વાયુ વાવાઝોડાના કારણે સૌરાષ્ટ્રમાં સારો એવો વરસાદ પડી રહ્યો છે. જ્યારે રાજ્યમાં ધીરે ધીરે ચોમાસું પણ જામતું જાય છે. આજે રાજ્યના 81 તાલુકામાં વરસાદ વરસ્યો છે. જેમાં સૌથી વધુ ઉનામાં સવા બે ઈંચ વરસાદ થયો છે.
આ તરફ સૂત્રાપાડા અને ગીર-ગઢડામાં 2-2 ઈંચ વરસાદ નોંધાયો છે. કોડીનારમાં સવા ઈંચ અને રાજુલા, ખાંભા તેમજ જાફરાબાદમાં એક-એક ઈંચ વરસાદ પડ્યો છે. જ્યારે માંડવી-બાલાસીનોરમાં પોણો ઈંચ, મહુવા, વંથલી, સાવરકુંડલા, ગારીયાધાર અને મહેસાણામાં અડધો ઈંચ વરસાદ પડ્યો છે.
વરસાદની શરૂઆત થતાં ખેડૂતો પણ ખુશખુશાલ થઈ ગયા છે. જ્યારે બીજી તરફ રાજ્યભરમાં લોકોને ગરમીમાં પણ આંશિક રાહત મળી છે. જ્યારે હવામાન વિભાગે મહેસાણા, અમદાવાદ, ગાંધીનગરમાં આગામી ત્રણ કલાકમાં ભારે પવન ફૂંકાવાની આગાહી કરતાં જિલ્લા ડિઝાસ્ટર વિભાગ દ્વારા અધિકારીઓને સતર્ક રહેવા સૂચના આપવામાં આવી છે.
જ્યારે સૌરાષ્ટ્રથી લઇને ગુજરાતના અનેક જિલ્લામાં સવારથી વરસાદ વરસી રહ્યો છે. વરસાદ પડતાં લોકોએ ગરમીથી રાહત મેળવી છે તો બીજી તરફ ખેડૂતોમાં વાવણી લાયક વરસાદ વરસતાં ખુશીની લહેર જોવા મળી છે. રાજ્યના રાજકોટ, બનાસકાંઠા, ગીર-સોમનાથ, સુરેન્દ્રનગર, અમરેલી, જૂનાગઢ, વલસાડમાં વરસાદ પડ્યો છે.
તો બીજી તરફ આજ રોજ સવારે અમદાવાદ શહેરમાં મેઘરાજાની મહેર જોવા મળી છે. આજે સવારે શહેરના અનેક વિસ્તારોમાં ભારે પવન સાથે વરસાદ પડ્યો છે. જેમાં શહેરના જજીસ બંગલા રોડ, બોડકદેવ, સોલા, એસજી હાઇવે સહિત પૂર્વના અનેક વિસ્તારોમાં વરસાદ પડયો છે. જેમાં પૂર્વ વિસ્તારની વાત કરીએ તો મણિનગર, ખોખરા, હાટકેશ્વરમાં ભારે પવન સાથે વરસાદ પડતા નીચાણવાળા વિસ્તારોમાં પાણી ભરાયાં છે.
આજે સવારથી જ ગાંધીનગરમાં વરસાદનુ આગમન થયુ છે..વરસાદ પડવાની શરૂઆત થયાની સાથે જ વાતાવરણાં ઠંડક પ્રસરી છે... તો બીજી બાજુ કોબા સહિતના વિસ્તારોમાં ધોધમાર વરસાદ પડતા વાતવરણમાં ઠંડક પ્રસરી છે.