રાજ્યમાં વરસાદી માહોલ જોવા મળી રહ્યો છે ત્યારે એક જ દિવસમાં 140 તાલુકાઓમાં વરસાદે રમઝટ બોલાવી
એક દિવસમાં રાજ્યના 140 તાલુકામાં વરસાદ
પંચમહાલના જાંબુઘોડામાં દોઢ ઈંચ જેટલો વરસાદ
ડભોઈ, સંખેડામાં પણ એક થી સવા ઈંચ વરસાદ
રાજ્યમાં વરસાદી માહોલ જોવા મળી રહ્યો છે. ઉત્તર ગુજરાત, સૌરાષ્ટ્ર, દ. ગુજરાત સહિત વરસાદી માહોલ જામ્યો છે. સારો વરસાદ થતા ખેડૂતોને સારુ ઉત્પાદન થાય તેવી આશા સેવાઇ છે. જો કે ક્યાંક વરસાદે તો જમાવટ બોલાવી દેતા નીચાણવાળા વિસ્તારો પાણીમાં ગરકાવ થયા છે. તો ક્યાંક ખેતરો પણ પાણી પાણી થયા છે. ત્યારે છેલ્લા 24 કલાકમાં વરસાદી માહોલની જો વાત કરીએ તો,
140 તાલુકામાં વરસ્યો વરસાદ
એક દિવસમાં રાજ્યના 140 તાલુકામાં વરસાદ વરસ્યો. પંચમહાલના જાંબુઘોડામાં દોઢ ઇંચ જેટલો વરસાદ વરસ્યો. ડભોઈ, સંખેડામાં પણ એક થી સવા ઈંચ વરસાદ વરસ્યો. મહુવા, વઘઈ, વાલોદ, મહેસાણામાં એક ઈંચ જેટલો વરસાદ વરસ્યો. બોડેલી, બારડોલી, ડેડિયાપાડા, ગણદેવીમાં પણ અડધા ઈંચ જેટલો વરસાદ વરસ્યો.
હવામાન વિભાગે શું કરી આગાહી ?
તો હવામાન વિભાગની આગાહી મુજબ આજે રાજ્યના કેટલાક વિસ્તારોમાં મધ્યમ વરસાદની શક્યતા છે. જેમાં સૌરાષ્ટ્ર-કચ્છ, દીવ-દમણમાં વરસાદ પડી શકે છે. આ સાથે સુરત, ડાંગ, નવસારી, વલસાડમાં પણ વરસાદની સંભવના છે. તો અમદાવાદ, ગાંધીનગર, સાબરકાંઠા, બનાસકાંઠા, દાહોદ, વડોદરામાં પણ વરસાદ પડી શકે છે. ઉલ્લેખનીય છે કે હવામાન વિભાગની આગાહી અનુસાર, રાજ્યમાં 22 ઓગસ્ટથી વરસાદની સિસ્ટમ સક્રિય થશે. ગઈકાલે રાજ્યના સૌરાષ્ટ્ર, કચ્છ, દમણ, દાદરા નગર હવેલીમાં વરસાદની આગાહી કરવામાં આવી હતી. જેમાં રાજ્યમાં મોરબી, સુરેન્દ્રનગર, જામનગર, દ્વારકા, પોરબંદર, રાજકોટ, જૂનાગઢ, અમરેલી, ગીર સોમનાથ, ભાવનગર અને બોટાદ જિલ્લામાં વરસાદની આગાહી કરાયા બાદ અનેક વિસ્તારોમાં વરસાદનું આગમન થયું હતું.