અનરાધાર / ગુજરાતમાં મેઘરાજાની ધુંઆધાર બેટિંગ: 52 તાલુકામાં વરસાદ મન મૂકીને વરસ્યો, બનાસકાંઠામાં ભારે પવન ફુંકાતા નુકસાન

• સવારના 6થી 10 વાગ્યા સુધીમાં 52 તાલુકામાં વરસાદ
• આજે સૌથી વધુ જામજોધપુરમાં 1.5 ઈંચ વરસાદ વરસ્યો
• ગુજરાતમાં હજુ 2-3 દિવસ સુધી ભારે વરસાદની આગાહી

ગુજરાતમાં હજુ આગામી 2-3 દિવસ સુધી ભારે વરસાદની હવામાન વિભાગે આગાહી કરી છે. ત્યારે આજ રોજ સવારના 6થી 10 વાગ્યા સુધીમાં રાજ્યના 52 તાલુકામાં મેઘરાજા મન મૂકીને વરસ્યા છે.

આજે સૌથી વધુ જામજોધપુરમાં 1.5 ઈંચ વરસાદ વરસ્યો

રાજ્યમાં સવારના 6થી 10 વાગ્યા સુધીમાં વરસેલા વરસાદમાં આજે સૌથી વધુ જામજોધપુરમાં 1.5 ઈંચ વરસાદ વરસ્યો છે. તો ચોટીલામાં સવા ઈંચ, લોધિકામાં સવા ઈંચ, વલસાડમાં 1 ઈંચ, કોડીનારમાં 17 મીમી વરસાદ, વાગરામાં 17 મીમી, રાપરમાં 17 મીમી, થાનગઢમાં 17 મીમી, હાંસોટમાં 16 મીમી, લીમખેડામાં 14 મીમી અને વાપીમાં 13 મીમી વરસાદ વરસ્યો છે.

જુઓ આજે કઇ-કઇ જગ્યાએ મેઘરાજા વરસ્યા?

બનાસકાંઠા જિલ્લામાં પણ ભારે પવન સાથે વરસાદ ખાબક્યો

બનાસકાંઠા જિલ્લામાં પણ ભારે પવન સાથે વરસાદ વરસ્યો હતો. જેમાં પાલનપુર, સુઈગામ અને વડગામમાં 1 ઈંચ વરસાદ વરસ્યો. થરાદ વિસ્તારમાં ભારે પવન ફુંકાતા અનેક સેડ ઉડવા લાગ્યા હતા. થરાદના ડોડ ગામે ભારે પવનથી બાગાયતી પાકને પણ નુકસાન પહોંચ્યું હતું. ખેતરમાં બનાવેલ પશુઓ માટેના અનેક સેડ ભારે પવનથી પડી ભાંગ્યા.

હાલ સમગ્ર વિસ્તારમાં વરસાદી માહોલ જામ્યો છે

આજ સવારના 6થી અત્યાર સુધીમાં વરસેલા વરસાદની જો વાત કરીએ તો રાજ્યમાં આજે દાહોદ જિલ્લામાં વરસાદી માહોલ જામ્યો. દાહોદમાં ઝાલોદ, લીમડી, સિંગવડ, લીમખેડા, સંજેલી અને નાનસલાઈ વરોડમાં વરસાદ વરસ્યો. સમગ્ર વિસ્તારમાં વરસાદી માહોલ જામ્યો છે.

ખેડા અને બોટાદ જિલ્લામાં વહેલી સવારથી જામ્યો વરસાદી માહોલ

ખેડા જિલ્લામાં પણ વરસાદી માહોલ જામ્યો છે. ગળતેશ્વરના સેવાલીયામાં ધીમીધારે વરસાદ શરુ થઇ ગયો છે. તો બીજી બાજુ બોટાદ શહેર સહિત જિલ્લાના કેટલાક વિસ્તારોમાં વરસાદ વરસ્યો. શહેરમાં વહેલી સવારથી જ વરસાદી માહોલ જોવા મળ્યો હતો. બોટાદ શહેર તેમજ જિલ્લાના બરવાળા અને ગઢડામાં પણ વરસાદી માહોલ જામ્યો હતો.