હવામાન વિભાગ દ્વારા રાજ્યમાં 20 ઓક્ટોબર સુધી વરસાદની આગાહી કરવામાં આવી છે. ત્યારે આગાહી વચ્ચે આજે રાજકોટ, ગોંડલ, મોરબી અને ખંભાળિયા, વલસાડ, જૂનાગઢ, વંથલી, માણાવદર, ઉપલેટા, વડોદરા, જેતપુર, ભાવનગર, સાબરકાંઠા, ખેડા, અરવલ્લી, બાબરા, માળિયા અને કચ્છ સહિત રાજ્યના અનેક વિસ્તારોમાં વરસાદ ખાબક્યો હતો.
સૌરાષ્ટ્રમાં આજે ભારે વરસાદથી ખેડૂતોના પાક પલળી જતા નુકસાન
ગોંડલ શહેરમાં અંદાજે 1.5 ઇંચ પણ વધુ વરસાદ ખાબક્યો હતો
રાજ્યમાં હજુ 20 તારીખ સુધી વરસાદની આગાહી
રાજ્યમાં આજે કમોસમી વરસાદ પડ્યો હતો. જેને લઇને ખેડૂતોની ચિંતા ફરી વધી છે. સૌરાષ્ટ્રમાં આજે વાદળછાયું વાતાવરણ બાદ અનેક વિસ્તારોમાં વરસાદ પડ્યો હતો. જેમાં રાજકોટમાં 1 કલાકમાં 2 ઇંચ વરસાદ ખાબક્યો હતો. તો ગોંડલમાં વીજળીના કડાકા ભડાકા સાથે 1.5 ઇંચ વરસાદ તૂટી પડ્યો હતો. જેને લઇને રસ્તા પર પાણી ભરાયા હતા. જોકે શહેરમાં ભારે ઉકળાટ બાદ વાતાવરણમાં ઠંડક પ્રસરી ગઈ હતી. જેને લઇને લોકોએ રાહતનો અનુભવ કર્યો હતો.
રાજ્યના અનેક વિસ્તારોમાં વરસાદ તૂટી પડ્યો
જૂનાગઢ શહેર સહિત માણાવદર, કેશોદ, વંથલી, ભેસાણ, ટીંબાવાડી અને મેંદરડામાં ભારે વરસાદ પડ્યો હતો. વંથલી તાલુકાના લુશાળા ગામે તેમજ આજુબાજુમાં કમોસમી વરસાદ પડ્યો હતો. દ્વારકાના ખંભાળિયા પંથકમાં વાતાવરણમાં પલટો જોવા મળ્યો હતો. દાત્રાણા ગામે પણ ધોધમાર વરસાદ ખાબકતા ખેડૂતોને વ્યાપક નુકસાન થયું છે. વલસાડ જિલ્લાના કેટલાક વિસ્તારમાં છૂટોછવાયો વરસાદ નોંધાયો હતો. જેમાં ડાંગરના પાકને નુકસાનીની ભીતિ સેવાઇ રહી છે. તો વાપી અને ભીલાડમાં પણ વરસાદ પડ્યો છે. તો જેતપૂર અને આસપાસના ગામોમાં પણ વરસાદ થયો હતો. વડોદરા શહેરના મકરપુરા, માંજલપુર, જામ્બુવા, તરસાલી, દાંડિયા બજાર વિસ્તારમાં પણ વરસાદ થયો છે. સાબરકાંઠા, અરવલ્લી, શામળાજી અને ખેડા જિલ્લામાં વરસાદ પડ્યો હતો. ખેડૂતો માટે આફતરૂપ વરસાદ ખાબક્યો હતો. હિંમતનગર માર્કેટયાર્ડની મગફળી પલળી ગઇ હતી.
મેરવદરમાં વીજળી પડતા 2 ઇજાગ્રસ્ત, ભાવનગરમાં મકાન પર પડી વીજળી
ઉપલેટા તાલુકાના મેરવદર ગામે વીજળી પડવાથી બે લોકો ઇજાગ્રસ્ત થયા હતા. તેમને સારવાર અર્થે ઉપલેટાની ખાનગી હોસ્પિટલ ખસેડવામાં આવ્યા છે. તો ભાવનગરમાં મેપાનગર વિસ્તારમાં રહેણાંક મકાન પર વીજળી પડી હતી. મકાન અને ઈલેકટ્રોનિકના સામાનને નુકસાન થયું છે.
ભાવનગર શહેર અને જિલ્લાના વાતાવરણમાં પલટો, માર્કેટિંગ યાર્ડમાં મગફળી પલળી
ભાવનગર જિલ્લામાં આજે ગાજવીજ સાથે ભારે વરસાદ વરસ્યો હતો. જેને લઇને રસ્તા પર પાણી ભરાયા હતા. તો બીજી તરફ ભાવનગર જિલ્લામા વરસાદથી ખેડૂતો ચિંતિત બન્યા છે. માર્કેટિંગ યાર્ડમાં રાખેલ મગફળીનો જથ્થો પલળી ગયો હતો. યાર્ડમાં ખુલ્લામાં પડેલી હજારો ગુણી મગફળી બગડી ગઇ છે. વેચાયા વિનાની મગફળી બગડી જતા ખેડૂતોને નુકસાન ભોગવવાનો વારો આવ્યો છે. 4 દિવસથી યાર્ડમાં મગફળી લાવવા પર પ્રતિબંધ મુક્યો હતો.
કમોસમી વરસાદને લઇને ખેડૂતોના પાક પલળી ગયા
રાજ્યમાં કમોસમી વરસાદમાં ખેડૂતોને મગફળી પલળી જતા રાતા પાણીએ રોવાનો વારો આવ્યો છે. તેમજ પશુ માટે ધાસચારમાં નુકશાન થયું છે. મગફળી તેમજ પશુઓ માટેનો ચારો પણ બગડ્યો છે. કમોસમી વરસાદથી ખેડૂતોને નુકશાન થયું છે. સરકાર દ્વારા વહેલા સર્વે કરી નુકસાન થયેલા ખેડૂતોના વળતરની માંગ કરી છે. તો ડાંગરના તૈયાર પાકને નુકસાન થયું છે. ખેતરમાં સુકાઈ રહેલા પાક પર વરસાદ પડ્યો છે. 5 હજાર હેકટરમાં પાક નુકસાનીની ભીતિ સેવાઇ રહી છે.
રાજ્યમાં આગામી 3 દિવસ સુધી ભારે વરસાદના એંધાણ
હવામાન વિભાગ દ્વારા આગામી 3 દિવસ સુધી સૌરાષ્ટ્ર, દક્ષિણ ગુજરાત અને કચ્છમાં ભારે વરસાદની આગાહી કરી છે. વેલમાર્ક લો પ્રેશરના કારણે વરસાદ રહેશે. દરિયાકાંઠાના વિસ્તારોમાં વરસાદ થઇ શકે છે. જોકે હજુ વરસાદની આગાહીના પગલે તંત્ર અલર્ટ થયું છે. માછીમારોને દરિયા ન ખેડવા સૂચનો અપાયા છે.