રાજ્યમાં છેલ્લા 24 કલાકમાં 57 તાલુકામાં વરસાદ નોંધાયો છે. રાજ્યમાં સૌથી વધુ અમરેલીના વડિયા તાલુકામાં પોણા બે ઈંચ વરસાદ નોંધાયો છે. તો ભાવનગરમાં 15 મિનિટમાં 1 ઇંચ જેટલો વરસાદ ખાબક્યો હતો. તો અમરેલી, દાહોદ, પંચમહાલ, અરવલ્લી, બોટાદ, સાબરકાંઠાના કેટલાક વિસ્તારોમાં ધોધમાર વરસાદ ખાબક્યો છે.
રાજ્યમાં વરસાદી માહોલ
રાજ્યના અનેક પંથકમાં મેઘરાજા મહેરબાન
ખેડૂતો ખુશ, વાતાવરણમાં ઠંડક પ્રસરી
રાજ્યમાં વરસાદી માહોલ જોવા મળી રહ્યો છે. ત્યારે રાજ્યના અનેક જિલ્લામાં આજે વરસાદ ખાબક્યો હતો. ત્યારે સૌરાષ્ટ્રના વાતાવરણમાં આજે પલ્ટો જોવા મળ્યો હતો. ભાવનગરમાં 15 મિનિટમાં 1 ઇંચ જેટલો વરસાદ ખાબક્યો હતો. તો વરસાદને પગલે ખેડૂતોમાં પણ આનંદની લાગણી છવાઇ છે. ત્યારે શહેરીજનોને ગરમીમાં રાહત મળી છે.
અમરેલીના બાબરા અને વડિયામાં વરસાદ
અમરેલીના બાબરામાં પણ વરસાદી માહોલ છવાયો છે. ગાજવીજ સાથે બાબરામાં વરસાદ પડ્યો હતો. ચમારડી, ચરખા સહિતના ગામોમાં વરસાદ ખાબક્યો હતો. વરસાદને પગલે રસ્તાઓ પાણી પાણી થયા હતા. તો અમરેલીના વડિયામાં પોણા બે ઈંચ વરસાદ ખાબક્યો હતો. બાબરામાં બપોર બાદ વીજળીના કડાકા ભડાકા સાથએ ધોધમાર વરસાદ વરસ્યો હતો.
અરવલ્લીમાં સાર્વત્રિક વરસાદ
અરવલ્લીમાં ગાજવીજ સાથે સાર્વત્રિક વરસાદ પડ્યો છે. અરવલ્લીના મોડાસામાં મેઘરાજા મન મુકી વરસ્યા હતા. મોડાસાના સરડોઇમાં ભારે પવન સાથે ધોધમાર વરસાદ ખાબક્યો હતો. સરડોઇમાં અડધો કલાકમાં જ ભારે પવન સાથે એક ઇંચથી વધુ વરસાદ ખાબક્યો હતો. મોડાસાના ઇસરોલ, દધાલિયા, વરથુમાં વરસાદ થયો છે. ભારે વરસાદને કારણે ગામની શેરીઓમાં નદીઓ વહેતી થઇ હતી. ડુંગર પરથી ધસમસતા પાણીનો પ્રવાહ બજારમાં ફરી વળ્યો હતો. ભારે વરસાદને કારણે બજારમાં ઘુંટણસમા પાણી ભરાયા હતા. તો મેઘમહેરથી ખેડૂતોમાં ખુશીનો માહોલ જોવા મળી રહ્યો છે.
દાહોદના સંજેલીમાં પવન સાથે વરસાદ
દાહોદમાં મેઘરાજા મહેરબાન થયા છે. જિલ્લાના સંજેલીમાં પવન સાથે વરસાદ પડ્યો હતો. સંજેલી સહિત ગ્રામ્ય વિસ્તારમાં પણ મેઘો જામ્યો હતો. વરસાદને પગલે ઉભા પાકને ફાયદો થયો છે.
પંચમહાલના ગોધરા અને હાલોલમાં વરસાદ
વાદળછાયા વાતાવરણ વચ્ચે ગોધરામાં ધીમીધારે વરસાદ થયો છે. તો હાલોલ પથંકમાં પણ વરસાદ થયો છે. શાકમાર્કેટ વિસ્તારમાં વરસાદનું પાણી ભરાયું છે. જેમાં નીચાણવાળા વિસ્તારોમાં વરસાદનું પાણી ભરાય ગયું છે.
લાંબા વિરામ બાદ ગઢડા પંથકમાં વરસાદ
બોટાદમાં લાંબા વિરામ બાદ ગઢડા પંથકમાં વરસાદ થયો છે. વાવણી બાદ વરસાદ થતા ખેડુતોમાં આનંદ થયો છે. ગઢડા શહેર અને તાલુકાના ગ્રામ્ય વિસ્તારમાં વરસાદી માહોલ જોવા મળ્યો છે.
સાબરકાંઠા જિલ્લામાં ગાજવીજ સાથે ધોધમાર વરસાદ
સાબરકાંઠા જિલ્લામાં ગાજવીજ સાથે મેઘરાજાએ એન્ટ્રી કરતા ખેડૂતોમાં ખુશીનો માહોલ છે. વાવણી બાદ વરસાદ થતાં આ વરસાદને ખેડૂતો આશીર્વાદ રૂપ માની રહ્યાં છે. મગફળી,કપાસ,દિવેલા સોયાબીન પાક માટે આ વરસાદ ફાયદાકારક છે. સાબરકાઠામાં મેધરાજા મનમૂકીના વરસતા ગરમી અને બફારાથી લોકોને રાહત મળી છે.