મેઘ મલ્હારમ / રાજ્યના અનેક વિસ્તારોમાં મેઘરાજા મન મૂકીને વરસ્યા, વરસાદને પગલે ખેડૂતોમાં ખુશીનો માહોલ

• સમગ્ર ગુજરાતમાં વરસાદી માહોલ
• ક્યાંક ભારે પવન તથા ગાજવીજ સાથે વરસાદ
• આગામી 5 દિવસમાં હળવાથી ભારે વરસાદની આગાહી 

સુરેન્દ્રનગર જિલ્લામાં પણ વરસાદી માહોલ જામ્યો છે. વાદળછાયા વાતાવરણ વચ્ચે વરસાદ શરૂ થયો છે. વઢવાણમાં ધીમીધારે વરસાદ શરૂ થયો છે. તો જિલ્લાના અન્ય ગ્રામ્ય વિસ્તારમાં પણ વરસાદ વરસી રહ્યો છે. ત્યારે વરસાદના કારણે રસ્તાઓ પાણી પાણી થઇ ગયા છે. 

અમરેલીમાં ગાજવીજ સાથે વરસાદ 

ઉલ્લેખનીય છે કે, અમરેલી જિલ્લામાં પણ મેઘરાજાએ ધમાકેદાર એન્ટ્રી કરતા અસહ્ય ગરમી અને ઉકળાટથી લોકોને રાહત મળી છે. અમરેલીના વડિયામાં બીજા દિવસે પવન અને ગાજવીજ સાથે અમરેલીમાં વરસાદ પડી રહ્યો છે. વાવણી લાયક વરસાદ થતો ખેડૂતોમાં ખુશી જોવા મળી રહી છે.

દક્ષિણ ગુજરાતમાં મેઘ મલ્હારમ

દક્ષિણ ગુજરાતમાં છેલ્લા ચાર-પાંચ દિવસથી વરસાદી વાતાવરણ સર્જાયું છે. જેમાં છેલ્લા બે દિવસથી ધોધમાર વરસાદ પડી રહ્યો છે. છેલ્લા 24 કલાકમાં દક્ષિણ ગુજરાતમાં સૌથી વધુ વરસાદ સુરત સિટીમાં બે ઈંચ જેટલો વરસાદ પડ્યો છે.

 જ્યારે સુરત જિલ્લાના ઓલપાડ તાલુકામાં 1.5 ઈંચ જેટલો વરસાદ પડ્યો છે. આગામી બે દિવસ વાદળછાયું વાતાવરણ અને સુરત સહિત દક્ષિણ ગુજરાતના જિલ્લાના કેટલાક વિસ્તારમાં હળવાથી મધ્યમ વરસાદ પડવાની આગાહી છે

ગીર સોમનાથમાં જામ્યો વરસાદી માહોલ 

ગીર સોમનાથમાં વરસાદી માહોલ જામ્યો છે. ગીર સોમનાથ સહિતના વિસ્તારમાં વરસાદ વરસી રહ્યો છે. સુત્રાપાડા, કોડિનાર તાલુકામાં ધીમીધારે વરસાદ શરૂ થયો છે. તો વરસાદના કારણે વાતાવરણમાં ઠંડક પ્રસરી છે. 

રાજકોટમાં મેધરાજાએ કરી એન્ટ્રી

રાજકોટમાં મેધરાજાએ એન્ટ્રી કરી છે. વાદળછાયા વાતાવરણ વચ્ચે ધીમી ધારે વરસાદ શરૂ થયો છે.  રાજકોટ શહેરમાં મવડી,યુનિવર્સિટી રોડ,કાલાવડ રોડ પર વરસાદ શરૂ થયો છે. તો મોટા મૌવા વિસ્તારમાં મુશળધાર વરસાદ વરસી રહ્યો છે.

જૂનાગઢમાં સવારથી મેઘરાજાની પધરામણી

જૂનાગઢ જિલ્લામાં પણ આજ સવારથી મેઘરાજાની પધરામણી થઇ છે. જૂનાગઢમાં કેશોદ, માણાવદર સહિતના ગામમાં વાદળછાયા વાતાવરણ વચ્ચે ધીમી ધારે વરસાદ પડતાં વાતાવરણમાં ઠંડક છવાઇ ગઇ છે. તેમજ વાવણી લાયક વરસાદ પડતાં ખેડૂકો ખુશખુશાલ થઇ ગયા છે. સવારથી વરસી રહેલા વરસાદના કારણે ખેતરોમાં પાણી ભરાઇ ગયા છે.

24 કલાકમાં 103 તાલુકાઓમાં વરસાદ નોંધાયો

રાજ્યમાં છેલ્લા 24 કલાકમાં 103 તાલુકાઓમાં વરસાદ નોંધાયો છે. રાજ્યમાં સૌથી વધુ જામજોધપુર અને ખાંભામાં અઢી અઢી ઈંચ વરસાદ નોંધાયો છે.. જ્યારે સાવરકુંડલામાં સાવરકુંડલામાં સવા બે ઈંચ, રાજુલામાં સવા 2 ઈંચ, સુરતમાં 2 ઈંચ, કોટડાસાંગાણીમાં 2 ઈંચ, રાપરમાં પોણા બે ઈંચ, ઉપલેટામાં પોણા બે ઈંચ, ઓલપાડમાં પોણા બે ઈંચ, જસદણમાં દોઢ ઈંચ, મહુવામાં દોઞ ઈંચ, બાબરામાં સવા ઈંચ, ડભોઈમાં સવા ઈંચ, જેતપુરમાં સવા ઈંચ, ધારીમાં સવા ઈંચ, વંથલીમાં 1 ઈંચ, બગસરામાં 1 ઈંચ, હારીજમાં 1 ઈંચ, જેસરમાં 1 ઈંચ અને ધ્રોલમાં 1 ઈંચ વરસાદ નોંધાયો છે. 

રાજ્યમાં વરસાદની આગાહી 

ગુજરાત પર મહેરબાન રહેશે મેઘરાજા. સતત પાંચ દિવસ સુધી રાજ્યને ઘમરોળતો રહેશે વરસાદ. રાજ્યમાં આગામી પાંચ દિવસ સુધી વરસાદી માહોલ યથાવત રહેશે. સૌરાષ્ટ્ર, મધ્ય ગુજરાત તેમજ ઉત્તર ગુજરાત ભારેથી હળવો વરસાદ ખાબકશે. આગામી 5 દિવસ સુધી રાજ્યના મોટાભાગના શહેરોમાં ભારે પવન સાથે વરસાદ વરસી શકે છે. હવામાન વિભાગ અનુસાર, આગામી 5 દિવસ રાજ્યમાં વરસાદી માહોલ રહેશે. બે દિવસ સૌરાષ્ટ્રમાં ભારે વરસાદ વરસી શકે છે. ત્યારબાદ ઉત્તર ગુજરાત, મધ્ય ગુજરાત, દક્ષિણ ગુજરાત અને સૌરાષ્ટ્રમાં વરસાદ રહેશે. 

આગામી 10 અને 11 જૂને ગુજરાતમાં વરસાદની આગાહી 

ગુજરાતમાં 10 અને 11 જૂને ભારે વરસાદની આગાહી કરવામાં આવી છે. જેમાં અમરેલી, ભાવનગર, બોટાદ, રાજકોટ, દ્વારકા, જામનગર, મોરબી, સુરેન્દ્રનગર, કચ્છ, અમદાવાદ, ગાંધીનગર, મહેસાણા, પાટણ, સાબરકાંઠા, ખેડા, ડાંગ, તાપી, દાહોદમાં ભારે પવન સાથે વરસાદ પડવાની સંભાવના છે.