદ વરસ્યો હતો. જ્યાં ગમા, પીપરિયા, લુણકી, ચમારડી ગામે વરસાદ હતો. તો સાથે મોટા લીલીયાની નાવલી નદીમાં પૂર આવ્યું હતું. તો સૌરાષ્ટ્રના દરિયા નજીકના જિલ્લાઓમાં જામનગરના કાલાવાડ પંથકમાં મેઘરાજાની ધમાકેદાર એન્ટ્રી થઈ છે. જામનગરમાં જોરદાર પવન સાથે વરસાદ વરસ્યો હતો. જાહેર માર્ગો પર પાણી ફરી વળ્યાં હતા. વરસાદ પડતા વાતાવરણમાં ઠંડક પ્રસરી હતી. જગતનો તાત પણ ખુશખુશાલ જોવા મળ્યો હતો. 

• આજે રાજ્યના 96 તાલુકામાં વરસ્યો વરસાદ
• સૌથી વધુ વલસાડમાં 3.5 ઈંચ વરસાદ નોંધાયા
• ગણદેવીમાં 3.5 ઈંચ, પારડીમાં 2.5 ઈંચ વરસાદ
• ભાવનગરમાં 2 ઈંચ, ઉમરાળામાં 2 ઈંચ વરસાદ
• નવસારીમાં 2 ઈંચ, જલાલપોરમાં 2 ઈંચ વરસાદ
• કાલાવાડમાં 2 ઈંચ, વલ્લભીપુરમાં 2 ઈંચ વરસાદ
• પાદરામાં 2 ઈંચ, તારાપુરમાં દોઢ ઈંચ વરસાદ
• ખેરગામમાં દોઢ ઈંચ, વડોદરામાં દોઢ ઈંચ વરસાદ
• ઉમરગામમાં દોઢ ઈંચ, વાપીમાં સવા ઈંચ વરસાદ
• ચોર્યાસીમાં 1 ઈંચ, લોધિકામાં 1 ઈંચ વરસાદ
• બાવળામાં 1 ઈંચ, બાબરામાં 1 ઈંચ વરસાદ
• સુરત શહેરમાં 1 ઈંચ, ગાંધીનગરમાં 1 ઈંચ વરસાદ

તો આ તરફ ભાવનગરમાં સાંજ બાદથી વરસાદી માહોલ જોવા મળ્યો હતો. પવન સાથે ધોધામાર વરસાદથી પાણી ભરાયા હતા. વરસાદ બાદ શહેરના કેટલાક વિસ્તારમાં પાણી ભરાયા હતા. આતાભાઈ ચોક વિસ્તારમાં ટ્રાન્સફોર્મરમાં કડાકા ભડાકા થયા હતા. 

ચોમાસાની શરૂઆત થતાની સાથે જ અમદાવાદ ભુવા નગરી બની રહ્યું છે. હજી તો વરસાદની શરૂઆત જ થઇ છે ત્યાં ઠેરઠેર પાણી તો કેટલાક વિસ્તરોમાં ભુવા પડી રહ્યાં છે.ત્યારે શહેરના સેટેલાઇટ વિસ્તારમાં ભાવ પુષ્પ સોસાયટી પાસે મસમોટો ભુવો પડતા લોકોમાં ભય જોવા મળી રહ્યો છે. સ્થાનિકોનો આરોપ છે કે તંત્રને વારંવાર રજૂઆત છતાં કોઈ કામગીરી કરાઇ નથી. ભૂવાનું પૂરણકામ જનતાએ સ્વખર્ચે કરવું પડતું હોવાનું સ્થાનિકો જણાવી રહ્યાં છે.

અસહ્ય ગરમી અને બફારા બાદ આજે સતત બીજા દિવસે પણ અમદાવાદમાં વરસાદ થયો છે. જે પ્રકારે હવામાન વિભાગે આગાહી આપી હતી એ જ મુજબ દક્ષિણ ગુજરાત બાદ મધ્ય ગુજરાત અને ઉત્તર ગુજરાતના વિસ્તારમાં પણ વરસાદની શરૂઆત થઇ ચૂકી છે. અમદાવાદમાં ગઇકાલ રાત્રે પણ વરસાદ ખાબક્યો હતો અને આજે સમગ્ર દિવસ દરમિયાન ગરમી અને બફારા બાદ વાતાવરણમાં એકાએક પલટો આવ્યો અને પલટા બાદ વરસાદની શરૂઆત થઇ છે. વરસાદ થતાની સાથે જ નાના બાળકો વરસાદમાં મજા માણતા જોવા મળ્યા હતાં.

વાસણા બેરેજના દરવાજા ખોલાયા

અમદાવાદમાં વરસાદના કારણે વાસણા બેરેજના ગેટ ખોલાયા છે.  AMC દ્વારા વાસણા બેરેજના 4 ગેટ ખોલવામાં આવ્યા હતા. નીચાણવાળા વિસ્તારોમાં પાણી ન ભરાય તે માટે ગેટ ખોલાયા છે. રાતે ભારે વરસાદ આગાહીને કારણે તંત્ર એલર્ટ બન્યું છે.