નકલી વ્યવહાર / સૌરાષ્ટ્ર સહિત ગુજરાતમાં GST વિભાગનો સપાટો, બોગસ બિલિંગના કૌભાંડનો આંકડો જાણીને ચોંકી જશો

• સ્ટેટ GSTના રાજ્યવ્યાપી દરોડા 
• રાજ્યમાં 71 સ્થળોએ સ્ટેટ GST વિભાગે પાડ્યા દરોડા
• અમદાવાદ, ભાવનગર, સુરત, ગાંધીનગરમાં દરોડા 

ગુજરાતમાં સ્ટેટ GSTએ રાજ્યવ્યાપી દરોડા પાડવાની કામગીરી હાથ ધરી હતી. જે હેઠળ રાજ્યમાં 71 સ્થળોએ સ્ટેટ GST વિભાગે દરોડા પાડ્યા હતા. જેમાં અમદાવાદ, ભાવનગર, સુરત, ગાંધીનગરમાં દરોડાની કામગીરી કરી હતી. તો ભાવનગરની માધવ કોપરમાંથી બોગસ બિલિંગ કૌભાંડ ઝડપાયું છે. માધવ કોપરના 75 કરોડના બોગસ બિલિંગ સામે આવ્યું છે.  તો આ તરફ અફઝલ સાદિકઅલી સવજણીના રૂપિયા 739 કરોડના બોગસ વ્યવહાર ઝડપાયા છે. જ્યારે પ્રાંતિજના મીનાબેન રાઠોડના રૂપિયા 577 કરોડના બોગસ વ્યવહાર ઝડપાયા છે.  GST વિભાગે બોગસ વ્યવહારો મામલે 2 લોકોની ધરપકડ પણ કરી છે. GST વિભાગે દસ્તાવેજો અને કોમ્પ્યુટર કબ્જે કર્યા છે. 

આ અગાઉ GSTના રિટર્નમાં મિસમેચના પગલે રાજ્યના લગભગ 37,000 જેટલા કરદાતાઓને વિભાગે નોટિસ મોકલી છે. GSTના સમરી રિટર્ન જીએસટીઆર-3બી અને વેચાણના રિટર્ન જીએસટીઆર-1ના ડેટામાં તફાવત હોવાથી વિભાગ દ્વારા નોટિસો મોકલવામાં આવી છે. ચાર્ટર્ડ એકાઉન્ટન્ટ્સના જણાવ્યા મુજબ જીએસટીઆર-3બી અને જીએસટીઆર-2એ રિટર્નમાં મિસમેચ મુદ્દે પણ નોટિસો આપવામાં આવી રહી છે.

જોકે, નિષ્ણાતો જણાવે છે કે સરકારે જીએસટીઆર-3બી રિટર્ન રિવાઇઝ કરવાની છૂટ નથી આપી તેના કારણે આ કાયમી સમસ્યા રહેવાનો ડર છે. તમામ રિટર્ન રિવાઇઝ કરવા શક્ય છે. પરંતુ જીએસટીઆર-3બીમાં સુધારો કરવો શક્ય નથી તેના કારણે કરદાતાઓએ પરેશાનીનો સામનો કરવો પડે છે અને વિભાગ માટે પણ કાર્યભાર વધી રહ્યો છે.