તહેવારોની સીઝન શરૂ થઈ ગઈ છે. ત્યારે આરોગ્ય વિભાગ પણ હરકતમાં આવી ગયુ છે. જામનગરમાં પટેલ કોલોની બેડી બંદર રોડ પર આવેલી ફરસાણ અને મીઠાઈની દુકાન પર આરોગ્ય વિભાગની ટીમે દરોડા પાડી જરૂરી સેમ્પલો એકઠા કરી કાયદેસરની કાર્યવાહી હાથ ધરી છે. તો વડોદરામાં તહેવારને પગલે આરોગ્ય વિભાગે દરોડા પાડ્યા છે.
ફાફડા જલેબીની દુકાનો પર ચેકિંગ હાથ ધરવામાં આવ્યુ છે. શહેરના હરિનગર વિસ્તારમાં દુકાનોમાં દરોડા પાડ્યા છે. આ પ્રમાણે સુરતમાં દશેરાના તહેવારને લઈને દરોડા પાડ્યા હતા. સુરતી ખમણ એન્ડ હાઉસની દુકાનમાં આરોગ્ય વિભાગે દરોડા પાડ્યા હતા.
દુકાનમાંથી જલેબી-ફાફડાના સેમ્પલો લેવામાં આવ્યા છે. આ સેમ્પલોને ચકાસણી માટે કચ્છ અને ભુજની લેબોરેટરીમાં મોકલવામાં આવ્યા છે. તો આ તરફ અમદાવાદમાં આરોગ્ય વિભાગના અધિકારીઓએ 5થી 6 અલગ અલગ ટીમો બનાવીને ચેકિંગ શરૂ કર્યુ છે.
ફરસાણની દુકાનોમાં ભેળસેળ થતી હોવાની અધિકારીઓને આશંકા છે. આરોગ્ય વિભાગના અધિકારીઓએ દરોડા પાડીને ફાફડા જલેબી ચણાના લોટના નમૂના લીધા છે. આરોગ્ય વિભાગે નમૂના લેબોરેટરી મોકલીને આગળની કાર્યવાહી હાથ ધરી છે.