સૌરાષ્ટ્રમાં જાણીતા લોકગાયકોના ડાયરામાં જયેશ રાદડિયા પર થયો નોટોનો વરસાદ.. તો કાર્યક્રમમાં લલતિ વસોયા પણ જોવા મળ્યા.
જામકંડોરણામાં ભાગવત કથામાં રૂપિયાનો વરસાદ
જયેશ રાદડિયા પર થયો રૂપિયાનો વરસાદ
લલિત વસોયા- રાદડિયા જોવા મળ્યા એકસાથે
ગુજરાત વિધાનસભાની ચૂંટણી નજીક આવતા નેતાઓ જાહેર કાર્યક્રમમાં હાજરી આપવાનું ચૂકતા નથી. પછી તે રામકથા હોય કે ડાયરો. ધાર્મિક કાર્યક્રમોમાં વિપક્ષ અને શાસક પક્ષના નેતાઓ એકસાથે નજરે પડી રહ્યા છે. તેમાં પણ સૌરાષ્ટ્રમાં તો લોકડાયરા અને ભાગવત સપ્તાહના કાર્યક્રમો વધી રહ્યા છે. ત્યારે સૌરાષ્ટ્રમાં આયોજિત એક લોકડાયરાનો વીડિયો સામે આવ્યો છે.
લોકડાયરામાં રૂપિયાનો વરસાદ
રાજકોટના જામકંડોરણામાં પાંજરાપોળ ખાતે શ્રીમદ્ ભાગવત સપ્તાહ ચાલી રહ્યુ છે. સપ્તાહના ચોથા દિવસે જયેશ રાદડિયા ઉપસ્થિત રહ્યા હતા. સાંજે લોકડાયરાનું આયોજન કરવામાં આવ્યું હતું. સૌરાષ્ટ્રમાં લોકડાયરાની રમઝટ બોલાય એટલે પૈસાનો વરસાદ થયા વિના રહે જ નહી. જયેશ રાદડિયા પર રૂપિયાનો વરસાદ કરવામાં આવ્યો હતો. રાજકીય-સામાજિક આગેવાનોએ જયેશ રાદડિયા ઉપર રૂપિયાનો વરસાદ કર્યો હતો. કીર્તિદાન ગઢવી, ફરીદા મીર, ગીતા રબારીએ ડાયરામાં રમઝટ બોલાવતા હાજર શ્રોતાઓ મનમૂકીને ઝૂમી ઉઠ્યા હતા.
લલિત વસોયા- જયેશ રાદડિયા જોવા મળ્યા એકસાથે
જો કે આ કાર્યક્રમમાં ઉડીને આંખે વળગે તેવી વાત એ હતી કે અહીં પણ વિરોધ પક્ષ અને શાસક પક્ષના નેતા એકસાથે જોવા મળ્યા. સૌરાષ્ટ્રના ડાયરામાં લલિત વસોયા અને જયેશ રાદડિયા એક સાથે જોવા મળ્યા હતા. અહીં બન્ને નેતાઓ એક બીજાને ગળે મળ્યા હતા. જેને લઇ લોકોએ વસોયા અને રાદડિયા પર રૂપિયાનો વરસાદ કર્યો હતો. ઉલ્લેખનીય છે કે, ચૂંટણી પહેલાં સૌરાષ્ટ્રના ડાયરામાં વધારો થયો છે. આ ડાયરામાં અલગ-અલગ રાજકીય પાર્ટીના નેતાઓ એક સાથે જોવા મળી રહ્યા છે.
મુખ્ય પ્રવેશદ્વારનું ભાજપ પ્રમુખના હસ્તે લોકાર્પણ
જામકંડોરણા ખાતે ભાગવત સપ્તાહ ચાલી રહી છે...કલ્પેશભાઈ રાદડિયા ગૌવંશ પાંજરાપોળ અને ગૌશાળા દ્વારા આયોજીત ભાગવત સપ્તાહના ચોથા દિવસે વિવિધ કાર્યક્રમો યોજાયા હતા...જામકંડોરણા શહેરના મુખ્ય પ્રવેશદ્વારનું ગુજરાત ભાજપ પ્રમુખ પાટીલના હસ્તે લોકાર્પણ કરાયું હતુ તથા ગૌશાળામાં સ્વ.શ્રી વિઠ્ઠલભાઈ રાદડિયાની પ્રતિમાનું અનાવરણ પણ કરવામાં આવ્યું હતુ...