મેઘમહેર / અમદાવાદ શહેરમાં મેઘરાજાની ધમાકેદાર રિએન્ટ્રી, ભારે પવન સાથે વરસાદ

અમદાવાદના એસ.જી. હાઇ-વે, જજીસ બંગલો, બોડકદેવ, થલતેજ, નહેરૂનગર, સેટેલાઈટ, વેજલપુર, શિવરંજની અને ઘાટલોડિયામાં પણ વરસાદ થયો છે. તેમજ જીવરાજ પાર્ક, પાલડી, નરોડા, કૃષ્ણનગર, ઠક્કરનગરમાં ભારે વરસાદ થયો છે. તેમજ પૂર્વ વિસ્તારના નારોલ, બાપુનગર, ઓઢવ, હાટકેશ્વર, ઇસનપુર સહિતના વિસ્તારમાં વરસાદ મનમૂકીને વરસ્યો હતો. નવરંગપુરા, નારાણપુર, ઇન્કમટેક્સમાં ધીમીધારે વરસાદ શરૂ છે. શાહીબાગ, દિલ્હી દરવાજા, કાલુપુરમાં વરસાદ થયો છે. ઘોડાસર, વિશાલા, નારોલ વિસ્તારમાં પણ વરસાદ થયો છે. 

ભારે વરસાદથી ધારીની સ્થાનિક નદીમાં પુર

રાજ્યમાં વરસાદની આગાહીની વચ્ચે અમરેલીના ધારીના છતડીયા ગામે મેધરાજાએ ધમાકેદાર એન્ટ્રી કરી છે. ભારે વરસાદને પગલે નદીઓ બે કાંઠે વહેતી થઈ છે અને સ્થાનિક નદીઓમાં પુર આવ્યું છે. જો કે નદીમાં પાણીની આવક થતા સ્થાનિકોમાં ખુશી જોવા મળી છે. ધોધમાર વરસાદથી ગીરના જંગલમાં નાળાઓ છલકાયા છે. અમરેલીના પીપળવા, શિરનેસમાં સારો વરસાદ થયો છે. તેમજ જર ગામના ડેમની સપાટીમાં વધારો થયો છે. આ વરસાદથી ખેડૂતોમાં ખુશી જોવા મળી છે.

પાલનપુરમાં ધોધમાર વરસાદ અને ભારે પવનથી ટાવર ધરાશાયી

આગાહીના પગલે બનાસકાંઠાના પાલનપુરમાં પવન સાથે ધોધમાર વરસાદ થયો છે. ભારે પવનથી ટાવર ધરાશાય થયો છે. તેમજ નેટવર્ક સેવાઓ ખોરવાઈ ગઇ છે. ભારે વરસાદથી લોકોએ ભારે મુશ્કેલી અને અગવડ વેઠવાનો વારો આવ્યો છે. તેમજ કેટલાય ધંધાર્થીઓને મુશ્કેલી પડી હતી.

ભાવનગરમાં સાર્વત્રિક વરસાદ

ભાવનગર જિલ્લામાં સાર્વત્રિત વરસાદ થયો છે. ભાવનગર શહેરમાં પણ ધોધમાર વરસાદ થયો છે. પાલીતાણા, વલ્લભીપુર, ઉમરાળામાં વરસાદ થયો છે. તો બીજી તરફ મહુવા, તળાજા સહિત વિસ્તારોમાં વરસાદ થયો છે. તેમજ ગારીયાધર, જેસરમાં પણ ધોધમાર વરસાદ થયો છે. અને તાતણીયા ગામે નદીમાં પુર આવ્યું છે.

હવામાન વિભાગની આગાહી

હવામાન વિભાગે આગામી 24 કલાકમાં ભારે વરસાદની આગાહી કરી છે. દક્ષિણ-મધ્ય ગુજરાત અને સૌરાષ્ટ્રમાં ભારે વરસાદની આગાહી કરાઇ છે. બંગાળની ખાડીમાં લો પ્રેશર સર્જાયું છે. જેના કારણે ભરૂચ, સુરત, નવસારી અને વાપીમાં ભારે વરસાદ પડી શકે છે. આણંદ, ગાંધીનગર, અમદાવાદ અને વડોદરામાં સામાન્ય વરસાદ રહેશે. જ્યારે રાજકોટ, ભાવનગર, મોરબી અને ચોટીલામાં ભારે વરસાદની આગાહી કરાઇ છે.