રાજ્યભરમાં વરસાદને લઇ હવામાન વિભાગે આગાહી કરી છે. હવામાન વિભાગે કહ્યું કે રાજ્યમાં વરસાદી માહોલ યથાવત રહેશે. આવતીકાલથી વરસાદમાં ઘટાડો થશે. વેલ માર્ક લો પ્રેશર પશ્ચિમ તરફ ફંટાયું છે. આજે સૌરાષ્ટ્ર-કચ્છમાં ભારે વરસાદની આગાહી છે. જામનગર, દ્વારકા, કચ્છમાં લો પ્રેશરની અસર દેખાશે. મધ્ય ગુજરાતમાં સામાન્યથી મધ્યમ વરસાદ રહેશે. અમદાવાદ, વડોદરામાં સામાન્યથી મધ્યમ વરસાદ રહેશે. તેવામાં હાલ રાજ્યના અનેક પંથકમાં ભારે વરસાદ વરસ્યો છે. તેવામાં પોરબંદરમાં મેઘતાંડવ સર્જાયું છે.
સૌરાષ્ટ્ર અને દક્ષિણ ગુજરાતમાં ભારે વરસાદની આગાહી
રાજ્ય ઉપર વેલમાર્ક લો પ્રેશર યથાવત
અત્યાર સુધી રાજ્યમાં 27 ટકા વરસાદ નોંધાયો
રાજ્ય ઉપર વેલમાર્ક લો પ્રેશર યથાવત છે. જેને લઈને હવામાન વિભાગ દ્વારા સૌરાષ્ટ્ર અને દક્ષિણ ગુજરાતમાં ભારે વરસાદની આગાહી કરવામાં આવી છે. અત્યાર સુધી રાજ્યમાં 27 ટકા વરસાદ નોંધાયો છે. હજુ પણ સૌરાષ્ટ્રમાં રેડ એલર્ટ યથાવત છે. પરંતુ હવામાન વિભાગનું માનીએ તો 9 જુલાઈથી વરસાદ ઘટવાની શરૂઆત થશે. જ્યારે અમદાવાદ અને ઉત્તર ગુજરાતમાં સામાન્ય વરસાદ આવી શકે છે. તો પવનની ગતિ 40થી 60 કિમી પ્રતિ કલાકની રહી શકે છે. આથી માછીમારોને 5 દિવસ સુધી દરિયો ન ખેડવા સૂચના આપવામાં આવી છે.
રાજ્યમાં વરસાદી માહોલ જામ્યો છે. ત્યારે સૌરાષ્ટ્રના દ્વારકા અને પોરબંદર પંથકમાં મુશળધાર વરસાદ વરસ્યો છે. ત્યારે પાટનગર ગાંધીનગર, અમદાવાદ, છોટા ઉદેપુર, રાજકોટ, જામનગર, જૂનાગઢ, કચ્છ અને ગીર સોમનાથ સહિત અનેક વિસ્તારોમાં વરસાદ ખાબક્યો છે. કેટલાક ગામોમાં પાણી ઘુસ્યા છે, તો કેટલાક ગામો સંપર્ક વિહોણા બન્યા છે. અનેક વૃક્ષો અને વીજપોલ ધરાશાયી થયા છે. તો કેટલીક જગ્યાઓ પર વીજળી પણ પડી છે. તો ભારે વરસાદથી અનેક લોકોના ઘરો અને ખેતરોના પાકને નુકસાન પણ થયું છે.
પોરબંદરમાં મેઘતાંડવ, અનેક વિસ્તારો પાણીમાં ગરકાવ
પોરબંદરમાં ધોધમાર વરસાદ પડી રહ્યો છે. ત્યારે પોરબંદરમાં ધોધમાર વરસાદના કારણે અનેક રસ્તાઓ પાણીમાં ગરકાવ થઇ ગયા છે. તો આસપાસના ગામોનો પણ સંપર્ક તૂટી ગયો છે. તેવામાં ભારે વરસાદના કારણે મોટાભાગ ડેમ ઓવરફ્લો થઇ ગયા છે. તો ભાણવડ નજીકના વર્તુ-2 ડેમના 16 દરવાજા ખોલી દેવામાં આવ્યા છે. જેને લઇ 8 ગામોને અલર્ટ કરી દેવાયા છે. પારાવાડા, ભોમીયાવદર, સીમર, કુણવદર સહિતના ગામોમાં પણ પાણી ફરી વળ્યાં. અને ગામો સંપર્ક વિહોણા થઇ ગયા છે. તો ખેતરોમાં પણ પાણી ભરાઇ ગયા છે. તો બરાડ પંથકનુ શીશલી ગામ ફેરવાયુ બેટમાં
સોમનાથ-પોરબંદર હાઇવે પર અનેક જગ્યાએ ભરાયા પાણી
સોમનાથ-પોરબંદર હાઇવે પર અનેક જગ્યાએ પાણી ભરાય ગયા છે. સુપ્રસિદ્ધ નરવાઈ માતાજીના મંદિરમાં પણ પાણી ભરાયા છે. ઉપરવાસમાં પડેલ ભારે વરસાદના પગલે મંદિરમાં પણ પાણી ભરાય ગયા છે. નિજ મંદિરમાં એક ફૂટ સુધી પાણી ભરાયું છે. તો બરડા ડુંગર કુદરતી સૌંદર્યથી ખીલી ઉઠ્યો છે.
માધવપુર ઘેડ પંથકમાં અનેક ગામો પાણીમાં ગરકાવ
માધવપુર ઘેડ પંથકમાં અનેક ગામો પાણીમાં ગરકાવ થયા છે. ઘેડના ગામડાઓમાં ઉપરવાસના પાણી ફરી વળ્યાં છે. બગસરા, અમીપુર, ઓસા અને કેશોદના ગામોને જોડતો રસ્તો બંધ થયો છે. ઓજત નદીના નીર ફરી વળતા રસ્તો બંધ થયો છે. તો અનેક ગામો સંપર્ક વિહોણા થયા છે.
જામનગરના અનેક વિસ્તારોમાં પાણી ભરાયા
જામનગરમાં ભારે વરસાદના કારણે અનેક વિસ્તારોમાં પાણી ભરાયા છે. જોકે મંગળવાર રાતથી વરસાદે વિરામ લેતા લોકોને થોડી રાહત મળી છે. પરંતુ હજુ પણ કેટલાક વિસ્તારોમાં વરસાદી પાણી ભરાયેલા છે. ત્યાં તંત્ર પણ પહોંચ્યું નથી. દર વર્ષે અહીં ભારે વરસાદમાં પાણી ભરાવાની સમસ્યા સર્જાઇ છે. લોકો દ્વારા તંત્રને વારંવાર રજૂઆત પણ કરવામાં આવે છે. પરંતુ તેનું કોઇ નિરાકરણ આવતું નથી.
દ્વારકાના જામરાવલમાં તબાહી બાદના અવકાશી દ્રશ્યો
દ્વારકાના જામરાવલમાં તબાહી બાદના અવકાશી દ્રશ્યો સામે આવ્યા છે. જામરાલવ ગામમાં ચારે તરફ પાણી જ પાણી જોવા મળી રહ્યું છે. જોકે વરસાદ બંધ થતા કેટલાક વિસ્તારમાં પાણી ઓસર્યા છે. જ્યારે હજુ પણ નીચાણવાળા વિસ્તારોમાં પાણી ભરાયેલા છે.
દ્વારકામાં ભારે વરસાદથી ઠેર ઠેર ભરાયા પાણી
દ્વારકામાં ભારે વરસાદથી ઠેર ઠેર પાણી ભરાયા છે. ભારે વરસાદથી રસ્તા પર પાણી ફરી વળતા મીઠાપુર જવાનો માર્ગ બંધ કરવામાં આવ્યો છે. રાહદારીઓ માટે નીકળવું મુશ્કેલ બન્યું છે. અનેક જગ્યાએ પાણી ભરાતા લોકોને હાલાકી ભોગવવાનો વારો આવ્યો છે. તો ખતુંબા ગામમાં પણ પાણી ભરાયા છે. તો ભારે વરસાદથી નદીઓ બે કાંઠે વહેતી થઇ છે. તો મીઠાના અગરના પાળાઓ અને રસ્તાઓ પણ ધોવાયા છે. ખતુંબા ગામમાં ચોતરફ પાણી જ જોવા મળી રહ્યું છે.
અમદાવાદમાં પણ આજે ઝરમર વરસાદ થયો
અમદાવાદમાં ઝરમર વરસાદ શરૂ થઇ ગયો છે. સેટેલાઈટ, બોડકદેવ, વસ્ત્રાપુરમાં વરસાદ શરૂ થઇ ગયો છે. તો એસ.જી. હાઈવે, સરખેજ, થલતેજમાં પણ ધીમીધારે વરસાદ પડી રહ્યો છે. જ્યારે શ્યામલ, શિવરંજની, બોપલ અને રામદેવનગર, પ્રહલાદનગરમાં પણ ઝરમર વરસાદ પડી રહ્યો છે.
સુરેન્દ્રનગરના ચોટીલા તાલુકામા ભારે વરસાદને ડેમ થયા ઓવરફ્લો
ચોટીલામાં ત્રિવેણી ઠાંગા ડેમ ઓવરફ્લો થયો છે. ડેમ ઓવરફ્લો થતા 6 ગામોને અલર્ટ કરાયા છે. જેમાં ડાકવડલા, રામપરા, ખટકી અને શેખલીયા મેવાસા સહીતના ગામો અલર્ટ કરાયા છે. નદીના પટમાં અવર જવર ન કરવા તંત્રએ સૂચના આપી છે.
રાજકોટનો આજી-2 ડેમ થયો ઓવરફ્લો
રાજકોટના આજી-2 ડેમ આસપાસના ગામો માટે સારા સમાચાર છે. રાજકોટનો આજી-2 ડેમ ઓવરફ્લો થયો છે. ડેમ ઓવરફ્લો થતા ડેમના 2 ગેટ ખોલવામાં આવ્યા છે. શહેર-જિલ્લા માટે પીવાનું પાણી ડેમમાંથી મળે છે. તો આજી-2 ડેમ છલકાતા ખેડૂતોને સિંચાઇ માટે ફાયદો થશે. તો બીજી તરફ રાજકોટ શહેર અને જિલ્લાના અનેક વિસ્તારોમાં વરસાદ વરસ્યો છે.
કચ્છઃ મોટી સીંધોડીની નદી બે કાંઠે
કચ્છમાં ભારે વરસાદના કારણે નદી નાળા છલકાયા છે. કચ્છમાં પ્રાકૃતિક સૌંદર્ય ખીલી ઉઠ્યું છે. ભુજ નજીક ડુંગરાળ વિસ્તારો લીલાછમ થઇ ગયા છે. અને કચ્છમાં હિલ સ્ટેશન જેવા અહલાદક દ્રશ્યો જોવા મળ્યા છે. તો મોટી સીંધોડી ગામની નદી બે કાંઠે વહી રહી છે. ભારે વરસાદથી ગામને જોડતા મુખ્યમાર્ગ પર વરસાદી પાણી ફરી વળ્યાં છે. મુખ્યમાર્ગ પર ધસમસતા પ્રવાહથી અવર-જવર બંધ કરવામાં આવી છે. નખત્રાણામાં પાલરધુના ધોધ શરૂ થયો છે. વરસાદી પાણી આવતા પાલરધુના ધોધ ખીલી ઉઠ્યો છે.પાલરધુના ધોધના નયનરમ્ય દ્રશ્યો સર્જાયા છે...
કચ્છમાં વીજળી પડવાના દ્રશ્યો કેમેરામાં થયા કેદ
અરવલ્લીમાં ભારે વરસાદથી રસ્તાઓ તૂટ્યા
અરવલ્લીમાં ભારે વરસાદથી રસ્તાઓ તૂટ્યા છે. માલપુર ચાર રસ્તા પર રોડમાં એક એક ફૂટના ખાડા પડ્યા છે. ગોધરા તરફ જતા મુખ્ય રસ્તામાં ખાડા પડતા વાહનચાલકો પરેશાન થયા છે. રોડમાં પડેલા ખાડાથી અકસ્માત થવાની ભિંતી સેવાઇ રહી છે. L&T દ્વારા થોડા સમય અગાઉ રોડ રિપેરિંગ કરાયો હતો. પ્રથમ વરસાદમાં રોડ તૂટતા માલપુરના સ્થાનિકોમાં રોષ જોવા મળી રહ્યો છે.