લાંબા અંતરાલ બાદ રાજ્યમાં વિવિધ સ્થળે આજથી ફરી વરસાદી માહોલ શરૂ થયો છે. દિવસભર અસહ્ય ઉકળાટ બાદ સાંજે ગુજરાતના મોટા ભાગના વિસ્તારોમાં વિસ્તારમાં વરસાદ પડ્યો હતો.
ગુજરાતમાં મેઘરાજાની ફરી ધમાકેદાર બેટિંગ
અમદાવાદ, સૌરાષ્ટ્ર તથા ઉત્તર ગુજરાતમાં સર્વત્ર મેઘ મહેર
ઉલ્લેખનીય છે કે, અમદાવાદમાં આજે સવારથી જ વાદળ છાયું વાતાવરણ જોવા મળ્યું હતું. જો કે, બપોર બાદ એકાએક શહેરના થલતેજ, સતાધાર, પારસનગર, રાણીપ, વાડજ, RTO, બોડકદેવ, થલતેજ, એસ.જી હાઈવે તથા માનસી ચારરસ્તા, સિંધુભવન રોડ પર પવન સાથે વરસાદ પડ્યો હતો. અચાનક આવેલા વરસાદને પગલે સ્થાનિકોમાં ખુશીનો માહોલ જોવા મળ્યો હતો.
દેવભૂમિ દ્વારકાના ખંભાળીયા ગામમાં ફરી વરસાદ
સતત વરસી રહેલાં ભારે વરસાદે દેવભૂમિ દ્વારકાના ખંભાળીયા ગામમાં ધીમીધારે વરસાદ થયો છે. આ સાથે રામનગર, ગાયત્રી નગરમાં વરસાદ થતા પાણી ભરાય ગયા છે. અને ધરાનગર, જોધપુર નાકામાં ધીમીધારે વરસાદ શરૂ છે. લોકોને જીવન જરૂરિયાતની વસ્તુ લેવા જવા માટે મુશ્કેલી થઇ રહી છે.
માળીયા હાટીના ભાખરવડ ડેમ ઓવરફ્લો
જૂનાગઢના માળીયા હાટીના ભાખરવડ ડેમ ઓવરફ્લો થયો છે. મેઘલ નદી પર આવેલ ભાખરવડ ડેમ ઓવરફ્લો થતા સ્થાનિકો અને ખેડુતોમાં ખુશી જોવા મળી છે. ઉપરવાસમાં વરસાદ થવાથી ડેમ ઓવરફ્લો થયો છે.
મહેસાણામાં વરસાદને પગલે ઠંડક પ્રસરી
લાંબા અંતરાલ બાદ મહેસાણામાં પણ આજથી વરસાદી માહોલ શરૂ થયો છે.દિવસભર અસહ્ય ઉકળાટ બાદ સાંજે મહેસાણા શહેર સહિત જિલ્લાના તમામ વિસ્તારમાં વરસાદ પડ્યો હતો.જો કે,હજુ મહેસાણા જિલ્લામાં અપેક્ષા મુજબનો વરસાદ નથી થયો.પરંતુ આજે પડેલા વરસાદને કારણે વાતાવરણમાં ઠંડક પ્રસરી હતી.
સુરેન્દ્રનગર પંથકમાં વરસાદી માહોલ
આ તરફ સુરેન્દ્રનગર અને વઢવાણ સહિતના ગ્રામ્ય વિસ્તારમાં વરસાદી માહોલ સર્જાયો હતો. લીંબડી,ચુડા,સાયલા અને ચોટીલામાં પણ વરસાદ પડતા ખેડૂતોમાં આનંદની લાગણી ફરી વળી હતી.
મહીસાગર જિલ્લામાં સાર્વત્રિક વરસાદી માહોલ
મહીસાગર જિલ્લામાં સાર્વત્રિક વરસાદી માહોલ જોવા મળ્યો છે. બપોર બાદ શરૂ થયેલા ધોધમાર વરસાદમાં સૌથી વધુ વરસાદ ખાનપુર, કડાણા અને સંતરામપુરમાં વરસાદ થયો છે. અન્ય વિસ્તારોમાં પણ ધીમીધારે વરસાદ શરૂ થયો છે. જો કે, ઉપરવાસમાંથી પાણીની આવક યથાવત રહેતા કડાણા ડેમમાં પણ પાણીની આવક થઇ છે.
રાજકોટમાં વરસાદી માહોલ
આજે ગુજરાતમાં પવન પણ દક્ષિણ-પશ્ચિમને બદલે બદલાઈને પૂર્વનો અને દક્ષિણ-પૂર્વનો રહ્યો હતો. જેથી રાજકોટમાં વરસાદ શરૂ થયો છે. તેમજ બપોર બાદ વરસાદ શરૂ થયો છે. શહેરના કેટલાક વિસ્તારમાં ધીમીધારે વરસાદ શરૂ થયો છે. યાજ્ઞિક રોડ, હોસ્પિટલ ચોક અને એસ.ટી નજીકના વિસ્તારમાં વરસાદ થયો છે. તેમજ જિલ્લા પંચાયત ચોક, રેસ કોર્સ સહિતના વિસ્તારોમાં વરસાદ થયો છે.
કચ્છ પંથકમાં વરસાદ
કચ્છના ભુજમાં ધોધમાર વરસાદ થયો છે. બસ સ્ટેશન વિસ્તારમાં વરસાદી પાણી ભરાય ગયો છે. આખો બસ સ્ટેશન વિસ્તાર બેટમાં ફેરવાયો છે. તો ભુજના ગ્રામ્ય વિસ્તારોમાં ધોધમાર વરસાદ પડ્યો.
રાજ્યમાં વરસાદને લઈને હવામાન વિભાગે કરી છે આગાહી
રાજ્યમાં વરસાદને લઈને હવામાન વિભાગે આગાહી કરી છે. આગામી 12 અને 13 જુલાઈએ ભારે વરસાદ થાય તેવી શક્યતા છે. દક્ષિણ ગુજરાત અને સૌરાષ્ટ્રમા ભારે વરસાદની આગાહી છે. નવસારી, દમણ, દાદરા નગર હવેલી, ગીર સોમનાથ, જૂનાગઢમાં ભારે વરસાદની શક્યતા છે. રાજ્યમાં આગામી 5 દિવસ સુધી વરસાદી માહોલ રહેશે. જ્યારે આજે અને આવતીકાલે રાજ્યમાં સામાન્યથી મધ્યમ વરસાદ થઈ શકે છે..