અમદાવાદમાં ભારે પવન સાથે ધોધમાર વરસાદ, બોડકદેવ, સોલા નવરંગપુરા અને વસ્ત્રાપુર વિસ્તારમાં મેઘ મહેર
અમદાવાદમાં વરસાદની તોફાની બેટિંગ
શહેરના અનેક વિસ્તારમાં વરસાદી મહેર
ટ્રાફિક જામના દ્રશ્યો સર્જાયા
હવામાન વિભાગે 5 દિવસ અતિભારે વરસાદની આગાહી કરી છે ત્યારે અમદાવાદમાં લાંબાસમય બાદ ધમાકેદાર વરસાદ વરસાતા શહેરિજનો પ્રફુલ્લિત થઈ ઉઠયા છે તો બીજી તરફ ભારે વરસાદના પગલે રોડ પર ટ્રાફિક જામના દ્રશ્યો સર્જાયા છે. કડાકા ભડાકા સાથે અવિરત વરસી રહેલા વરસાદને લીધે અંડરપાસ બ્રિજમાં પાણી ભરાઈ જવાની વકી છે તો બીજી તરફ સુસવાટા સાથે જોરદાર પવન ફુંકાતા શહેરના રસ્તા પર ઝાડ પાડવાની પણ ઘટનાઓ સામે આવી રહી છે. આમ તો હાલ શહેરમાં સાર્વત્રિક વરસાદ પડી રહ્યો છે. જેમાં સૌથી વધુ સેટેલાઈટ,જજીસ બંગલો,વસ્ત્રાપુર,શિવરંજની, થલતેજ,વેજલપુર,સરખેજ,નારોલ, ઘાટલોડિયા,ઈસનપુર,વટવા, સોલા નવરંગપુરા અને વસ્ત્રાપુરમાં વરસાદ ધડબડાટી બોલાવી રહ્યો છે. ઘણા વિસ્તારોમાં પાણી ભરાવાથી પણ સમસ્યા સર્જાતાં તંત્રની પ્રિ મોન્સુનની કામગીરી સામે પણ સવાલ ઊભા થઈ રહ્યા છે.
રાજકોટમાં પણ વરસાદની રમઝટ
રાજ્યના અનેક જિલ્લાઓમાં આજે મેઘરાજાએ મહેર વરસાવી છે. ખાસ કરીને સૌરાષ્ટ્રમાં મેઘરાજાએ ધમાકેદાર બેટિંગ કરી છે.. રાજકોટ જિલ્લામાં પણ પવન સાથે વરસાદ પડ્યો છે. ગેલેક્સી ટોકીઝ પાસે જોરદાર પવન ફૂંકાતા પાર્ક કરેલી કાર પર વર્ષો જુનું વૃક્ષ પડતા કારને નુકસાન પહોંચ્યું હતું.. તો દ્વારકા જિલ્લામાં પણ ધોધમાર વરસાદ પડતા ખેડૂતોમાં ખુશીનો માહોલ જોવા મળ્યો છે. તો હવામાન વિભાગની આગાહીના પગલે નવસારી જિલ્લામાં ગણદેવી, બીલીમોરા સહિતના વિસ્તારોમાં ભારે પવન સાથે ધોધમાર વરાસદ વરસ્યો છે. તો આ તરફ તાપી જિલ્લાના સોનગઢ તાલુકામાં મેઘરાજાએ રમઝટ બોલાવી છે. ભારે પવન સાથે ધોધમાર વરસાદ પડતા અનેક વૃક્ષો ધરાશાયી થયા હતા.
શનિવારે ક્યાં ક્યાં પડયો હતો વરસાદ
ગઇકાલે ગુજરાતમાં સૌથી વધુ જૂનાગઢના માણાવદરમાં 2 ઈંચ વરસાદ નોંધાયો છે તો વિસાવદરમાં 2 ઈંચ, ઉપલેટામાં 1.8 ઈંચ, વેરાવળમાં 1.3 ઈંચ, લાઠીમાં 1.3 ઈંચ, ગોંડલમાં 1 ઈંચ વરસાદ નોંધાયો છે. જ્યારે વંથલીમાં 0.8 ઈંચ વરસાદ, ધોરાજીમાં 0.8 ઈંચ અને બગસરામાં 0.8 ઈંચ વરસાદ નોંધાયો છે.
હવામાન વિભાગની શું છે આગાહી?
ગુજરાતમાં દક્ષિણ ગુજરાત અને સૌરાષ્ટ્રમાં બરાબર ચોમાસું જામી ગયું છે. ત્યારે હવામાન વિભાગે રાજ્યમાં આગામી 5 દિવસ સુધી ભારે વરસાદની આગાહી કરી છે. હવામાન વિભાગે સૌરાષ્ટ્ર અને દક્ષિણ ગુજરાતમાં ભારે વરસાદની આગાહી કરી છે. દક્ષિણ ગુજરાતમાં સુરત, વલસાડ અને ડાંગ, નવસારી અને તાપીમાં વરસાદની આગાહી કરી છે. સાથે દાદરા નગર હવેલીમાં પણ સાર એવા વરસાદની હવામાન વિભાગે આગાહી કરી છે.બીજી બાજુ સૌરાષ્ટ્રમાં અમરેલી, ભાવનગર, જૂનાગઢ, ગીર સોમનાથ, રાજકોટ, સુરેન્દ્રનગર અને જામનગરમાં પણ સારા વરસાદની આગાહી કરાઇ છે. આથી ભારે વરસાદની આગાહી વચ્ચે માછીમારોને 3 દિવસ સુધી દરિયો ન ખેડવા અંગેની સૂચના અપાઇ છે. જો કે, બીજી બાજુ અમદાવાદ, ગાંધીનગર અને વડોદરાવાસીઓએ હજુ વરસાદ માટે રાહ જોવી પડી શકે છે.