સમગ્ર ઉત્તર ગુજરાતમાં એકસાથે વરસાદે વિરામ લેતાં દિવસભર ભારે ઉકળાટ સાથે સામાન્ય ગરમીની અસર રહી હતી. ત્યારે હવામાન વિભાગની આગાહી મુજબ દક્ષિણ રાજસ્થાનમાં ઉત્તર ગુજરાતની નજીક અપરએર સાયક્લોનિક સરક્યુલેશન સિસ્ટમ તૈયાર થઇ છે.
જેને લઇ આજે ઉત્તર ગુજરાતમાં ફરી એકવાર છુટા છવાયાં વરસાદી ઝાપટાં પડી શકવાની શક્યતા સેવાઈ રહી છે. મહત્વનું છે કે, હવામાન વિભાગની આગાહી મુજબ અત્યારે ચોમાસુ કર્ણાટક રાજ્ય પરથી આગળ વધી રહ્યું છે અને મુંબઇમાં પ્રિ-મોનસુન અંતર્ગત વરસાદ થઇ રહ્યો છે.
પરંતુ ચોમાસાને દક્ષિણ ભારતથી ઉત્તર ગુજરાત સુધી આવતાં હજુ પંદરેક દિવસનો સમય લાગવાની શક્યતા છે. જેના કારણે ઉત્તર ગુજરાતમાં 3 થી 5 જુલાઇ વચ્ચે ચોમાસુ પ્રવેશે તેવી પ્રબળ સ્થિતિ હાલમાં વર્તાઈ રહી છે. જેથી લોકોએ હજુ ચોમાસા માટે પંદરેક દિવસ રાહ જોવી પડશે.
ઉલ્લેખનીય છે કે બે દિવસ પહેલા હવામાન વિભાગે કહ્યું હતું કે ગુજરાતમાં પાંચ દિવસ સુધી વરસાદ પડવાની સંભાવના નહિંવત છે. આવતા પાંચ દિવસ સુઘી ગરમી અને તડકાની સંભાવના છે. 25 જૂન સુધી ગુજરાતમાં વાદળછાયું વાતાવરણ બનવાની સંભાવના છે.
25થી 28 જૂન સુધીમાં કેટલાક ભાગમાં હળવા વરસાદની સંભાવના છે. સૌરાષ્ટ્ર અને દક્ષિણ ગુજરાતના કેટલાક ભાગમાં વરસાદની સંભાવના છે. ગુજરાતમાં સત્તાવાર ચોમાસું બેસતા હજુ અઠવાડીયું નિકળી જશે.
પરંતુ હાલમાં દક્ષિણ રાજસ્થાનમાં ઉત્તર ગુજરાતની નજીક અપરએર સાયક્લોનિક સરક્યુલેશન સિસ્ટમ સર્જાતાં જેની અસર હેઠળ ઉત્તર ગુજરાતના કેટલાંક ભાગમાં વરસાદ પડે તેવી હવામાન વિભાગે આગાહી કરી છે.
હવામાન વિભાગની આગાહી મુજબ બનાસકાંઠા, પાટણ, મહેસાણા, સાબરકાંઠા વરસાદ પડી શકે છે. જો કે ઉત્તર ગુજરાતમાં વિધીવત ચોમાસાના પ્રારંભમાં હજી વિલંબ થઇ શકે છે તેમ હવામાન વિભાગે જણાવ્યું હતું.