રાજ્યમાં કમોસમી વરસાદ કહો કે માવઠું જાણે ખેડૂતોની ચિંતામાં વારંવાર વધારો કરી રહ્યું હોય તેવું લાગી રહ્યું છે. હવામાન વિભાગના જણાવ્યાં મુજબ આગામી 48 કલાકમાં રાજ્યના અનેક ભાગમાં સામાન્ય વરસાદની આગાહી કરવામાં આવી છે. આમ રાજ્યમાં ખેડૂતોના રવિપાક પર તેમજ કેરીના પાકને નુકસાન થવાની ભીતિ છે.
રાજ્યના વાતાવરણમાં ફરી પલટો
2 દિવસ હળવા ઝાપટાની હવામાન વિભાગની આગાહી
હવામાન વિભાગે કરી કમોસમી વરસાદની આગાહી
છેલ્લા થોડા દિવસથી ઠંડી એકદમ જતી રહી છે અને એકદમ ગરમી ચાલુ થઇ ગઇ છે. વેસ્ટર્ન ડિસ્ટર્બન્સની (Western Disturbance) અસરના કારણે રાજ્યનાં કેટલાક વિસ્તારમાં કમોસમી વરસાદ પડવાની આગાહી છે. હવામાન વિભાગની આગાહીથી રાજ્યના ખેડૂતોમાં ચિંતા વ્યાપી છે. આ અંગે હવામાન વિભાગે આગાહી કરી છે કે, આજ રોજ રાજ્યનાં વાતાવરણમાં પલટો આવશે.
આ સાથે રાજ્યમાં વાદળછાયું વાતાવરણ રહેશે. બનાસકાંઠા અને વલસાડમાં હળવા છાપટાં પડવાની શક્યતાઓ છે. હવામાન ખાતાએ કરેલી આગાહી પ્રમાણે, લો-પ્રેશરની સ્થિતિ સર્જાતા 5મી માર્ચના રોજ એટલે કે આજે રાજ્યનાં કેટલાક ભાગોમાં કમોસમી વરસાદ થવાની શક્યતાઓ છે.
આજ રોજ ઉત્તર ગુજરાતના બનાસકાંઠા, વલસાડ, દમણ, દાદરા નગર હવેલી તથા સૌરાષ્ટ્રના દ્વારકા, પોરબંદર અને કચ્છ વિસ્તારમાં હળવા વરસાદી ઝાપટાં પડી શકે છે. જોકે, બીજા દિવસે 6 માર્ચના રોજ પણ આ વિસ્તારમાં વાદળછાયુ વાતાવરણ રહી શકે છે.