ચોમાસાના આંકડા / ગુજરાતમાં 96 ટકા વરસાદ, સૌથી વધુ આ જિલ્લામાં ખાબક્યો, આખુ વર્ષ ન ખૂટે એટલો જળસંગ્રહ

• રાજ્યમાં મોસમનો સરેરાશ ૯૬ ટકા વરસાદ નોંધાયો
• કચ્છ ઝોનમાં સૌથી વધુ ૧૫૦ ટકા વરસાદ 
• રાજ્યના ૫૩ જળાશયો સંપૂર્ણ છલકાયા 

રાજ્યમાં સચરાચર મેઘમહેરને લઈને ચાલુ વર્ષે મોસમનો કુલ સરેરાશ ૯૬ ટકા વરસાદ નોંધાયો છે, જેમાં કચ્છ ઝોનમાં સૌથી વધુ ૧૫૦ ટકા જેટલો વરસાદ વરસ્યો છે. વધુમાં દક્ષિણ ગુજરાત ઝોનમાં ૧૦૬.૪૬ ટકા, સૌરાષ્ટ્ર ઝોનમાં ૮૭.૯૪ ટકા, પૂર્વ ગુજરાતમાં ૭૮.૯૪ ટકા અને ઉત્તર ગુજરાતમાં ૯૫.૧૭ ટકા મોસમનો કુલ સરેરાશ વરસાદ નોંધાયો હોવાનું સતાવાર રીતે જાહેર થવા પામ્યું છે. બીજી બાજુ ડેમોમાં પણ મોટા પાયે જળરાશિની આવક થતાં હવે આખુ વર્ષ ન ખૂટે એટલો જળસંગ્રહ થયો છે.

દાંતીવાડા તાલુકામાં સૌથી વધુ ૭ ઇંચ વરસાદ વરસ્યો

આજે સવારે ૨૪ કલાક દરમિયાન બનાસકાંઠા જિલ્લાના દાંતીવાડા તાલુકામાં સૌથી વધુ ૭ ઇંચ વરસાદ વરસ્યો છે જયારે પાલનપુરમાં ૧૩૧ મિ.મી., જુનાગઢ તાલુકા અને જુનાગઢ શહેરમાં ૧૧૫ મિ.મી., વાડિયામાં ૧૦૫ મિ.મી., વંથલીમાં ૧૦૩ મિ.મી., મળી કુલ ૬ તાલુકાઓમાં ૪ ઈંચથી વધુ વરસાદ વરસ્યો છે.આ ઉપરાંત જુનાગઢ જિલ્લાના માણાવદર અને ડીસા તાલુકામાં ૯૩ મિ.મી. સુઈગામમાં ૯૨ મિ.મી., જેતપુરમાં ૯૧ મિ.મી., ધોરાજીમાં ૮૬ મિ.મી., ઉમરપાડામાં ૭૮ મિ.મી., લખપતમાં ૭૭ મિ.મી., અને વલસાડમાં ૭૫ મિ.મી. મળી કુલ ૮ તાલુકાઓમાં ૩ ઇંચથી વધુ વરસાદ નોંધાયો છે.

૧૨ તાલુકાઓમાં ૨ ઈંચથી વધુ વરસાદ નોંધાયો

એજ રીતે સુરત જિલ્લાના ઓલપાડ તાલુકામાં ૭૧ મિ.મી., અમીરગઢમાં ૬૭ મિ.મી., સિદ્ધપુર ૬૬ મિ.મી., ભેસાણ અને ખેરગામમાં ૬૩ મિ.મી., વિસાવદરમાં ૬૨ મિ.મી., રાપરમાં ૬૧ મિ.મી., કુતિયાણામાં ૬૦ મિ.મી., અબડાસણામાં ૫૬ મિ.મી., પલસાણામાં ૫૬ મિ.મી., પોશીનામાં ૫૩ મિ.મી., સરસ્વતીમાં ૫૦ મિ.મી., મળી કુલ ૧૨ તાલુકાઓમાં ૨ ઈંચથી વધુ વરસાદ નોંધાયો છે.જ્યારે રાજ્યના અન્ય કુલ ૬૧ તાલુકાઓમાં એક ઈંચથી વધુ વરસાદ વરસ્યો હોવાનું જણાવા મળી રહ્યું છે.

૨૦૭ જળાશયોમાં ૭૯ ટકાથી વધુ જળસંગ્રહ

બીજી બાજુ સાર્વત્રિક વરસાદને લઈને ૨૦૭ જળાશયોમાં ૭૯.૬૮ ટકા જેટલો જળસંગ્રહ થયો છે. જયારે રાજ્યની જીવાદોરી સમાન સરદાર સરોવર યોજનામાં ૨,૯૬,૮૯૭ એમ.સી.એફ.ટી. એટલે કે કુલ સંગ્રહ શક્તિના ૮૮.૮૭ ટકા જેટલો જળસંગ્રહ થયો છે. રાજ્યના જળસંપત્તિ વિભાગના ફ્લડ સેલ દ્વારા મળેલાં અહેવાલો મુજબ સરદાર સરોવર સિવાય રાજ્યના ૨૦૬ જળાશયોમાં ૪,૧૪,૧૦૩ એમ.સી.એફ.ટી. એટલે કે કુલ જળસંગ્રહ શક્તિના ૭૪.૧૯ ટકા જેટલો જળસંગ્રહ થયો છે. આ ઉપરાંત રાજ્યમાં ૫૩ જળાશયોમાં ૧૦૦ ટકાથી વધુ જળસંગ્રહ થયો છે. જયારે સરદાર સરોવર સહીત ૬૪ જળાશયોમાં ૭૦થી ૧૦૦ ટકા, ૩૧ જળાશયોમાં ૫૦થી ૭૦ ટકા, ૨૯ જળાશયોમાં ૨૫થી ૫૦ ટકા અને ૨૯ જળાશયોમાં ૨૫ ટકાથી ઓછો જળસંગ્રહ થયો છે. જેમાં ઉત્તર ગુજરાતના ૧૫ જળાશયો, મધ્ય ગુજરાતના ૧૭, દક્ષિણ ગુજરાતના ૧૩, કચ્છના ૨૦ અને સૌરાષ્ટ્રના ૧૪૧ જળાશયોનો સમાવેશ થાય છે. અત્રે ઉલ્લેખનીય છે કે, રાજ્યમાં ૫૨ જળાશયો ૧૦૦ ટકાથી વધુ જ્યારે ૩૨  જળાશયો ૯૦ ટકાથી ૧૦૦ ટકા વચ્ચે ભરાતા હાઈએલર્ટ પર છે.