તરબોળ / PHOTOS: ખેતરો પાણી પાણી, ડેમ ઓવરફ્લો, ગામડા બેટ બન્યા, સૌરાષ્ટ્રના વરસાદની તમામ તસવીરો એક ક્લિકમાં

• સૌરાષ્ટ્રમાં સાંબેલાધાર વરસાદ
• દરિયાકાંઠાના તમામ જિલ્લાઓમાં અવિરત વરસાદ

ગુજરાતમાં હવામાન વિભાગની આગાહી મુજબ સાર્વત્રિક વરસાદ વરસી રહ્યો છે. ખાસ કરીને સૌરાષ્ટ્રમાં છેલ્લા એક સપ્તાહની વરસાદ અવિરત ખાબકી રહ્યો છે. આજે પણ સૌરાષ્ટ્રના મોટાભાગના જિલ્લાઓમાં મેઘ મહેર થઈ છે. પણ કેટલી ક જગ્યાએ આ મહેર કહેર બનીને પણ વરસી છે. ઠેર ઠેર પાણી ભરાવાના દ્રશ્યો સામે આવી રહ્યા છે, ખેતરો હોય કે નીચાણ વાળા ગામડાઓ, શહેરોના રસ્તાઓ કે હાઇવે જ્યાં જુઓ ત્યાં પાણી જ પાણી છે. 

જૂનાગઢ શહેર તેમજ ઉપરવાસમાં ભારે વરસાદ પડતાં નરસિંહ મહેતા તળાવ ઓવરફ્લો થયું છે.ઝાંઝરડા અન્ડર બ્રિજ પર પાણી ભરાતા કાર પાણીમાં ફસાઈ ગઈ હતી. કારમાં બેસેલા લોકો અંદર ફસાયા ગયા હતા. વોકળા પર થયેલા ગેરકાયદેસર બાંધકામને કારણે ભરાયા પાણી હોવાનો આક્ષેપ સ્થાનિકો કરી રહ્યા છે. 

જૂનાગઢમાં મનપા વિસ્તારમાં રસ્તાઓની હાલત બદતર બની છે. રસ્તાઓ પર ગાબડા પડતા વાહનો ફસાવવાની ઘટનાઓ સામે આવી હતી. JCBની મદદથી વાહનો બહાર કાઢવામાં આવ્યા હતા. શહેરની પાણીમાં ગરકાવ છતાં એક પણ અધિકારી રસ્તા પર સ્થિતિનો તાગ મેળવવા દેખાયો નથી 

જૂનાગઢના દાતાર અને ગિરનારના ડુંગર પર સતત ત્રણ દિવસથી ધોધમાર વરસાદ પડી રહ્યો છે. ડુંગરમાંથી નિકળતી સોનરખ નદીમાં ઘોડાપૂર આવતા લોકો પ્રકૃતિનો સુંદર નજારો જોવા ઉમટ્યા છે.

સૌરાષ્ટ્રમાં મેઘમહેર યથાવત જોવા મળી રહી છે.સૌરાષ્ટ્રના ગીર સોમનાથ જિલ્લમાં સતત ચોથા દિવસે વરસાદી માહોલ જોવા મળી રહ્યો છે.ગીર સોમનાથમાં વહેલી સવારથી જ ધીમીધારે વરસાદની શરૂઆત થઇ છે.ગીરસોમનાથમાં ભારે વરસાદને કારણે 3 તાલુકા પ્રભાવિત થયા છે.ખેતરોમાં મગફળીના પાક પણ પાણી પાણી થઇ ગયા છે.કોડીનાર અને સુત્રાપાડા તાલુકામાં ખેતરો અને રસ્તાઓ સરોવર બન્યા.

ગીરસોમનાથના સુત્રાપાડા તાલુકામાં વરસાદથી હાલાકી વધી છે. સુત્રાપાડાના ખેર ગામ પાસે પૂલ તૂટયો હોવાની લાઈવ ઘટના કેમેરામાં કેદ થઈ છે. પૂલ તૂટવાથી કોઇ જાનહાની થઈ નથી પણ વાહનવ્યવહારને મોટી અસર પડી છે.

રાજકોટના નાની પરબડી અને જુનાગઢ હાઈ-વેને જોડતા કોઝવે પર પાણી ભરાયા છે. કોઝવે પર પાણીના પ્રવાહમાંથી પસાર થતા સમયે એક બાઇક તણાઈ ગયુ હતુ. જો કે સ્થાનિકોએ સુજબુઝથી બાઇકચાલકને બચાવી લીધો હતો. રાજકોટ જિલ્લાનો ફોફળ-1 ડેમ ઓવરફલો થવાની તૈયારીમાં છે. જિલ્લા કલેકટરે લોકોને સાવચેત કરતાં કહ્યું છે કે નદીના પટમાં અવરજવર ન કરવામાં આવે.

રાજકોટના ધોરાજીમાં શહેરના ભૂતનાથ મહાદેવ મંદિર પાસેના ઘરોમાં પાણી ઘૂસી ગયા છે. વર્ષોથી આ સમસ્યા વણઉકેલી છે. તંત્ર દ્વારા યોગ્ય કામગીરી ન કરાઇ હોવાનો સ્થાનિકોનો આક્ષેપ કરી રહ્યા છે.

અમરેલી શહેરમાં મેઘાએ ધડબડાતી બોલાવતા શહેરના અનેક વિસ્તારમાં પાણી ભરાયા છે.અંતરિયાળ સોસાયટીઓ પાણીમાં ગરકાવ થઈ જતાં રહીશો હેરાન હેરાન છે.

જામનગરમાં કાલાવડનો ઉંડ-3 ડેમ ઓવરફ્લો થયો છે. કાલાવડ તાલુકાના રાજસ્થળી, ખીજડિયા, જસાપર અને બંને ખાખરીયા ગ્રામજનોને એલર્ટ કરવામાં આવ્યા

જામનગર જિલ્લામાં પવન સાથે ધોધવાર વરસાદની એન્ટ્રી આજે પણ થઈ છે . જોડિયા, જામજોધપુર, કાલાવડ, ધ્રોલમાં વરસાદી તારાજીની તસવીરો સામે આવી છે.  તેમાં પણ જોડિયામાં 3.5 ઈંચ વરસાદ પડ્યો છે.

દ્વારકા તાલુકાના કુરંગા સહિતના વિસ્તારોમાં સતત વરસી રહેલા વરસાદે ચારે તરફ પાણી પાણી કરી દીધા. દૂર દૂર સુધી જમીનો પાણીમાં ગરકાવ થયેલી જોવા મળી

દ્વારકામાં અવિરત વરસાદથી દુકાનો પાસે પાણી ભરાતા હાઈવે પરની દુકાનોની મુશ્કેલી વધી, સતત વરસાદથી શહેરનું જનજીવન પ્રભાવિત થયું છે.

દ્વારકાના ભાટિયા ફાટક  પર રેતી ભરેલો ટ્રક ફસાયો હતો. ટ્રકના ટાયર અંદર ઘૂસી જતા ટ્રકમાંથી રેતી ખાલી કરવા લોકો કામે લાગ્યા હતા.

દ્વારકાના કલ્યાણપુર તાલુકામાં હરીપર ગામને જોડતા માર્ગ પર પાણી ફરી વળ્યાં હતા તેમજ હરીપર પાનેલી રસ્તામાં પુલ પાસે ગાબડું પડ્યું હોવાની ઘટના બની હતી. અવરજવર માટે રસ્તો બંધ કરવામાં આવ્યો છે.

દ્વારકાના ભાટીયામાં કાલેશ્વર મહાદેવ મંદિર પાસે પાણી ભરાયા છે.ભાટીયામાં 3 દિવસની અંદર 15 ઈંચ જેટલો વરસાદ પડયો છે જેથી નીચાણવાળા વિસ્તારમાં લોકોના ઘરમાં પાણીમાં ગરકાવ થયા છે.

સૌરાષ્ટ્રમાં છેલ્લા ત્રણ દિવસથી સતત વરસાદ વરસી રહ્યો છે.આ વરસાદને કારણે દ્વારકાના ભાટિયા વિસ્તારમાં ચારે તરફ પાણી પાણી જોવા મળી રહ્યા છે.ભાટિયાના કૃષ્ણનગર સ્કૂલ પાસે નીચાણવાળા વિસ્તારોમાં પાણી ભરાયા.ભાટિયાનું સ્મશાન ગૃહ પણ પાણીમાં ગરકાવ થયું છે.સતત ત્રણ દિવસથી વરસતા વરસાદને કારણે પાણી ભરાયા છે

પોરબંદર શહેરમાં પાછલા ચાર દિવસથી વરસાદ યથાવત્ છે.રાણાવાવ તાલુકાના ખેતરોમાં વરસાદી પાણી ભરાયા છે.સારા વરસાદથી ચોમાસુ પાકને પૂરતું પાણી મળતા ખેડૂતો ખુશખુશાલ છે

બોટાદના બરવાળા તાલુકાના સાળંગપુર, ખાંભડા, રેફડા, ચાચરીયામાં 6 કલાકમાં 4.5 ઇંચ કરતા વધુ વરસાદ નોંધાયો, ખાંભડા ડેમમાં નવા નીરની આવક થતાં  ડેમની સપાટી 49.15 મીટર પહોંચી 

રાજકોટના જેતપુર, ધોરાજી અને ઉપલેટામાં સતત બીજા દિવસે વરસાદ બઘડાટી બોલાવી છે. ધોરાજીના શાક માર્કેટમાં,ઉપલેટાના લાઠ ગામ જવાનાં કોઝવે પર પાણીનું સામ્રાજ્ય જોવા મળ્યું છે.

જાણી લો હવામાન વિભાગની આગાહી
ગુજરાતમાં હજુ 4 દિવસ વરસાદની આગાહી હવામાન વિભાગે કરી છે.દક્ષિણ ગુજરાત, સૌરાષ્ટ્રમાં વરસાદની આગાહી કરાઇ છે.જ્યારે 8, 9 અને 10 જુલાઈએ પણ દક્ષિણ ગુજરાત, સૌરાષ્ટ્રમાં વરસાદની આગાહી કરવામાં આવી છે.7 જુલાઈએ ભાવનગર,સુરત,ભરૂચ,જૂનાગઢ,અમરેલી,સોમનાથ,તાપી,નવસારી, ડાંગ, વલસાડ,દ્વારકા,પોરબંદરમાં હવામાન વિભાગે વરસાદની આગાહી કરી છે...હાલ તો ભારે વરસાદે સૌરાષ્ટ્રને ઘમરોળી નાખ્યું છે.અને આગામી ચાર દિવસ હજુ પણ ભારે વરસાદની આગાહી કરવામાં આવી છે...જેને લઇને તંત્ર દ્વારા પણ કોઇ પણ વિષમ પરિસ્થિતિને પહોંચી વળવા માટે આગોતરૂ આયોજન કરવામાં આવી રહ્યું છે.