ગુજરાતમાં ચોમાસાની શરૂઆત થઇ ગઇ છે. રાજ્યમાં દક્ષિણ ગુજરાતમાંથી ચોમાસું શરૂ થયું છે. ત્યારે હવામાન વિભાગે 48 કલાક ભારે વરસાદની આગાહી કરી છે. દક્ષિણ, પૂર્વ અને મધ્ય ગુજરાતમાં ભારે વરસાદ પડી શકે છે. સાથે જ ભારે પવન ફૂંકાવાને લઇ માછીમારોને દરિયો ન ખેડવાની સૂચના આપી છે.
ગુજરાતમાં આખરે વરસાદની ધમાકેદાર એન્ટ્રી થઇ ચૂકી છે. દક્ષિણ અને મધ્ય ગુજરાતમાં વરસાદની ધમાકેદાર એન્ટ્રી થઈ છે. તો સૌરાષ્ટ્ર અને ઉત્તર ગુજરાતના કેટલાક વિસ્તારોમાં પણ વરસાદી માહોલ સર્જાયો છે.
મોરબી ધીમી ધારે વરસાદનું આગમન:
રાજ્ય ભરમાં ચોમાસાની શરૂઆત થયાની સાથે રાજ્યના તમામ જિલ્લાઓમાં વરસાદનુ આગમન થયુ છે. ત્યારે મોરબીમાં 2 દિવસના બફારા બાદ આજે ધીમી ધારે વરસાદનું આગમન થયુ છે. અચાનક વાતાવરણમાં પલટો આવતા સમગ્ર મોરબી શહેરમાં ગાજ વીજ સાથે મેધ રાજાનું આગમન થયુ છે. સવારથી જ સમગ્ર શહેરમાં વરસાદની શરૂઆત થતા વાતાવરમાં ઠંડક પ્રસરતા લોકોને ગરમીથી રાહત મળી છે. તો બીજી બાજુ વરસાદનુ આગમન થતાની સાથે જ ખેડૂતોમાં ખુશીની લહેર છવાઈ છે.
અમરેલી જિલ્લમાં વરસાદની શરૂઆત:
અમરેલીના સાવરકુડલમાં 2 દિવસના ભારે બફારા બાદ આજે સવારથી જ વાતાવરણમાં અચાનક પલ્ટો આવતા સમગ્ર સાવરકુડલામાં વરસાદની શરૂઆત થઈ છે. તો વંડા, મેકડા, વાશીયાળી, ભમોદ્રા, નાના લીલીયા સહિત ગ્રામ્ય પંથકમાં ધોધમાર વરસાદ પડયો છે. તો ધોધમાર વરસાદ પડતા વાતાવરણમાં ઠંડક પ્રસરતા લોકોને ગરમીથી રાહત મળી છે. તો બીજી બાજુ ભારે પ્રમાણમાં વરસાદ પડતા ખેડૂતોમાં આનંદ છવાયો.
ભાવનગરમાં મેઘરાજાનું અનોખી રીતે સ્વાગત:
ભાવનગરમાં મેઘરાજાનું અનોખી રીતે સ્વાગત કરવામાં આવ્યુ છે. અબીલ ગુલાલની છોળો ઉડાડી વરસાદને વધાવ્યો છે. તો દેડકા અને દેડકીને લાવીને અનોખી રીતે પૂજન કરીને નાળિયાર વધારીને મેઘરાજાને હજુ વધુ વરસાદ આપવા વિનંતી કરી છે.
સુરેન્દ્રનગરના જસાપરમાં વિજળી પડતાં 3 લોકોને ઇજા:
સુરેન્દ્રનગરના જસાપર ગામમાં વીજળી પડ્યાની ઘટના સામે આવી છે. જસાપર ગામની સીમમાં વરસાદી માહોલ વચ્ચે વીજળી પડી છે. ખેતરમાં કામ કરી રહેલી 2 મહિલા સહિત 4 વ્યક્તિ પર વીજળી પડી. જેમાં 3 વ્યક્તિ દાઝી જતાં સારવાર અર્થે હોસ્પિટલમાં ખસેડવામાં આવ્યા છે. આ તમામ લોકો ખેતરમાં કપાસ વીણવા માટે ગયા હતા. તે સમયે વીજળી પડતાં દોડધામ મચી ગઈ હતી.
અમદાવાદમાં વહેલી સવારથી વરસાદ:
આજે વહેલી સવારથી શહેરના પૂર્વ વિસ્તારોમાં વરસાદ શરૂ થઈ ગયો છે. શાહીબાગ, અસારવા, નરોડા અને મેઘાણીનગર વિસ્તારમાં ધીમીધારે વરસાદ વરસી રહ્યો છે. તો આ તરફ પશ્ચિમ અમદાવાદમાં પણ કેટલાક વિસ્તારોમાં વરસાદી માહોલ છવાયો છે.
સુરતમાં મોડી રાતથી વરસાદઃ
રાજ્યમાં ચોમાસાનો પ્રારંભ થયો છે. ત્યારે સુરતમાં પણ મોડી રાતથી વરસાદ જોવા મળ્યો છે. સુરતના વિવિધ વિસ્તારોમાં વરસાદ વરસતા લોકોમાં પણ ખુશી જોવા મળી છે. સુરતના વેડ, ડભોલી, કતારગામમાં વરસાદ પડતા લોકોને ગરમીથી આંશિક રાહત મળી છે. વરાછાની વાત કરવામાં આવે તો વરાછામાં અડધો ઈંચ વરસાદ નોંધાયો છે. ત્યારે હવે સુરતવાસીઓમાં પણ ખુશી જોવા મળી રહી છે. આખી રાત દરમિયાન વરસાદ વરસતા ગરમીમાં પણ નોંધપાત્ર ઘટાડો જોવા મળ્યો.
વડોદરા શહેરમાં ધીમીધારે વરસાદ શરૂઃ
વડોદરા શહેરમાં ધીમીધારે વરસાદ શરૂ થયો છે. શહેરના કેટલાક વિસ્તારોમાં પવન સાથે વરસાદ શરૂ થઈ ગયો છે. શહેરના છાણી, નિઝામપુરા, ગોરવા, સયાજીગંજ, કારેલીબાગ અને આજવા રોડ તેમજ VIP વિસ્તારમાં વરસાદ શરૂ થઈ ગયો છે.
અરવલ્લીમાં વરસાદનુ આગમનઃ
અરવલ્લી જિલ્લામાં પણ વરસાદી માહોલ જામ્યો છે. અરવલ્લીમાં પણ વરસાદનુ આગમન થયું છે. અરવલ્લીના મોડાસા, શામળાજી સહિત જિલ્લામાં ઝરમર વરસાદ પડ્યો. ત્યારે અરવલ્લીના ધરતીપુત્રોમાં પણ વરસાદ બાદ ખુશી જોવા મળી રહી છે. ગરમથી ત્રસ્ત લોકો વરસાદ પડે તેવી આશા સેવી રહ્યા છે. ત્યારે વરસાદ પડતા હવે સ્થાનિકોમાં આનંદ અને ખુશી જોવા મળી રહી છે.
સુરેન્દ્રનગરના કેટલાક વિસ્તારમાં વરસાદઃ
સુરેન્દ્રનગરના વઢવાણ સહિતના શહેરી વિસ્તારોમાં વરસાદ વરસી રહ્યો છે. લીંબડી, સાયલા અને ચુડા સહિતના ગ્રામ્ય વિસ્તારમાં પણ વરસાદ પડ્યો. જેના કારણે કેટલાક વિસ્તારોમાં વરસાદી પાણી ભરાયા છે.
જામનગરમાં ધોધમાર વરસાદઃ
આ તરફ જામનગરમાં પણ ધોધમાર વરસાદ શરૂ થયો છે. કાલાવડ પંથકમાં મેઘ મહેર થઈ છે. જામનગરના ગ્રામ્ય વિસ્તારમાં વાવણી લાયક વરસાદ શરૂ થઈ ગયો છે. જેના કારણે નદીઓમાં નવા નીર આવ્યા છે. તો બીજી તરફ ખેડૂતોમાં ખુશીનો માહોલ છવાઈ ગયો છે.
પંચમહાલ જિલ્લામાં વરસાદની શરૂઆતઃ
પંચમહાલમાં વરસાદની શરૂઆત થઈ છે. પ્રથમ વરસાદ આવતા તંત્રની પોલ ખુલી છે. 2 ઈંચ વરસાદ આવતા શહેરના અનેક વિસ્તારમાં પાણી ભરાયા છે. મહત્વનુ છે કે, તંત્ર દ્વારા પ્રિ-મોન્સૂનની કામગીરીનો દાવો કરવામાં આવ્યો હતો. પ્રથમ વરસાદે જ અનેક વિસ્તારોમાં પાણી ભરાયા છે. રસ્તા પર પાણી ભરાતા વાહન ચાલકો પરેશાન થયા છે.
મહીસાગર જિલ્લામાં મોડી રાતથી વરસાદનું આગમનઃ
મહીસાગર જિલ્લામાં સાર્વત્રિક વરસાદી માહોલ છવાયો છે. મોડી રાતથી જ સમગ્ર જિલ્લામાં વરસાદનું આગમન થયું છે. વાવણી લાયક વરસાદથી ખેડૂતોમાં ખુશીનો માહોલ છવાયો છે. તો મહીસાગર જિલ્લાના કડાણા, લુણાવાડા, સંતરામપુરમાં વરસાદ વરસી રહ્યો છે. તો વીરપુર તાલુકામાં એક ઈંચ વરસાદ નોંધાયો છે. જ્યારે બાલાસિનોરમાં અડધો ઈંચ તેમજ ખાનપુરમાં પોણો ઈંચ વરસાદ વરસ્યો છે.
આણંદ જિલ્લામાં પણ વહેલી સવારથી ધોધમાર વરસાદઃ
આ તરફ આણંદ જિલ્લામાં પણ વહેલી સવારથી ધોધમાર વરસાદ શરૂ થઈ ગયો છે. આણંદ શહેર અને ગ્રામ્ય વિસ્તારોમાં વરસાદી માહોલ સર્જાયો છે. આણંદમાં વરસાદે ધમાકેદાર એન્ટ્રી કરતાં ખેડૂતોમાં ખુશીનો માહોલ છવાઈ ગયો છે.
છોડાઉદેપુર જિલ્લામાં મોડી રાતથી ધીમીધારે વરસાદ શરૂ:
આ તરફ છોડાઉદેપુર જિલ્લામાં મોડી રાતથી ધીમીધારે વરસાદ શરૂ થઈ ગયો છે. નસવાડી અને બોડેલીમાં ધીમીધારે વરસાદ શરૂ થયો છે. ભારે પવન સાથે વરસાદના કારણે ગ્રામ્ય વિસ્તારોમાં વિજળી ગુલ થઈ ગઈ છે.
તાપી જિલ્લામાં ધીમીધારે વરસાદ:
તાપી જિલ્લામાં વરસાદી માહોલ સર્જાયો છે, વ્યારા સહિત જિલ્લામાં ધીમીધારે વરસાદ પડી રહ્યો છે. વરસાદ શરૂ થતા ધરતીપુત્રોમાં આનંદની લાગણી છવાઇ છે. તો કાળઝાળ ગરમીથી ત્રસ્ત લોકોને રાહત મળી છે.
બનાસકાંઠામાં વરસાદની શરૂઆત:
બનાસકાંઠામાં વરસાદની શરૂઆત થઇ છે. ડીસાના કેટલાક વિસ્તારોમાં વરસાદ વરસી રહ્યો છે. તો ખેડૂતોમાં આનંદની લાગણી છવાઇ છે. વરસાદના કારણે લોકોને ગરમીથી આંશિક રાહત મળી છે.
ખેડા જિલ્લામાં વરસાદની શરૂઆત:
ખેડા જિલ્લામાં વરસાદની શરૂઆત થઇ છે. યાત્રાધામ ડાકોર અને સેવાલીયામાં વરસાદ પડી રહ્યો છે. ત્યારે વરસાદ પડતા કેટલાક નીચાણવાળા વિસ્તારોમાં પાણી ભરાયા છે. તો વાવણી લાયક વરસાદ પડતાં ખેડૂતોમાં ખુશીનું મોજુ ફરી વળ્યું છે.
ભરૂચમાં વરસાદના કરાણે પાણી ભરાતાં રોજગાર પર અસર:
ભરૂચ શહેરમાં વહેલી સવારથી વરસેલા વરસાદના કારણે ઠેરઠેર જળ બંબાકાળની સ્થિતિ સર્જાઈ હતી. ભરૂચ શહેરના પાંચબતી, સેવાશ્રમ રોડ, ગાંધી બજાર, કુરજા ચાર રસ્તા અને દાંડિયા બજાર સહિતના વિસ્તારોમાં પાણી ભરાઈ જતાં લોકોને ભારે હાલાકીનો સામનો કરવાનો વારો આવ્યો હતો. તો બીજી તરફ શહેરના કતોપોર બજાર વિસ્તારમાં માર્ગો પર પાણી ફરી વળ્યા હતા. જેના કારણે વેપારીઓને ધંધા રોજગાર પર અસર પડી હતી. જેના કારણે વેપારીઓમાં રોષ ફેલાયો છે. તો બીજી તરફ તંત્રનો પ્રિ-મોનસૂન પ્લાન ધોવાઈ જતાં લોકોમાં પણ રોષ જોવા મળી રહ્યો છે.