રાજકોટઃ ગુજરાતના વાતાવરણમાં આજે અચાનક પલટો જોવા મળ્યો હતો. સૌરાષ્ટ્ર અને દક્ષિણ ગુજરાતમાં વહેલી સવારથી કાળાડિબાંગ વાદળો છવાતા વરસાદી ઝાપટા પડ્યા હતા.
હવામાન વિભાગ દ્વારા દક્ષિણ ગુજરાતમાં વરસાદની આગાહી કરવામાં આવી છે ત્યારે વલસાડ જિલ્લામાં પણ સવારથી જ તમામ તાલુકાઓમાં વાદળછાયું વાતાવરણ હતું. વલસાડ શહેર કપરાડા અને ઉમરગામ પંથકમાં હળવો વરસાદ નોંધાયો છે. વલસાડ શહેરમાં પ્રથમ વરસાદ પડતાં લોકોમાં ભારે ઉત્સાહનો માહોલ જોવા મળ્યો હતો.
લાંબા સમયથી ગરમીનો અનુભવ કરતા વલસાડવાસીઓને ઠંડકનો અહેસાસ કર્યો હતો. ઉમરગામ પંથકમાં પણ એક વરસાદી ઝાપટુ સારું પડી જતાં વાતાવરણમાં ઠંડક પ્રસરી ગઈ હતી. તો આ તરફ ડુંગરાળ વિસ્તાર એવા કપરાડા અને ધરમપુરમાં પણ વરસાદી ઝાપટું પડ્યું હતું. જોકે હજી ખેતીલાયક વરસાદ ન વરસતા ખેડૂતો વધારે વરસાદની રાહ જોઈ રહ્યા છે.
ભાવનગરના તળાજામાં મેઘરાજાની ધમાકેદાર એન્ટ્રી
રાજ્યમાં ધીમે ધીમે વરસાદની શરૂઆત થઈ છે. ત્યારે બીજી તરફ ભાવનગરના તળાજામાં મેઘરાજાની એન્ટ્રી થઈ છે. ભાવનગરમાં વરસાદની ધમાકેદાર એન્ટ્રી બાદ વાતાવરણમાં ઠંડક પ્રસરી હતી. તો સ્થાનિકોએ ગરમીથી થોડી રાહત મેળવી હતી.
સોમનાથ પંથકમાં વાતાવરણમાં પલટો ભારે પવન સાથે ધીમી ધારે વરસાદ
સાથો સાથ જૂનાગઢના સોમનાથમાં વરસાદની પધામણી થઈ હતી. ભારે પવન સાથે હળવો વરસાદ નોંધાયો હતો. વરસાદના આગમનથી ઉકળતી ગરમીમાં ઠંડક પ્રસરી હતી. અને લોકોને ગરમીમાં રાહતનો અનુભવ થયો હતો.
રાજકોટમાં મેઘરાજાની પધરામણી
આ તરફ રાજકોટના ગોંડલમાં કેટલાક વિસ્તારોમાં મેઘરાજાની પધરામણી થઇ હતી. બીજી તરફ રાજકોટમાં પણ મેઘરાજાની એન્ટ્રી થઇ હતી. તો તાપીમાં પણ વરસાદી માહોલ છવાયો હતો. લોકોએ વરસાદની મજા માણી હતી.
સુરત જિલ્લામાં વરસાદની શરૂઆત
ઘણા સમયથી પડી રહેલી અસહ્ય ગરમી બાદ હવે સુરત જિલ્લામાં વરસાદની શરૂઆત થઈ છે. સુરતના ઓલપાડ કિમ સહિતના વરસાદ થયો છે. વરસાદ આવતા સમગ્ર વિસ્તારમાં ઠંડક પ્રસરી છે. લોકોને ગરમીથી છુટકારો પણ મળ્યો છે..
જૂનાગઢમાં વહેલી સવારથી વરસાદનું આગમન
છેલ્લા ઘણા અસહ્ય ગરમી બાદ હવે જૂનાગઢમાં વરસાદી ઝાપટા પડ્યા છે. વરસાદ આવતા વાતાવરણમાં ઠંડક પ્રસરી છે. વરસાદી ઝાપટીથી આકાશમાં કાળા વાદળા છવાયા છે.
અમરેલી જિલ્લામાં વરસાદનું આગમન રાજુલા-જાફરાબાદ પંથકમાં વરસાદ
અમરેલી જિલ્લામાં વરસાદનુ આગમન થયુ છે. રાજુલા-જાફરાબાદ પંથકમા વરસાદ પડ્યો છે. વાડિયામાં પણ ઝરમર વરસાદ પડ્યો છે. વરસાદને પગલે સમગ્ર વાતાવરણમાં ઠંડક પ્રસરી હતી.
દરિયામા પવનની ગતિ તેજ થતા માછીમારોને દરિયો ન ખેડવા માટે અપાયા આદેશ
ગુજરાતના ઘણા શહેરોમાં વરસાદની શરૂઆત થઈ છે. ત્યારે હવે દરિયામાં પવનની ગતિ તેજ થતા હવામાન વિભાગ દ્વારા માછિમારોને દરિયો ન ખેડવાના આદેશ આપવામાં આવ્યા છે. રાજ્યમાં આગામી 2 દિવસ સુધી વાદળછાયુ વાતાવરણ રહેશે. દક્ષિણ ગુજરાત અને સૌરાષ્ટ્રમાં 48 કલાકમાં સામાન્ય વરસાદની આગાહી કરવામાં આવી છે.
વરસાદની આતૂરતાથી રાહ જોતા ખેડૂતો
તો બીજી તરફ ભાવનગર જીલ્લાના ખેડૂતો મેધરાજાની મ્હેર થાય તેની રાહ જોઈ રહ્યા છે. છેલ્લા ચાર વર્ષથી અપૂરતા વરસાદથી પાણીની સમસ્યાને લઈને ભાવનગરના ખેડૂતોમાં આ વર્ષે સારો વરસાદ થવાની આશા વ્યક્ત કરી છે. આ વર્ષે ભીમ અગ્યારસના દિવસે આદ્રા નક્ષત્ર આવતું હોવાથી વરસાદ પણ સારો થશે તેવી આશા વ્યક્ત કરી છે.
તો પૂરતો વરસાદ થશે તેના એંધાણમાં ખેડૂતોએ વાવણીની શરૂઆત પણ કરી દીધી છે. તો સાથે જ આ વર્ષે જો ઓછો વરસાદ થશે તો ખેડૂતો મુશ્કેલીનો સામનો કરવો પડે તે એક ચિંતાનો વિષય છે.
મહત્વનું છે કે આ વર્ષે પાણીની સમસ્યા અટલી હદ સુધી વધી ગઈ હતી કે રાજ્યના ખેડૂતોને સિંચાઈ માટે પણ પાણી પર્યાપ્ત મળતુ ન હતું ત્યારે આ ચોમાસામાં ભરપૂર વરસાદ થશે તેવી આશા સાથે ખેડૂતો આકાશ સામે તાકીને મેધની આતુરતાથી વાટ જોઈ રહ્યા છે.