દેશનાં મોટાભાગનાં રાજ્યોમાં કાળઝાળ ગરમીની શરૂઆત થઈ ગઈ છે. કેટલાંક રાજ્યોમાં તો તાપમાન ૩૫થી ૩૭ ડિગ્રી વચ્ચે પહોંચી ગયું છે.
વધતી જતી કાળઝાળ ગરમી વચ્ચે વરસાદ અને હિમવર્ષાનું એલર્ટ
સાતથી વધુ રાજ્યમાં ગરમીનો પારો ૩૫થી ૩૭ ડિગ્રી સુધી પહોચ્યો
દેશનાં મોટાભાગનાં રાજ્યોમાં કાળઝાળ ગરમીની શરૂઆત થઈ ગઈ
દેશભરમાં આજકાલ વિચિત્ર હવામાન જોવા મળી રહ્યું છે. કેટલાક સ્થળોએ કાળઝાળ ગરમી પડી રહી છે તો કેટલાંક રાજ્યોમાં ભારે વરસાદ અને હિમવર્ષાનું એલર્ટ હવામાન વિભાગ દ્વારા જારી કરવામાં આવ્યું છે. દેશનાં મોટાભાગનાં રાજ્યોમાં કાળઝાળ ગરમીની શરૂઆત થઈ ગઈ છે. કેટલાંક રાજ્યોમાં તો તાપમાન ૩૫થી ૩૭ ડિગ્રી વચ્ચે પહોંચી ગયું છે. ઉત્તરથી દક્ષિણ સુધી કેટલાંય રાજ્યોમાં તાપમાનનો પારો હવે ૩૭ ડિગ્રી સેલ્સિયસને વટાવતો નજરે પડી રહ્યો છે. સાતથી વધુ રાજ્યોમાં તાપમાનનો પારો ૩૫થી ૩૭ ડિગ્રી સુધી પહોચ્યો
દક્ષિણ-પશ્ચિમ મધ્યપ્રદેશ, મહારાષ્ટ્ર, કેરળ, તામિલનાડુ, તેલંગાણા સહિતના સાતથી વધુ રાજ્યોમાં તાપમાનનો પારો ૩૫થી ૩૭ ડિગ્રી સુધી પહોંચી જતા લોકો ત્રાહિમામ થઈ ગયા છે. ભારતીય હવામાન વિભાગના જણાવ્યા અનુસાર, સમગ્ર દેશમાં તાપમાન સામાન્યથી પાંચ ડિગ્રી વધુ છે. પંજાબ, હરિયાણા, રાજસ્થાન, ઉત્તરપ્રદેશ અને ગુજરાતના કેટલાક ભાગોમાં મહત્તમ તાપમાનમાં ત્રણથી પાંચ ડિગ્રીનો વધારો જોવા મળ્યો છે.
હિમાચલ પ્રદેશમાં બરફના કરાનો વરસાદ થઈ શકે છે
બીજી બાજુ વેસ્ટર્ન ડિસ્ટર્બન્સના પ્રભાવ હેઠળ પંજાબથી હિમાચલ પ્રદેશ સુધી વરસાદની ગતિવિધિ એક્ટિવ થતી જોવા મળી રહી છે. હવામાન વિભાગની આગાહી અનુસાર, આજથી ૨ માર્ચ સુધી પંજાબમાં વરસાદ થવાની શક્યતા છે. હરિયાણા અને ચંડીગઢમાં ૧ અને ૨ માર્ચે વરસાદ થઈ શકે છે તો ૧ માર્ચે કાશ્મીર અને હિમાચલ પ્રદેશના અંતરિયાળ વિસ્તારોમાં ભારે વરસાદ સાથે હિમવર્ષા પણ થઈ શકે છે.
હિમાચલ પ્રદેશમાં આજે અને કાલે ગાજવીજ સાથે બરફના કરાનો વરસાદ થઈ શકે છે. આ સાથે સિક્કિમ, અરુણાચલ પ્રદેશ અને આંદામાન-નિકોબારના દક્ષિણ ટાપુઓમાં હળવા વરસાદની આગાહી કરવામાં આવી છે. હિમાચલ પ્રદેશમાં પણ હળવાથી મધ્યમ વરસાદ સાથે હિમવર્ષા અને વીજળી પડવાની પણ ચેતવણી આપવામાં આવી છે.
પહાડી વિસ્તારોમાં ફરી હિમવર્ષા જોવા મળશે
વેસ્ટર્ન ડિસ્ટર્બન્સ એક્ટિવ થતાં કેટલાક મેદાની વિસ્તારોમાં વરસાદ સાથે પહાડી વિસ્તારોમાં પણ હિમવર્ષા જોવા મળશે અને તેથી મોસમમાં ફરી એકવાર બદલાવ આવશે. વેસ્ટર્ન ડિસ્ટર્બન્સના કારણે આજે પણ પહાડી વિસ્તારોમાં વરસાદ અને હિમપ્રપાતની શક્યતા છે. અરુણાચલ પ્રદેશ, આસામ, મેઘાલય, નાગાલેન્ડના કેટલાક વિસ્તારોમાં વરસાદ સાથે કરાવૃષ્ટિ થવાની સંભાવના છે. હિમાચલ પ્રદેશમાં ફરી એકવાર કાતિલ ઠંડી ત્રાટકશે
હિમાચલ પ્રદેશમાં લોકોની મુશ્કેલી ઘટવાનું નામ લેતી નથી. હજુ અહીંથી ઠંડીએ સંપૂર્ણ વિદાય લીધી નથી ત્યાં ફરી એકવાર કાતિલ ઠંડી પડવાની શક્યતા હવામાન વિભાગે દર્શાવી છે. હવામાન વિભાગના જણાવ્યા અનુસાર, આજે હિમાચલમાં કેટલાક વિસ્તારોમાં ગાજવીજ સાથે વરસાદ અને કરાં પડવાની શક્યતા છે તો આવતીકાલે ચંબા, કાંગડા, કુલ્લૂ, મંડી, શિમલા અને લાહૌલ-સ્પિતિ જિલ્લામાં ભારે વરસાદ અને હિમવર્ષા થવાની શક્યતા હોવાથી ફરી એક વખત લોકોને કાતિલ ઠંડીનો અનુભવ થશે.