સ્ટેટ ગુડ્સ એન્ડ સર્વિસ ટેક્સ ડિપાર્ટમેન્ટ દ્વારા બોગસ બિલ બનાવી આચરવામાં આવતા કૌભાંડીઓ પર દેશભરમાં સાગમટે દરોડા પાડવામાં આવ્યા છે. આ મામલે 11 રાજ્યોમાં તપાસ ચાલી રહી છે.
SGST ડિપાર્ટમેન્ટ દ્વારા દેશભરમાં દરોડા
GST બોગસ બિલિંગ કૌભાંડમાં 11 રાજ્યોમાં તપાસ શરુ
દેશભરમાં 200 પેઢીને નોટિસ આપવામાં આવી
તાજેતરમાં ગુજરાતના વિવિધ શહેરોમાં સ્ટેટ જીએસટી ડિપાર્ટમેન્ટ દ્વારા પાડવામાં આવેલા દરોડામાં કરોડોના વ્યવહારો ઝડપી પાડવામાં આવ્યા હતા. આ કૌભાંડનો રેલો હવે ગુજરાત સહિત 11 રાજ્યોમાં પહોંચ્યો છે. SGST ડિપાર્ટમેન્ટની 11 રાજ્યોમાં તપાસ ચાલી રહી છે.
200 પેઢીઓને ITCની તપાસ માટે નોટિસ
ગુજરાતમાં સાગમટે પાડવામાં આવેલા દરોડા દરમિયાન મળેલા વ્યવહારોના આધારે તપાસ કરતા કૌભાંડના તાર મધ્ય પ્રદેશ, રાજસ્થાન, આસામ, છત્તીસગઢ, પોન્ડીચેરી, તેલંગણા, ઝારખંડ, દિલ્હી, મહારાષ્ટ્ર, તમિલનાડુ અને કર્ણાટક સુધી પહોંચ્યા છે. જેને લઈને સ્ટેટ જીએસટી ડિપાર્ટમેન્ટે બોગસ પેઢીઓ પાસેથી બિલ મેળવેલી આઇટીસીની તપાસ માટે નોટિસ પાઠવી છે. દેશભરમાં 200 પેઢીને નોટિસ ફટકારવામાં આવી છે.
98 કરોડની ITC લીધી હોવાનું આવ્યું બહાર
આપને જણાવી દઈએ કે, તાજેતરમાં સ્ટેટ ગુડ્સ એન્ડ સર્વિસ ટેકસ ડિપાર્ટમેન્ટ દ્વારા ગુજરાતમાં તપાસ હાથ ધરાઇ હતી. ગુજરાતમાં 98 કરોડની ITC લીધી હોવાનું બહાર આવ્યું હતું. બોગસ પેઢીઓએ કરેલા વ્યવહારોની તપાસ અધિકારીઓ દ્વારા કરવામાં આવતા જે લોકોએ બોગસ બિલ લીધા હતા તેની યાદી તૈયાર કરવામાં આવી હતી. આ તપાસનો રેલો હવે અન્ય રાજ્યોમાં પહોંચ્યો છે.
બોગસ પેઢી પાસેથી બિલ મેળવેલી ITCની તપાસ અંગે નોટિસ
ગુજરાત ઉપરાંત મધ્ય પ્રદેશ, રાજસ્થાન, આસામમાં તપાસ ચાલી રહી છે. બોગસ બિલિંગ છત્તીસગઢ, પોન્ડીચેરી, તેલંગણા, કર્ણાટક, ઝારખંડ, દિલ્હી,મહારાષ્ટ્ર અને તમિલનાડુથી પણ ઓપરેટ થતું હોવાનું તપાસમાં સામે આવ્યું છે. તપાસ બાદ મોટી કરચોરી બહાર આવે તેવી શક્યતાઓ છે.