ભારતીય રેલવે હવે મુસાફરોને આકર્ષવા માટે નવુ નજરાણુ લઇને આવી રહી છે. સર્વિસ મામલે ફ્લાઈટને ટક્કર આપવાની તૈયારીમાં છે. જેના માટે પ્રીમિયમ ટ્રેનોમાં વિમાનોની જેમ એર હોસ્ટેસ જેવી સર્વિસ આપવાની તૈયારીમાં છે. એટલું જ નહીં, રેલવે આ ટ્રેનોમાં મુસાફરોને ઘર જેવુ ખાવાનું પુરૂ પાડશે.
ભારતીય રેલવે સર્વિસ મામલે ફ્લાઈટને ટક્કર આપવાની તૈયારીમાં
પ્રીમિયમ ટ્રેનોમાં વિમાનોની જેમ એર હોસ્ટેસ મુકવામા આવશે
ટ્રેન હોસ્ટેસ તરીકે ફક્ત મહિલાઓ નહીં પરંતુ પુરૂષ પણ સામેલ થશે
આ ટ્રેનોમાં મળશે ફ્લાઈટ જેવી મજા
મીડિયા રિપોર્ટસ અનુસાર, રેલવેના એક સીનિયર અધિકારીના જણાવ્યાં મુજબ ટૂંક સમયમાં પ્રીમિયમ ટ્રેનોમાં ટ્રેન હોસ્ટેસ સર્વિસ શરૂ થવાની છે. અહેવાલ મુજબ, આ સર્વિસ વંદે ભારત એક્સપ્રેસ, ગતિમાન એક્સપ્રેસ અને તેજસ એક્સપ્રેસ જેવી પ્રીમિયમ ટ્રેનોમાં મળશે. રાજધાની એક્સપ્રેસ અને દૂરંતો એક્સપ્રેસ જેવી લાંબા અંતરની પ્રીમિયમ ટ્રેનોમાં આ સર્વિસ આપવામાં આવશે નહીં.
પુરૂષ પણ બનશે ટ્રેન હોસ્ટેસ
ટ્રેન હોસ્ટેસ તરીકે ફક્ત મહિલાઓ નહીં પરંતુ પુરૂષ સભ્યો પણ હશે. આ ટ્રેન હોસ્ટેસ ફક્ત દિવસ દરમ્યાન જ સર્વિસ આપશે. રાત્રે તેઓ ડ્યુટી નહીં કરે. અધિકારીના જણાવ્યાં મુજબ, આ હોસ્ટેસ પ્રોફેશનલ રહેશે. જેમકે વિમાનોમાં એર હોસ્ટેસ હોય છે તે રીતે. જેના માટે દરેક ટ્રેન હોસ્ટેસને રેલવે તરફથી ટ્રેનિંગ આપવામાં આવશે.
આ કામ કરશે ટ્રેન હોસ્ટેસ
ભારતીય રેલવે મુસાફરોને વધુ આકર્ષિત કરવા માટે ઘણાં સુધારા પર કામ કરી રહી છે. ટ્રેન હોસ્ટેસ સર્વિસ આ પ્રયાસનો જ ભાગ છે. હોસ્ટેસ ટ્રેનની મુસાફરી દરમ્યાન મુસાફરોને આવકારવા સિવાય તેમને સીટ સુધી લઇ જવા માટે, ચા-ભોજન આપવુ અને મુસાફરોની ફરિયાદ સાંભળી તેનું સમાધાન કરશે.
ખાવાની ગુણવત્તાને સુધારવાના પ્રયાસ
આ ઉપરાંત રેલવેએ પ્રીમિયમ ટ્રેનોમાં મુસાફરોને મળતી ખાવાની ગુણવત્તાને વધુ સારી કરવાનો પણ ઉપાય કર્યો છે. કોવિડને પગલે ઓનબોર્ડ કુકિંગને બંધ કરવામાં આવ્યું હતુ. જેને ફરીથી શરૂ કરાયુ છે.