ગુજરાતમાં એક તરફ કોરોના સંકટ ઘેરાયેલું છે ત્યારે મહારાષ્ટ્રને દસ્તક આપીને દરિયામાં જ નબળા પડી ગયેલા નિસર્ગ વાવાઝોડાની અસરને પગલે સૌરાષ્ટ્રના અનેક વિસ્તારમાં વરસાદ પડ્યો હતો. જો કે, વરસાદ પડવાને કારણે સ્થાનિકોને ગરમીથી રાહત મળી હતી.
વાતાવરણમાં અચાનક પલટો
ભારે પવન સાથે વરસાદ
અસહ્ય ઉકળાટ બાદ વરસાદ
સૌરાષ્ટ્રના જિલ્લાઓના વાતાવરણમાં અચાનક પલટો આવ્યો છે. ગીર સોમનાથમાં સતત ત્રીજા દિવસે પણ વરસાદી માહોલ જોવા મળ્યો. કોડીનાર,સુત્રાપાડા સહિત ઉનાના ગ્રામ્ય પંથકમાં વરસાદ વરસ્યો. ગીરનાં કોડીનારમાં મેઘરાજાએ ધમાકેદાર એન્ટ્રી કરી હતી.
કોડિનારમાં અડધા કલાકમાં અડધો ઇંચ વરસાદ
કોડીનારમાં અડધા કલાકમાં અડધો ઇંચ વરસાદ વરસ્યો હતો. જ્યારે સુરેન્દ્રનગર જિલ્લામાં ભારે પવન સાથે વરસાદનું આગમન થયું હતું. ધ્રાંગધ્રાના રણકાઠાના ગામોમાં વરસાદ વરસ્યો હતો. તેમજ લીંબડી અને સાયલા તાલુકામાં પણ વરસાદી ઝાપટા પડ્યા હતા.
અમદાવાદના કેટલાક વિસ્તારોમાં વરસાદી ઝાપટા
નોંધનીય છે કે, અમદાવાદના વિસ્તારોમાં પણ ભારે પવન સાથે વરસાદી ઝાપટા પડ્યા હતા. અચાનક આકરા તાપ બાદ વરસાદી માહોલ સર્જાતા સ્થાનિકોને ગરમીથી રાહત મળી હતી.
દીવમાં ભારે પવન અને વરસાદી માહોલ
તો બીજી તરફ દીવમાં પણ ભારે પવન સાથે આકાશમાં કાળા ડિબાંગ વાદળ જોવા મળ્યા. ભારે પવન અને વરસાદી માહોલ સર્જાતા દીવમાં હાલ એક નંબરનું સિગ્નલ લગાવાયુ છે.
ભારે પવનને કારણે પોસ્ટર ઉડ્યા
ભારે પવનને લઈને પોસ્ટરો અને લોકોનો સામાન રસ્તા પર ઉડ્યો હતો. અસહ્ય ઉકળાટ બાદ વરસાદી વાતાવરણ સર્જાતા સમગ્ર વાતાવરણમાં ઠંડક પ્રસરી હતી.