રાજ્યના અનેક જિલ્લાઓમાં આજે ધોધમાર વરસાદ પડ્યો છે. ક્યાંક રસ્તાઓ પર પાણી ફરી વળ્યા તો ક્યાંક ખેતરોમાં પાણી ભરાયા. આ તરફ રાજકોટમાં પણ સારો વરસાદ પડ્યો. ભારે વરસાદના કારણે રસ્તાઓ પર પાણી ફરીવળ્યા હતા. તો બીજી તરફ જેતપુર બોટાદ અને અમરેલીમાં પણ ધોધમાર વરસાદ પડ્યો છે. ભારે વરસાદના કારણે ખેડૂતોમાં ખુશીની લહેર છવાઈ ગઈ છે. કારણ કે, છેલ્લા ઘણા સમયથી ખેડૂતો વાવાણી લાયક વરસાદની રાહ જોઈ રહ્યા હતા.
રાજ્યમાં ભારે ઉકળાટ બાદ વરસાદી માહોલ જોવા મળ્યો હતો. બનાસકાંઠામાં ડીસા સહિત આસપાસના વિસ્તારોમાં વરસાદ શરૂ થયો હતો. ભારે પવન સાથે વરસાદ પડતા અનેક જગ્યાએ પાણી ભરાયા હતા. તો ખેતીલાયક વરસાદ થતાં ખેડૂતોમાં ખુશીનો માહોલ જોવા મળ્યો હતો. તો બીજી બાજુ અમરેલી જિલ્લામાં પણ બપોર બાદ વાતાવરણમા અચાનક પલ્ટો જોવા મળ્યો હતો. ધારી અને ગ્રામ્ય વિસ્તારમાં વરસાદી માહોલ સર્જાયો હતો. ત્યારે ઉપરવાસમાં ભારે વરસાદના પગલે ડાગાવદર ગામે નહેરમાં પુર આવ્યુ હતુ.
જ્યારે બાબરાના ગ્રામ્ય વિસ્તારમાં ભારે પવન સાથે મેઘરાજાની એન્ટ્રી થઈ હતી. તો ખેડા જિલ્લાના સેવાલીયા-ગળતેશ્વરમાં ભારે પવન સાથે વરસાદી ઝાપટા પડ્યા. આમ,ગાજવીજ સાથે વરસાદ વરસતા લોકોને પણ ગરમીથી રાહત મળી હતી.
જો કે ભારે વરસાદને લઈને સેવાલીયા બજાર અને ગામમાં વીજ પુરવઠો ખોરવાયો હતો. તો બીજી બાજુ મહીસાગર જિલ્લામાં બપોર સુધી અસહ્ય તાપ બાદ વરસાદની બીજી ઇનિંગ શરૂ થઈ હતી. સંતરામપુર, કડાણા અને ખાનપુરના અનેક વિસ્તારમાં ભારે પવન સાથે વરસાદ પડતા વાવણી બાદના વરસાદથી ખેડૂતોમાં ખુશીનો માહોલ જોવા મળ્યો હતો.
અમરેલી જીલ્લામાં વરસાદી ઝાપટાં :
વાયુની અસરના વિરામ બાદ અમરેલી જીલ્લામાં ફરી વરસાદી માહોલ સર્જાયો છે. બપોર બાદ ધારી અને ગ્રામ્ય વિસ્તારમાં વરસાદી ઝાપટા પડ્યા છે. આમ વરસાદના પગલે વાતાવરણમાં ઠંડક પ્રસરી છે. તો વાવણી બાદ વરસાદ પડવાથી ખેડૂતોમાં ખુશીનો માહોલ જોવા મળી રહ્યો છે.
સાબરકાંઠામાં ધીમી ધારે વરસાદનું આગમન :
તો આ બાજુ ઉત્તર ગુજરાતમાં સાબરકાંઠા અને અરવલ્લી જીલ્લામાં ધીમી ધારે વરસાદનું આગમન થયું છે. સાબરાકાંઠાના વિજયનગર સહિતના તાલુકામાં વરસાદ પડ્યો છે. ભારે ઉકળાટ બાદ વરસાદ શરૂ થતા વાતાવરણમાં ઠંડક પ્રસરી છે. તો ઈડરમાં પણ ધીમીધારે વરસાદ પડતા વાતાવરણમાં ઠંડક પ્રસરી છે, તો આ બાજુ અરવલ્લીના શામળાજીમાં પણ ધીમી ધારે મેઘો મંડાયો છે.
બોટાલ જીલ્લામાં ધોધમાર વરસાદ :
બોટાદના બરવાળા પંથકમાં ધોધમાર વરસાદ પડ્યો હતો. ભારે પવન અને ગાજવીજ સાથે વરસાદ પડતા સમગ્ર વાતાવરણમાં ઠંડક પ્રસરી હતી. તો મેઘ મહેર થતા ધરતીપુત્રોમાં પણ આનંદ જોવા મળ્યો હતો.
હવામાન વિભાગની આગાહી :
ચોમાસાને લઇ હવામાન વિભાગની આગાહી કરી છે જેમાં આગામી 3 દિવસમાં રાજ્યમાં નેઋત્ય ચોમાસું બેસી શકે છે. બંગાળની ખાડીમાં લો-પ્રેશર સર્જાયું છે. ત્યારે લો પ્રેશર સિસ્ટમના કારણે દક્ષિણ ગુજરાતમાં નેઋત્ય ચોમાસું બેસી શકે છે અને ગુજરાતના કેટલાક રાજ્યોમાં વરસાદ પડી શકે છે.
અંબાલાલ પટેલની આગાહી :
સમગ્ર ગુજરાતમાં એકસાથે વરસાદે વિરામ લેતાં ભારે ઉકળાટ સાથે સામાન્ય ગરમીની અસર જોવા મળી રહી છે. ત્યારે હવામાન નિષ્ણાંત અંબાલાલ પટેલે નૈઋત્યનું ચોમાસું ગુજરાત તરફ આગળ વધ્યું હોવાની આગાહી કરી છે. તેમજ 25 જૂન સુધીમાં સત્તાવાર ચોમાસું બેસી જશે તેવી શક્યતાઓ પણ સેવાઈ રહી હોવાની તેમણે વાત કરી છે. તો આવતીકાલથી ગુજરાતમાં દિવસ દરમિયાન છુટા છવાયા વરસાદની પણ સંભાવના છે. આ ઉપરાંત અંબાલાલ પટેલની આગાહી મુજબ ગુજરાત અને સૌરાષ્ટ્રમાં હળવા વરસાદની સંભાવના છે. તો દક્ષિણ ગુજરાત અને સૌરાષ્ટ્રમાં દરિયો તોફાની બની શકે છે.