રાજ્યમાં વરસાદી વાતાવરણ વચ્ચે અનેક જિલ્લાઑમાં વરસાદ પડ્યો હતો. તેવામાં અમરેલી જિલ્લો આકાશિય વીજળી પ્રભાવિત ક્ષેત્રમાં હોવાથી નાગરિકોને સલામત રહેવા તંત્ર દ્વારા અનુરોધ કરાયો છે.
રાજ્યમાં છેલ્લા ત્રણ દિવસ વરસાદી વાતાવરણ વચ્ચે મેઘમહેર થઇ રહી છે. ત્યારે આજે રાજકોટ, બનાસકાંઠા, મહેસાણા, તાપી, ગીર સોમનાથ, કચ્છ, ભાવનગર સહીતના વિસ્તારોમાં વરસાદ પડ્યો હતો. જેને લઈને ખેડૂતોમાં ખુશીનો માહોલ જોવા મળી રહ્યો છે. તો અમરેલી જિલ્લો હાલ આકાશિય વીજળી પ્રભાવિત ક્ષેત્રમાં છે. બિનજરૂરી અવરજવર ટાળી સલામત સ્થળે રહેવા તમામ નાગરિકોને તંત્ર દ્વારા અનુરોધ કરાયો છે.
ભાદર-1 ડેમના નિચાણવાળા વિસ્તારોને કરાયા અલર્ટ
રાજકોટ ગ્રામ્ય વિસ્તારમાં પવન સાથે વરસાદ શરૂ થયો હતો. જેમાં આજે મેઘાએ જેતપુર, ગોંડલ અને જસદણ પંથકમાં વ્હાલ વરસાવ્યું હતું. શહેર અને ગ્રામ્ય પંથકમાં સતત ચોથા દિવસે વરસાદ પડ્યો હતો. જેથી શહેરના અનેક રોડ રસ્તાઓ પર પાણી ફરી વળ્યા હતા. બીજી તરફ જસદણ ગોંડલ પંથકમાં ઉપરવાસમાં વરસાદથી ભાદર 1 ડેમ ભરાયો હતો. હાલ ભાદર એક ડેમમાં 95 ટકા પાણી ભરાતા ઓવરફ્લોની સ્થિતિએ છે. જેથી તંત્રએ ભાદર-1 ડેમના નિચાણવાળા વિસ્તારોને અલર્ટ કર્યા છે. બીજી તરફ રાજકોટની ગોંડલી નદીમાં પૂર આવ્યું હતું અને ગોંડલના વેરી તળાવ, આશાપુરા, સેતુબંધ ચેકડેમ ઓવરફ્લો થયા હતા.
ભુજમાં 3 ઇંચ, નખત્રાણામાં 2 ઇંચ, મુંદ્રામાં એક ઈંચ વરસાદ
આ ઉપરાંત અમદાવાદ શહેરમાં પણ મેઘરાજા મેરબાન થયા હતા.કચ્છમાં વાદળછાયા વાતાવરણ વચ્ચે ભુજમાં 3 ઇંચ, નખત્રાણામાં 2 ઇંચ, મુંદ્રામાં એક ઈંચ વરસાદ પડયો હતો. તો બનાસકાંઠા જિલ્લાના અનેક વિસ્તારોમાં વરસાદી ઝાપટાં પડ્યા હતા.મહેસાણા જિલ્લામાં પણ ગરમી અને ઉકળાટ વચ્ચે વરસાદ પડતાં ગરમીમાં રાહત મળી હતી. તથા તાપી, વાલોડ,વ્યારા,સોનગઢ, ગીર સોમનાથના વેરાવળ, ડાભોર, ચમોડા, આંબલીયાળા, છાત્રોડા તથા નવસારીના બોટાદ, ગઢડા, ગોરડકા, લાઠીદડ, સમઢીયાળામાં પણ આજે વરસાદ પડ્યો હતો.
રાજ્યમાં આગામી 4 દિવસ વરસાદની આગાહી
બંગાળની ખાડીમાં લો-પ્રેશર સર્જાવાથી ગુજરાતમાં વરસાદી સિસ્ટમ સક્રિય છે. એવામાં ફરી એકવાર હવામાન વિભાગે રાજ્યમાં આગામી 4 દિવસ વરસાદની આગાહી કરી છે. દક્ષિણ ગુજરાતના અમૂક જિલ્લામાં ભારે વરસાદ અને સૌરાષ્ટ્રના અમૂક જિલ્લામાં છૂટા છવાયા વરસાદની આગાહી કરવામાં આવી છે. વધુમાં આવતીકાલે 13 સપ્ટેમ્બરે વડોદરા અને છોટાઉદેપુરમાં અતિભારે વરસાદ ખાબકી શકે છે. તો અમદાવાદ, ખેડા, આણંદ ,મહીસાગર, પંચમહાલ, દાહોદ, સુરેન્દ્રનગર, બોટાદ, ભાવનગર, રાજકોટ, અને અમરેલી જિલ્લાના કેટલાક ભાગોમાં છુટોછવાયો, જ્યારે કેટલાક ભાગમાં ભારેથી અતિભારે વરસાદ વરસી શકે છે તેવું હવામાન વિભાગે જણાવ્યું છે.