Saturday, April 20, 2019

Crime / ગાંધીધામમાં ધમધમતા હુક્કાબાર પર દરોડો, કુલ ચાર લોકોની અટકાયત

ગાંધીધામમાં ધમધમતા હુક્કાબાર પર દરોડો, કુલ ચાર લોકોની અટકાયત

કચ્છઃ ગાંધીધામનાં મામલતદાર કચેરી નજીક, કચ્છકલા રોડ પાસે ધમધમી રહેલા હુક્કાબાર પર સરહદી રેન્જના આર.આર. સેલ દ્વારા દરોડૉ પાડીને હુક્કાબાર સાથે સટ્ટાખોરીનો પણ પર્દાફાશ કર્યો હતો. સમગ્ર કાર્યવાહીમાં કુલ ચાર લોકોની અટકાયત કરાઈ હતી. જેમાં હુક્કાની મજા માણવા છરી સાથે બેઠેલા યુવાનનો પણ સમાવેશ થાય છે. મહાનિરિક્ષક ડી.બી. વાઘેલાની આગેવાનીમાં કાર્ય કરતા સરહદી રેન્જનાં સેલ દ્વારા શનિવારનાં રાત્રે ૮-૩૦ વાગ્યે જ્યારે આઈપીએલ ક્રિકેટ ચાલુ હતી ત્યારે શહેર મધ્યે સેક્ટર-૧એમાં, મામલતદાર કચેરીથી થોડાં અંતરે આવેલા રાધે કોમ્પલેક્ષમાં ધમધમી રહેલા ધ ફ્લેવર્સ ફૂડ એન્ડ બેવરેજિર્સમાં દરોડૉ પાડવામાં આવ્યો હતો.




પોલીસની ટીમે પ્રવેશ કરતાજ અંધારા વાતાવરણમાં મોટી સ્ક્રિન પર આઈપીએલની મેચ કિંગ્સ ઈલેવન પંજાબ અને રોયલ ચેલેન્જર બેંગ્લોરની ટીમ વચ્ચેની મેચનું સીધુ પ્રસારણ ચાલુ હતુ. હુક્કાબારના સંચાલક અને ક્રિકેટ પર સટ્ટો રમાડતો ઈસમ નરેંદ્રસિંહ ભીમસિંહ વાઘેલા (ઉ.વ.ર૯) (રહે.,વોર્ડ ૯, ડી.એન. કોલેજની બાજુમાં) તથા સટ્ટો રમતા નવીન રાજભા ગઢવી (ઉ.વ.૩૬) (રહે. સુભાષનગર), તથા રાજભા જુવાનસિંહ વાઘેલા (ઉ.વ.રર) (રહે. ગળપાદર) ને પકડી પાડ્યા હતાં.

ત્રણેયની ઝડતી લઈને તેમની પાસેથી ત્રણ મોબાઈલ ફોન સાથે ટૅલિવિઝન, સેટટોપ બોક્સ તેમજ એક કાર ગણીને કુલ રૂ.પ,૬ર,૦૦૦નો મુદામાલ જપ્ત કર્યો હતો. તો સ્થળ પરથી ૧૩ હુક્કા, અલગ અલગ ૧૩ ફ્લેવર્સના ડબ્બાઓ અને તેની સામગ્રી મળી ર૦ હજારની સાધનો જપ્ત કરાયાં હતાં. તો આ સ્થળે રહેલા અન્ય એક ઈસમ ચીરાગ ધમરશીભાઇ મઢવી (ઉ.વ.ર૬) (રહે. વોર્ડ-૧૦ એ,ગાંધીધામ) પાસેથી એક છરી ઝડપાતાં હથીયારબંધી જાહેરનામાનાં ભંગ બદલ કાર્યવાહી કરાઈ હતી, જેમાં એક ઈનોવા કાર પણ જપ્ત કરાઈ હતી.

આમ સમગ્ર કાર્યવાહીમાં હુક્કાબાર, સટ્ટાખોરી અને હથિયારબંધી એમ ત્રણ ગુન્હામાં ચારની અટક કરીને રૂ.૧૦,૮ર,૦૦૦નો મુદામાલ જપ્ત કરાયો હતો. આ સમગ્ર કાર્યવાહિ જી.એમ.હડીયા, બાતમીદાર પો. કોન્સ. જયદીપસિંહ જાડેજા, એ.એસ.આઈ. પરીક્ષીતસિંહ જાડેજા, દિલીપસિંહ જાડેજા, મેઘજીભાઈ મહેશ્વરી, મહાવિરસિંહ વાઘેલા સહિતનાએ સાથે પાર પાડી હતી. ફ્લેવર્સ હુક્કાબાર પર બે વર્ષે અગાઉ પણ આજ સ્થળે આર.આર. સેલની ટીમે દરોડો પાડ્યો હતો. ત્યારબાદ સ્થાનીક પોલીસે ઓસ્લો સર્કલ પર પણ દરોડો પાડ્યો હતો. ત્યારે અગાઉ જ્યાં હુક્કાબારનો દરોડો પડી ચુક્યો છે ત્યાં ફરી સ્થાનિક પોલીસના નાક નીચે કઈ રીતે હુક્કાબાર ધમધમી રહ્યું હતું તે પ્રશ્નો ઉભા થયાં છે.
Kutch Hookah Bar Raid

જોવા જેવું વધુ જુઓ

બ્રેકિંગ ન્યૂઝ