તારાજીની તસવીર / VIDEO: કાલાવાડમાં સ્કૂલ બસ નદીમાં ખાબકતા જીવ અધ્ધર, ગ્રામજનો અને ફાયરની ટીમે કર્યું સફળ રેસ્ક્યૂ ઓપરેશન

• વરસાદનો તોફાની અવતાર
• સૌરાષ્ટ્ર પાણી પાણી
• દક્ષિણ ગુજરાતમાં દે ધનાધન

ગુજરાતમાં દક્ષિણ ગુજરાત, સૌરાષ્ટ્રમાં મેઘાની તોફાની ઈનીગં ચાલુ છે. કેટલાય વિસ્તારમાં વીજળી ગુલ છે તો કેટલાય વિસ્તારો પાણી પાણી થતાં ઘરવખરીને મોટું નુકસાન છે. ત્યારે આજે વરસાદી તારાજીની પણ અનેક તસવીરો સામે આવી છે. 

સ્કૂલ બસ નદીમાં ખાબકી
ત્યારે જામનગરના કાલાવાડમાં સ્કૂલ બસ નદીમાં ખાબકતા બસમાં સવાર વિદ્યાર્થીઑના જીવ પડીકે બંધાયા હતા. નાના વડાળા ગામમાં કોઝવે પરથી ખાનગી શાળાની બસ પસાર થઈ રહી હતી તે દરમિયાન ધસમસતા પ્રવાહને લીધે તે કોઝવે પરથી નીચે ખાબકી હતી. આ સમયે બસમાં ડ્રાઈવર સહિત 11 લોકો હાજર હતા જેમાં 8 વિદ્યાર્થિનીઓ અને બે શિક્ષકો હતા. બસ નદીમાં પલટી મારી જતા બે શિક્ષકોની મદદથી વિદ્યાર્થિનીઓ પણ બસના છાપરા ઉપર ચડી ગઈ હતી. જે બાદ ગ્રામજનો અને ફાયરની ટીમે વિદ્યાર્થીઓને સુરક્ષિત બહાર કાઢ્યા હતા.2 કલાક ચાલેલું રેસ્ક્યૂ ઓપરેશન પણ સુરક્ષિત રીતે દોરડા બાંધી કરવામા આવ્યું હતું.

108 એમ્બ્યુલન્સ ફસાઈ
તો આ તરફ દ્વારકાના ક્લ્યાણપુર તાલુકાના રાણ ગામે ધોધમાર વરસાદ વરસ્યો હતો જે કારણે રેણુકા નદીમાં પૂર આવ્યું હતું.રેણુકા નદી બે કાંઠે વહેતા 108 એમ્બ્યુલન્સ સામે કાંઠે ફસાઈ ગઈ હતી.પૂરને કારણે વાહન વ્યવહાર બંધ થયો છે. 

માંડવી ભુજ હાઈવે પર વરસાદી વહેણ
ભારે વરસાદની આગાહી મુજબ કચ્છમાંથી પણ તારાજીની તસવીર સામે આવી રહી છે. માંડવી તાલુકામાં ભારે વરસાદથી રસ્તા પર નદી વહી હોય તેવી સ્થિતિ ઊભી થઈ છે.માંડવી-ભુજ હાઈવે પર વરસાદી વહેણથી વાહનચાલકો મુશ્કેલીમાં મુકાયા છે. 

સ્કૂલ બસ પાણીમાં ફસાઈ
તો બીજી તરફ વાપીમાં મેઘાએ ધડબડાટી બોલાવી છે. રેલવે અંડરપાસમાં પાણી ભરાતા સ્કુલ બસ ફસાઇ હતી.બસમાં 20થી વધુ વિદ્યાર્થીઓ સવાર હતા. પણ સ્થાનિકોએ દોરડા વડે સુરક્ષિત રીતે તમામ બાળકોને રેકસ્યું કરી સુરક્ષિત બહાર કાઢી લીધા હતા.