હવામાન / છત્રી-રેઈનકોટ લઈને નિકળજો! આજે ગુજરાતના આ જિલ્લાઓમાં વરસાદની આગાહી

• વરસાદને લઈ હવામાન વિભાગની આગાહી
• આજથી રાજ્યમાં વરસાદનું જોર વધવાની સંભાવના
• આજે 18 જિલ્લાઓમાં વરસાદની આગાહી

હવામાન વિભાગના જણાવ્યા મુજબ, બંગાળની ખાડીમાં વેસ્ટ સેન્ટ્રલ દિશામાં સર્જાયેલા લો પ્રેશરની અસરના ભાગરૂપે ગુજરાત સહિત દેશના અનેક રાજ્યોમાં વરસાદનો વધુ એક રાઉન્ડ શરૂ થઈ ગયો છે.  આગામી તારીખ 13 સુધી તોફાની પવન અને મેઘગર્જના સાથે વરસાદની શક્યતા છે.

આ જિલ્લાઓમાં વરસી શકે છે વરસાદ

એમાંય આજની આગાહી કરતા હવામાન વિભાગે જણાવ્યું છે કે,  આજે રાજ્યના 18 જિલ્લાઓમાં વરસાદ વરસી શકે છે. જેમાં કચ્છ, પોરબંદર, જૂનાગઢ, ગીર સોમનાથ, અમરેલી, વલસાડ,  ભાવનગર, આણંદ, દાહોદ, પંચમહાલ, વડોદરા, ડાંગ, છોટા ઉદેપુર, ભરૂચ, નર્મદા, સુરત, તાપી, નવસારીમાં વરસાદની થવાની સંભાવના છે. 

હવામાન વિભાગ દ્વારા વરસાદની આગાહી કરવામાં આવતા ગણેશ મંડળોમાં ચિંતાનું મોજુ ફરી વળ્યું છે. કારણ કે આજે ગણેશ વિસર્જન છે. ત્યારે બાપ્પાનો ધામધૂમ પૂર્વક વિસર્જન કાર્યક્રમ યોજાય તેવું સૌ કોઈ ઈચ્છી રહ્યા છે, તેવામાં વરસાદ વિઘ્ન ઊભું ન કરે તે માટે વિધ્નહર્તાને પ્રાર્થના કરવામાં આવી રહી છે. 

24 કલાકમાં 117 તાલુકામાં વરસાદ

અત્રે ઉલ્લેખનીય છે કે, લાંભા વિરામ બાદ ફરીથી ગુજરાતમાં વરસાદી માહોલ જામ્યો છે. ગતરોજ મોટાભાગના જિલ્લાઓમાં ગાજવીજ સાથે વરસાદ વરસ્યો છે. છેલ્લા 24 કલાકમાં રાજ્યના 117 તાલુકામાં વરસાદ ખાબક્યો છે. જેમાં સૌથી વધુ પારડીમાં સવા 4 ઈંચ વરસાદ પડ્યો છે. જ્યારે વાપીમાં સવા 4 ઈંચ, કપરાડામાં 4 ઈંચ, ઉમરગામમાં 2.5 ઈંચ, ગણદેવીમાં 2.5 ઈંચ, અંકલેશ્વરમાં પોણા 2 ઈંચ, ઉમરપાડામાં 1.5 ઈંચ, ચિખલીમાં 1.5 ઈંચ, ડેડિયાપાડામાં 1.5 ઈંચ વરસાદ ખાબક્યો છે. લાંબા વિરામ બાદ વરસાદ ખાબકતા લોકોને ગરમી અને ઉકળાટભર્યા વાતાવરણથી રાહત મળી છે.