મેઘમહેર / જન્માષ્ટમીએ આકાશથી વરસ્યા શ્રીકૃષ્ણના આશીર્વાદ, રાજ્યમાં અનેક વિસ્તારોમાં વરસાદ, હજુ આટલા દિવસની આગાહી

• જન્માષ્ટમીના દિવસે રાજ્યમાં મેઘ મહેર 
• અમદાવાદ ગાંધીનગરમાં પણ પડ્યો વરસાદ 
• જગતના તાતમાં ખુશીનો માહોલ 

ગુજરાતમાં જન્માષ્ટમીના પાવન અવસરે મેઘરાજા મહેરબાન થયા છે. લાંબા વિરામ બાદ રાજ્યના અનેક જિલ્લાઓમાં વરસાદનું આગમન થયું છે.  બહુચરાજીમાં વરસાદની શરૂઆત થઈ ગઈ છે. તો  સમગ્ર સાબરકાંઠા જિલ્લામાં મેઘરાજા મન મૂકીને વરસી રહ્યા છે. તલોદ અને ઈડર તાલુકામાં વરસાદનું આગમન થઈ ગયું છે. 

અમદાવાદમાં લાબાં વિરામબાદ વરસાદ 

અમદાવાદ અને ગાંધીનગરમાં પણ મેઘરાજાએ એન્ટ્રી કરી દીધી છે. અહીયા છેલ્લા કેટલાય સમયથી લોકો વરસાદ ન પડતા અકળાઈ ગયા હતા. પરંતુ વરસાદ પડતાજ શહેરીજનોમાં આનંદનો માહોલ જેવા મળી રહ્યો છે. ખાસ કરીને લાંબા વિરામ બાદ મેઘરાજાએ ફરી આગમન કરતા ખેડૂતોમાં ખુશીનો માહોલ જોવા મળી રહ્યો છે. કારણકે તેમના પાકને નવું જીવન મળ્યું છે. 

જેતપુરમાં ધીમીધારે વરસાદ 

રાજકોટમાં પણ  લોકો વરસાદની રાહ જોઈ રહ્યા હતા. કારણકે અહીયા પાણીની પણ ભારે અછત સર્જાઈ છે. જોકે લાંબા વિરામ બાદ મેઘરાજા અહીયા મહેરબાન થયા હોય તેવું લાગે છે. કારણકે જેતપુરમાં હવે લાંબા વાતવરણમાં પલટો આવવાની સાથે ધીમધારે વરસાદ શરૂ થયો છે. જેથી લોકોમાં આંનદનો માહોલ છવાઈ ગયો છે.

ખેડૂતો ખુશખુશાલ 

ખાસ કરીને જગતનો તાત આતુરતાથી વરસાદની રાહ જોઈને બેઠો હતો અને મેઘરાજાના આગમાન બાદ અહીયાના ખેડૂતોમાં હવે આનંદનો માહોલ ફેલાઈ ગયો છે. જો વરસાદ પડશે તો ખેડૂતોને અહીયા સિંચાઈ માટેનું પાણી પણ મળી રહેશે. કારણકે પાણીની તંગીને કારણે ખેડૂતોને સિંચાઈ માટેનું પાણી પણ નથી મળી રહ્યું.

શામળાજીમાં ભક્તોએ વરસાદ સાથે દર્શન કર્યા 

અરવલ્લીના શામળાજીમાં પણ લાંબા વિરામ બાદ મેઘરાજાએ આગમન કર્યું. જન્માષ્ટમીના દિવસે શામળાજીમાં વરસાદ પડતા અહીયાના લોકોમાં પણ ખુશીનો માહોલ જોવા મળ્યો હતો. મંદિર પરિસરમાં ધોધમાર વરસાદ વચ્ચે ભક્તોએ શામળાજીના દર્શન કરીને ધન્યતા અનુભવી હતી. સાથેજ અહીયાના ખેડૂતોમાં પણ સોથી વધારે આનંદનો માહોલ જોવા મળ્યો હતો. 

વડોદરામાં મોડી રાતે પડ્યો હતો વરસાદ 

ઉલ્લેખનીય છે કે ગત મોડી રાતે વડોદરા શહેરમાં પણ મેઘરાજાએ ધમાકેદાર એન્ટ્રી કરી હતી. લાંબા સમયથી શહેરીજનો ભારે ઉકળાટ અને ગરમીને કારણે કંટાળી ગયા હતા. પરંતુ ધોધમાર વરસાદ પડવાને વાતાવરણમાં હાલ ઠંડક પ્રસરી ગઈ છે. અને લોકોમાં ખુશીનો માહોલ જોવા મળી રહ્યો છે. 

આગામી દિવસોમાં વરસાદની આગાહી 

મેઘરાજાનું આગમન થયા બાદ હજુ 4 દિવસ દક્ષિણ ગુજરાતમાં હવે ભારે વરસાદની આગાહી કરવામાં આવી છે. તો બીજી તરફ મધ્ય ગુજરાતમાં પણ સારો એવો વરસાદ પડશે તેવી આગાહી કરાવામાં આવી રહી છે. જેના કારણે હાલ લોકોમાં તેમજ ખાસ કરીને ખેડૂતોમાં ખુશીનો માહોલ જોવા મલી રહ્યો છે.