ભાદરવો ભરપૂર / રાજકોટ શહેર અને જિલ્લામાં ગાજવીજ સાથે ધોધમાર વરસાદ, ખેડૂતોમાં ખૂશીની લહેર

રાજકોટ શહેર પર મેઘરાજા મહેરબાન થયા છે. રાજકોટ શહેરમાં મોડી રાત્રે 7 ઇંચ વરસાદ ખાબક્યો છે. જેમાં કોટડાસાંઘાણી અને લોધિકામાં 2 ઇંચ વરસાદ પડ્યો છે. જ્યારે જેતપુર અને જસદણમાં પણ ભારે વરસાદ પડ્યો છે.

 

ભારે વરસાદના કારણે રાજકોટ શહેર અને જિલ્લાના ડેમોમાં નવા નીરની આવક જોવા મળી છે. રાજકોટ શહેરમાં ધોધમાર વરસાદ કારણે ગણેસ પંડાલોમાં પાણી ભરાયાં છે. રેસકોર્સમાં આવેલા ગણેશ પંડાલોમાં પાણી ભરાયા છે.

 

ભારે વરસાદને લઈ શહેરના તમામ અંડરબ્રિજ બંધ
રાજકોટ શહેરમાં મોડીરાતથી અત્યાર સુધીમાં 7 ઇંચ વરસાદ ખાબક્યો છે. જેને લઇને શહેરના લક્ષ્મીનગર, પોપટપરા નાળુ બંધ કરવામાં આવ્યું. જ્યારે મહિલા કોલેજ અન્ડરબ્રિજ પણ સાવચેતીના પગલે બંધ કરાયો છે.

આમ શહેરમાં ધોધમાર વરસાદ ખાબકતાં અંડરબ્રિજ પાસે સાવચેતીના ભાગરૂપે ફાયર બ્રિગેડની ટીમ તૈનાત કરવામાં આવી રહી છે. જ્યારે મનપનો વિજિલન્સ પોલીસ સ્ટાફ પણ સ્થળ પર તૈનાત કરાઇ રહ્યો છે. રાત્રી દરમિયાન શહેરમાં પડેલા ધોધમાર વરસાદના પગલે નીચાણવાળા વિસ્તારોમાં પાણી ભરાયા છે. 

વરસાદના પગલે જળાશયોમાં નવા નીરની આવક
રાજકોટ શહેર અને જિલ્લામાં 7 ઇંચ સાર્વત્રિક વરસાદ વરસ્યો છે. વરસાદના પગલે જળાશયોમાં નવા નીરની આવક જોવા મળી છે. જેમાં આજી-1 ડેમમાં 27.60 પૂટ પાણી, ઓવરફલો થવામાં 1.40 ફૂટ બાકી, આજી-2 ડેમમાં 28.60 ફૂટ પાણી, ઓવરફલો થવામાં 1.50 ફૂટ  બાકી, જ્યારે ન્યારી-1 ડેમ 24.80 ફૂટ પાણી, ઓવરફલો થવામાં 0.30 ફૂટ  બાકી જોવા મળી રહ્યું છે. જ્યારે પાણીની આવક થતાં ન્યારી-2 ડેમ ઓવરફલો થયો.