ગુજરાતમાં આગામી 48 કલાક દરમિયાન હળવાથી મધ્યમ વરસાદને લઇ કરવામાં આવેલી આગાહી વચ્ચે ગઇકાલે મોડી રાત્રથી રાજ્યના કેટલાંક જિલ્લાઓમાં ફરી વરસાદનું આગમન જોવા મળ્યું છે. બંગાળની ખાડીમાં સિસ્ટમ સક્રિય થઇ હોવાના લઇને રાજ્યમાં વરસાદની આગાહી કરવામાં આવી છે. ત્યારે કેટલાંક જિલ્લાઓમાં મેઘરાજાની ફરી રી એન્ટ્રી જોવા મળી છે.
હવામાન વિભાગની આગાહી મુજબ ગુજરાતમાં મધ્યમથી હળવા વરસાદની આગાહી કરવામાં આવી છે. ત્યારે રાજ્યના કેટલાંક જિલ્લાઓમાં મોડી રાતથી તો કેટલાક જિલ્લાઓમાં વહેલી સવારથી વરસાદની રી એન્ટ્રી જોવા મળી છે.
અરવલ્લી જિલ્લમાં સાર્વત્રિક વરસાદ
અરવલ્લી જિલ્લમાં વિરામ બાદ સાર્વત્રિક વરસાદ નોંધાયો છે. અરવલ્લીના મેઘરજ અને મોડાસા તાલુકામાં દોઢ ઇંચ વરસાદ નોંધાયો છે. માલપુર, બાયડ, ધનસુરામાં અડધો ઇંચ વરસાદ નોંધાયો છે. સાર્વત્રિક વરસાદથી ચોમાસુ પાકને મળ્યું જીવતદાન મળતાં ખેડૂતોને રાહત મળી છે.
પંચમહાલમાં વહેલી સવારથી વરસાદ
રાજ્યના પંચમહાલમાં આજરોજ વહેલી સવારથી વરસાદનું આગમન જોવા મળ્યું છે. ગોધરા અને આસપાસના વિસ્તારોમાં વરસાદ પડ્યો છે. આમ લાંબા સમય બાદ ફરી વરસાદ શરૂ થતાં ખેડૂતોમાં ખુશીની લહેર જોવા મળી રહી છે.
વડોદરામાં વરસાદી ઝાપટાં
રાજ્યના વડોદરા શહેરમાં પણ આજરોજ વહેલી સવારથી વરસાદનું આગમન જોવા મળ્યું છે. આમ લાંબા સમય બાદ શહેરના વાતાવરણમાં પલટો જોવા મળ્યો અને વરસાદી માહોલ થયો. આમ વરસાદ પડતાં શહેરીજનોને ગરમીમાંથી રાહત મળી છે. શહેરના અલ્કાપુરી, સયાજીગંજ, રાવપુરામાં વરસાદ જોવા મળ્યો છે.
તાપી જિલ્લામાં વરસાદ
તાપી જિલ્લામાં વરસાદમાં પણ મેઘમહેર જોવા મળી છે. લાંબા વિરામ બાદ વ્યારા અને તેના આસપાસના વિસ્તારોમાં વરસાદનું આગમન થયું છે. તાપી જિલ્લામાં ફરી ધીરે ધીરે વરસાદી માહોલ જામી રહ્યો છે. તાપી જિલ્લાના ગ્રામ્ય પંથકમાં છૂટછવાયો વરસાદ પડ્યો છે.
ભાવનગર શહેરમાં ધોધમાર વરસાદ
ભાવનગર શહેર અને જિલ્લામાં વરસાદનું આગમન થયું છે. શહેરમાં ધોધમાર વરસાદ પડ્યો છે. ભાવનગરમાં 1 કલાકમાં 2 ઇંચ વરસાદ ખાબક્યો છે. ભારે વરસાદના પગલે વિવિધ વિસ્તારોમાં પાણી ભરાયાં છે. જિલ્લાના ઘોઘા ગામે પણ 1.5 ઇંચ વરસાદ વરસ્યો છે. ભાવનગર જિલ્લામાં વરસાદના પગલે ખેડૂતોમાં ખુશીનો માહોલ જોવા મળ્યો છે.
ભરૂચ જિલ્લાના 6 તાલુકાઓમાં વરસાદ
ભરૂચમાં મોડીરાત્રે ધોધમાર વરસાદ પડ્યો છે. જિલ્લાના 6 તાલુકામાં મેઘરાજાએ ધુવાધાર એન્ટ્રી કરતા રસ્તા પાણી-પાણી થઇ ગયા હતા. ભરૂચ,અંકલેશ્વર,વાગરા, હાંસોટ, વાગરા, ઝઘડિયામાં છૂટો છવાયો વરસાદ પડતાં ખેતીના પાક માટે ફાયદાકારક સાબિત થઇ રહ્યો છે.