જામ્યો મેહુલિયો / ગુજરાતમાં મેઘમહેર: છેલ્લા 24 કલાકમાં 241 તાલુકામાં વરસાદ, ઉત્તર ગુજરાતમાં મેઘરાજાએ બોલાવી ધડબડાટી

• ગુજરાતમાં છેલ્લા 24 કલાકમાં સાર્વત્રિક વલરસાદ
• 24 કલાકમાં રાજ્યના 241 તાલુકામાં વરસાદ
•  બનાસકાંઠામાં ભારે વરસાદ 

ગુજરાતમાં આ વખતે ખેડૂતો માટે ચોમાસુ દમદાર રહ્યું. મોટાભાગના વિસ્તારોમાં વરસાદી માહોલ જામતા પાકને જીવતદાન મળી રહ્યું છે.  ઉત્તર ગુજરાતમાં આ વખતે વરસાદ ઓછો નોંધાયો હતો પરંતુ હવે તે કસર પણ પુરી થઇ ગઇ. મેઘરાજા ઉત્તર ગુજરાતમાં ધડબડાટી બોલાવી રહ્યા છે. ત્યારે આવો જાણીએ છેલ્લા 24 કલાકમાં કેવો રહ્યો વરસાદી માહોલ..

છેલ્લા 24 કલાકમાં 241 તાલુકામાં વરસાદ

હવામાન વિભાગની આગાહીને પગલે રાજ્યમાં સાર્વત્રિક વરસાદ થયો. છેલ્લા 24 કલાકમાં રાજ્યના 241 તાલુકામાં વરસાદ થયો છે. જેમાં સૌથી વધુ તાપીના સોનગઢમાં 7 ઈંચ વરસાદ થયો છે, જ્યારે મહેસાણામાં સાડા પાંચ ઈંચ અને ધરમપુરમાં સાડા ચાર ઈંચ વરસાદ થયો છે... જ્યારે દહેગામ, બેચરાજી, ડીસામાં 4 ઈંચ અને દિયોદર, છોટાઉદેપુર, ચીખલી, પારડીમાં 3 ઈંચથી વધુ વરસાદ થયો છે.

બનાસકાંઠામાં ધોધમાર વરસાદ

બનાસકાંઠા જિલ્લામાં પવન સાથે ધોધમાર વરસાદ વરસ્યો. પરિણામે સરસ્વતી નદી બે કાંઠે વહેતી થઇ છે. મુક્તેશ્વર ડેમમાં પાણીની આવક થવા પામી છે. ડેમમાં 10 હજાર ક્યૂસેક પાણીની આવક થવા પામી. તો બનાસકાંઠાના ડીસામાં ધોધમાર વરસાદ વરસ્યો. વરસાદને કારણે દામા, યાવારપુર અને કંસારીમાં પાણી ભરાયા.   માલગઢ, વરણ સહિતના ગામો બેટમાં ફેરવાયા. હજુ પણ અનેક વિસ્તારોમાં વરસાદ પડી રહ્યો છે. 

બહુચરાજીમાં વરસાદ

મહેસાણાના બહુચરાજીમાં 118 મિમી વરસાદ નોંધાયો. વરસાદને લઈ નીચાણવાળા વિસ્તારોમાં પાણી ભરાયા. બહુચરાજી-શંખલપુર રોડ પણ પાણીમાં ગરકાવ થયો.  પાણી ભરાતા સિવિલ હોસ્પિટલમાં જતા દર્દીઓને હાલાકી વેઠવાનો વારો આવ્યો છે. 24 કલાકથી સતત વરસાદ વરસતા ગ્રામજનો હાલાકી વેઠવા મજબૂર બન્યા છે. 

પાટણમાં વરસાદ

પાટણમાં પણ ધીમીધારે વરસાદ યથાવત જોવા મળ્યો. સતત બીજા દિવસે પાટણમાં મેઘમહેર જોવા મળી રહી છે. પાટણ, સિદ્ધપુર, ચાણસ્મા, સરસ્વતી સહિતના તાલુકામાં વરસાદી માહોલ જોવા મળ્યો. જેને લઇને રોડ રસ્તા પાણી પાણી થયા.

દિયોદરમાં ખેતરો પાણીમાં 

તો બનાસકાંઠામાં એવો ધોધમાર વરસાદ વરસ્યો કે ખેડૂતોની મહેનત પાણીમાં ગરકાવ થઇ ગઇ. સારો વરસાદ આવવાની આશાએ વાવેતર કર્યુ હતું તેની પર મેઘરાજાએ કહેર વર્તાવતા ખેતરો પાણી પાણી થયા. દિયોદરની આસપાસના ગામો બેટમાં ફેરવાયા. ખેતરમાં પાણી ભરાઇ જતા જાણે કે તળાવ બની ગયુ હોય તેમ લાગી રહ્યું હતું. તો આ તરફ દિયોદરના સોની ગામમાં ઘરમાં પાણી ઘૂસી જતા રહીશો હાલાકી વેઠવા મજબૂર બન્યા હતા. 

હવામાન વિભાગની શું છે આગાહી

ગુજરાતમાં આ વખતે ચોમાસું ખેડૂતો માટે સોળ આની રહ્યું છે. ઘીમી ઘારે આવતો વરસાદ મોટા ભાગના વિસ્તારોમાં આવેલા પાકને જીવતદાન આપી રહ્યો છે. પણ હવે હવામાન વિભાગ દ્વારા ચિંતાજનક આગાહી કરવામાં આવી છે. હવામાન વિભાગ ડિરેક્ટર મનોરમા મોહંતીના જણાવ્યા અનુસાર રાજ્યમાં 5 દિવસ ભારે વરસાદ રહેશે. કચ્છ, બનાસકાંઠા, પાટણ, વલસાડ, પાટણ, જામનગર, રાજકોટ, પોરબંદર, સુરેન્દ્રનગરમાં ભારે વરસાદની આગાહી કરવામાં આવી છે. માછીમારોને દરિયો ન ખેડવા સૂચના અપાઈ છે. આગાહી મુજબ 17 અને 18 તારીખના રોજ ઉપરોક્ત જગ્યાએ  મેઘરાજાએ રૌદ્ર સ્વરૂપ ધારણ કરી શકે છે. 19 ઓગસ્ટ બાદ વરસાદી સિસ્ટમ નબળી પડશે.