શહેરમાં છેલ્લા ત્રણ દિવસથી વરસાદી માહોલ જામેલો છે પણ જેવા કાળા ડીંબાગ વાદળો છવાયેલા છે તેવો વરસાદ પડી રહ્યો નથી. શહેરમાં અત્યાર સુધીમાં સિઝનનો કુલ ૭.૨૯ ઇંચ વરસાદ પડયો છે.
સમગ્ર રાજ્યમાં વરસાદી માહોલ છવાયો છે. જ્યારે અમદાવાદમાં ત્રણ દિવસથી ધીમી ધારે ઝરમર ઝરમર વરસાદ વરસી રહ્યો છે. શહેરના વિવિધ વિસ્તારમાં ધીમીધારે સતત વરસાદ વરસી રહ્યો છે. અમદાવાદના બાપુનગર, સરસપુર, ખોડિયારનગર, કાલુપુર, એલિસબ્રિજ, શિવરંજની, બોડકદેવ અને એસ.જી. હાઇવે સહિત શહેરના તમામ વિસ્તારમાં વરસાદ વરસી રહ્યો છે.
રાજ્યમાં સૌથી વધુ વરસાદ દક્ષિણ ગુજરાતમાં વલસાડ અને ડાંગ જિલ્લામાં પડ્યો છે. જ્યારે સૌરાષ્ટ્રમાં રાજકોટ અને જામનગર જિલ્લાઓમાં ભારે વરસાદ પડ્યો છે. જેના પગલે નદીઓમાં પૂર આવ્યાં હતાં અને ઠેર ઠેર રસ્તાઓ પાણીમાં ડૂબી ગયા છે.