મેઘની મહેર / સૌરાષ્ટ્રના રાજકોટ, જૂનાગઢમાં લાંબા સમય બાદ વરસાદ, સુરતમાં કારમાં વરસાદી પાણી ઘૂસ્યા

• જૂનાગઢ જિલ્લામાં વરસાદનું આગમન
• માળીયા હાટીના તાલુકામાં વરસાદ
• માળીયા શહેર,વીરડી,અમરાપુર,કાત્રાસા ગામમાં વરસાદ

સૌરાષ્ટ્રના ધોરાજીમાં ફરીથી એક વખત વરસાદનું આગમન થયું હતું. અનેક દુકાનોમાં પણ પાણી ભરાયા હતા. જે સૌરાષ્ટ્રમાં વરસાદની રાહે લોકો બેઠા હતા ત્યાં ધોરાજીમાં નદીઓ નીકળી હતી. એક કલાકમાં 1 ઈંચ જેટલો વરસાદ ખાબક્યો હતો. એકાએક વરસાદના આગમનથી ધોરાજીમાં ઠંડક પ્રસરી હતી.  ધોરાજી  સહિત તોરણીયા, પરબડી, જમનાવડમાં વરસાદ વરસ્યો હતો. 25 દિવસ બાદ વરસાદનું આગમન થતાખેડૂતોમાં ખુશીનો માહોલ જોવા મળ્યો હતો. 

રાજકોટ જિલ્લાના ઉપલેટા પંથકમાં બપોર બાદ વરસાદ વરસ્યો હતો. લાંબા સમયના વિરામ બાદ વરસાદના આગમનથી લોકોએ ગરમીથી છૂટકારો મેળવ્યો છે. એક કલાકમાં અડધો ઇંચ વરસાદ નોંધાયો હતો. ડુમીયાણી, ચીખલીયા, હાડફોડીમાં વરસાદ વરસ્યો હતો. સાથે  સમઢીયાળા, ખાખીજાળીયા, મોજીરામાં વરસાદ નોંધાયો હતો.  આશરે 25 દિવસના લાંબા વિરામ બાદ વરસાદ આવતા ખેડૂતોમાં પણ ખૂશી જોવા મળી છે. 

સૌરાષ્ટ્રમાં લાંબા વિરામ બાદ મેઘની મહેર થઈ છે. તો અમરેલીના ધારી અને લિલિયાના  ગ્રામ્ય વિસ્તારોમાં વરસાદ વરસ્યો હતો. જેને લઈ ખેડૂતોમાં રાહતનો શ્વાસ આવ્યો છે. કારણ કે, અનેક ખેડૂતોએ વાવણી કરી દીધી છે. અને લાંબા સમયથી વરસાદની રાહ જોઈ રહ્યા હતા. જ્યાં અમરેલીમાં ધારીના ગોવિંદપુર, સરસિયા, સુખપુર, કાંગસામાં વરસાદ વરસ્યો હતો. સાથે લિલિયાના એકલેરા, નાના કણકોટમાં પણ વરસાદી અમી છાંટણા થયા છે. 

સુરત શહેરમાં બપોર બાદ મેઘરાજાનું આગમન થયું હતું.  લાંબા વિરામ બાદ ફરી વરસાદ શરૂ થતા લોકોએ રાહત લીધી હતી. ભારે બફારા બાદ તમામ વિસ્તારમાં વરસાદના આગમનથી વાતાવરણમાં ઠંડક પ્રસરી હતી. કેટલાક વિસ્તારમાં વરસાદી પાણી ભરાયા હતા. નર્મદા જિલ્લામાં ભારે પવન સાથે વરસાદ વરસ્યો હતો. બપોર બાદ ગાજવીજ સાથે વરસાદ શરૂ થયો હતો. .હવામાન વિભાગની આગાહી મુજબ વરસાદનું આગમન થતા ખેડૂતોમાં ખુશીની લહેરલ જોવા મળી હતી.