કોરોના વાયરસે એક તરફ રાજ્યમાં હાહાકાર મચાવ્યો છે તો ગુજરાતમાં કમોસમી વરસાદની આફત આવી ચડી છે. હવામાન વિભાગની આગાહીને પગલે રાજ્યના કેટલાક વિસ્તારમાં છૂટાછવાયો વરસાદ પડ્યો હતો.
રાજ્યના કેટલાક વિસ્તારમાં કમોસમી વરસાદ
બનાસકાંઠાના ગ્રામ્ય વિસ્તારમાં વરસાદને પગલે વીજળી ડૂલ
આ અંગે મળતી જાણકારી પ્રમાણે આજે પાટણના વાતાવરણમાં એકાએક પલટો આવ્યો હતો. પાટણના આસપાસના વિસ્તારમાં વીજળીના ચમકારા અને ગાજવીજ સાથે ફૂંકાયો પવન હતો.
બનાસકાંઠામાં વરસાદ
તો આ તરફ બનાસકાંઠા જિલ્લાના ડિસામાં ગાજવીજ સાથે કમોસમી વરસાદ પડ્યો હતો. વાવાઝોડા સાથે વરસાદથી ખેડૂતોની ચિંતામાં વધારો થયો છે. બાજરી, જુવાર અને પાકોને નુકસાન થવાનો ભય જોવા મળ્યો હતો.
વાવાઝોડાને પગલે લાખણીના નોખા ગામે ઘરની છત ઉડી
વાવાઝોડાના કારણે ગ્રામ્ય વિસ્તારોમા વીજળી ડુલ થઇ હતી. તો ભારે પવનથી લાખણીના નોખા ગામે એક ઘરની છત ઉડી હતી. મકાનની છત ઉડી જતાં ઘરમા રાખેલો માસ-સામાન પલળતા નુકસાન થયું હતું તો થરા ખાતે જૈન પાંજરાપોળની છત ધરાશાયી થતા 5 પશુના મોત થયાં હતા.
સૌરાષ્ટ્રના કેટલાક વિસ્તારમાં વરસાદની આગાહી
ખેડૂતો માટે હવામાન વિભાગ દ્વારા ચિંતાના સમાચાર મળ્યા છે. હવામાન વિભાગે સૌરાષ્ટ્રમાં કમોસમી વરસાદની આગાહી કરી છે. આવતીકાલથી 3 દિવસ સુધી સૌરાષ્ટ્રના વાતાવરણમાં પલટો રહેશે. વાતાવરણમાં સાયકલોનીક સર્કયુલેશનની અસર રહેશે.
જેને લઈને રાજકોટ,અમરેલી, જૂનાગઢ અને ગીર સોમનાથમાં સામાન્ય વરસાદની આગાહી કરવામાં આવી છે. તેમજ 30 થી 40 કિલોમીટરની ઝડપે પવન ફૂંકાવાની પણ આગાહી કરી છે.