હવામાન / અમદાવાદ સહિત સમગ્ર ગુજરાતમાં વરસાદ, જાણો ક્યાં કેટલો વરસાદ?

અમદાવાદમાં ધીમી ધારે ઝરમર-ઝરમર વરસાદ:

અમદાવાદના જમાલપુર, વેજલપુર, બોડકદેવ, મેમનગર, થલતેજ, નારોલ, વાસણા, પાલડી, નવરંગપુરા, શિવરંજની સહિતના મોટાભાગના તમામ વિસ્તારમાં ધીમી ધારે વરસાદ પડ્યો છે. પ્રથમ વરસાદ આવતા જ અનેક વિસ્તારોમાં પાણી ભરાયા હતા. સાથે જ અનેક વિસ્તારમાં ટ્રાફિક જામના પણ દ્રશ્યો સર્જાયા હતા. 

મહેસાણામાં મેઘ પધરામણી:

મહેસાણામાં પણ અચાનક વાતાવરણમાં પ્લટો આવ્યો છે અને ધીમી ધારે વરસાદનું આગમન થયું છે. વરસાદ પડતા વાતાવરણમાં ઠંડક પ્રસરી છે અને લોકોએ ગરમીમાંથી રાહત મેળવી છે. ગરમીથી ત્રાહીમામ પોકારી ઉઠેલા લોકોના હૈયા સિઝનના પહેલા વરસાદથી હરખથી છલકાઈ રહ્યા છે. 

ગાંધીનગરમાં ગાજવીજ સાથે વરસાદ: 

ગાંધીનગરમાં પણ ગાજવીજ સાથે વરસાદ પડી રહ્યો છે.  શહેરના મોટાભાગના પંથકમાં ગાજવીજ અને પવન સાથે ધીમીધારે વરસાદ શરૂ થયો છે. વરસાદને કારણે વાતાવરણમાં ઠંડક પ્રસરી છે. જ્યારે શહેરીજનોમાં મોસમના પહેલા વરસાદને જોઇને આનંદની લાગણી છવાઇ છે.

સાબરકાંઠા જિલ્લામાં ધમાકેદાર વરસાદ એન્ટ્રી:

આગ વરસાવતી ગરમી વચ્ચો સાબરકાંઠા જીલ્લાના કેટલાક વિસ્તારમાં ધોધમાર વરસાદ વરસ્યો છે. મોસમનો પ્રથમ વરસાદ આવતાં ખેડૂતોમાં ખુશીનો માહોલ છવાયો છે, તો દિવસભર બફારા વચ્ચે વાતવરણમાં ઠંડક પ્રસરી છે.

કપડવંજમાં પણ વરસાદનું આગમન:

આ તરફ ખેડાના કપડવંજમાં પણ વરસાદનું આગમન થયું છે. વહેલી સવારથી કપડવંજમાં ભારે પવન સાથે ધોધમાર વરસાદ વરસી રહ્યો છે. વરસાદ આવતા લોકોને ગરમીથી રાહત મળી છે.

સુરતમા ધોધમાર વરસાદ:

તો દક્ષિણ ગુજરાતમાં પણ વરસાદ વરસી રહ્યો છે. સુરતમાં ધોધમાર વરસાદની શરૂઆત થઈ છે. અડાજણ, રાંદેર, પારલે પોઇન્ટ સહીતના વિસ્તારોમાં વરસાદ આગમન થયું છે. ભારે પવન સાથે વરસાદનુ આગમન થતા વાતાવરણમાં ઠંડક પ્રસરી છે.

વલસાડ જિલ્લામાં હળવો વરસાદ:

વલસાડ જિલ્લાના વાતાવરણમાં પલટો આવ્યો છે. વલસાડ અને આસપાસના વિસ્તારમાં હળવો વરસાદ પડી રહ્યો છે. ત્યારે વરસાદ પડતા વાતાવરણમાં ઠંડક પ્રસરી છે અને લોકોને ગરમી અને બફારાથી રાહત મળી છે.

સોરાષ્ટ્રના અનેક વિસ્તારોમાં ધોધમાર વરસાદ:

વાયુ વાવાઝોડાને લઈને રાજ્યના અનેક વિસ્તારોમાં વરસાદ પડ્યો છે. ત્યારે આજે પણ જૂનાગઢ, પોરબંદર, ભાવનગર, ગીર-સોમનાથ, અમરેલી, ઉના અને દિવના કેટલાક વિસ્તારોમાં વરસાદ પડ્યો છે. જૂનાગઢ જિલ્લામાં વહેલી સવારથી અત્યાર સુધીમાં 5 ઈંચ જેટલો વરસાદ પડ્યો છે. તો બીજી તરફ પોરબંદરમાં ધીમીધારે વરસાદ પડી રહ્યો છે. છેલ્લા 3 દિવસથી પોરબંદરમાં વરસાદ પડી રહ્યો છે. આ ઉપરાંત ભાવનગરમાં ધોધમાર વરસાદ પડ્યો છે. ત્યારે વરસાદના વિરામ બાદ ખેડૂતો વાવણીની કામગીરી શરૂ કરશે.